23 Oct 2022, 12:00
ފޭސްބުކްގެ ބިޓްމޯޖީ ސްޓައިލްގެ އެވެޓާތައް އެކި ސިފަސިފައިގައި އިންސްޓަގްރާމްއާއި މެސެންޖާގައި ލިބޭތާ ދުވަސްތަކަކަށްފަހު، މިހާރު ވަޓްސްއެޕުންވެސް އެފަދަ އެވެޓާތަކެއް ތައާރަފު ކުރުމަށް ދަނީ ތައްޔާރުވަމުންނެވެ.
ވަޓްސް އެޕްގެ ޚަބަރުތައް ގެނެސްދޭ ޑަބްލިޔުއޭބީޓާއިންފޯ އިން ރިޕޯޓުކޮށްފައިވާ ގޮތުން ވަޓްސްއެޕްއިން ދަނީ އެ އެޕްގެ އެންމެ ފަހުގެ އަޕްޑޭޓް 2.22.23.9 ބީޓާގައި އެންޑްރޮއިޑް ފޯނުތަކަށް ކަސްޓަމައިޒް ކުރެވޭ އެވެޓާތަކަށް ސަޕޯޓް ދޭން ފަށާފައެވެ. ނަމަވެސް އެއީ ބައެއް ޔޫޒަރުންނަށް ކަމަށް އެރިޕޯޓްގައި ފާހަގަ ކޮށްފައިވެއެވެ.
މި ފީޗާ ބޭނުން ކުރުމުގެ ފުރުސަތު ބައެއް މީހުންނަށް މިހާރުވެސް ލިބިފައިވާއިރު، އެމީހުންނަށް ސެޓިންސް މެނޫއިން އާ "އެވެޓާ" ކެޓަގަރީއެއް ފެންނާނެއެވެ. އެ ކެޓަގަރީ ބޭނުންކޮށްގެން އަމިއްލައަށް ފަސޭހަކަމާއެކު މިހާރު ކަސްޓަމައިޒް ކުރެވޭނެއެވެ.
މެޓާގެ އެހެން އެޕްތަކާ އެއްގޮތަށް، ވަޓްސްއެޕްއިން ވެސް އެކި ވައްތަރުތަކުގެ އެވެޓާގެ ސްޓިކާ ޕެކެއް އުފެއްދޭނެއެވެ. އަދި އެ އުފައްދާ ސްޓިކާ ޕެކް ބޭނުންކޮށްގެން އާއިލާ އާއި ރައްޓެހިންނަށް މެސެޖު ކުރާއިރު ޚިޔާލު ފާޅުކުރުމަށް އެ ސްޓިކާތަކުގެ ބޭނުން ކުރެވޭނެ އެވެ.
ވަޓްސްއެޕްއިން އެންޑްރޮއިޑްގެ ހުރިހާ ޔޫޒަރުންނަށް މި ފީޗާ ބޭނުން ކުރެވޭގޮތް ހަދާނީ ކޮން އިރަކު ކަމެއް އަދި ނޭނގެއެވެ. އަދި އައިއޯއެސްއަށް މި ފީޗާ ގެންނަން ވަޓްސްއެޕްއިން ރާވާފައިވާ ކަމެއް ވެސް ސާފެއް ނުވެއެވެ.
މެސެންޖާ އާއި ނިއުސް ފީޑްގައި މިފަދަ އެވެޓާތައް ބޭނުންކުރެވޭ ގޮތް އެންމެ ފުރަތަމަ ހެދީ 2020ގައެވެ. އެ އެވެޓާތައް 3ޑީ ކޮށް ފެންނަ ގޮތަށް ދާދި ފަހުން ވަނީ ހަދާފައެވެ. އަދި ފީޑް ޕޯސްޓްތަކަށްވެސް އެ ފަދަ ސްޓިކާތައް ލެވޭގޮތް މިހާރު ވަނީ ހަދައިފައެވެ.