21 Oct 2022, 11:38
ޔުއެފާ ޔޫރޮޕާލީގްގައި އާސެނަލް އާއި ޕީއެސްވީ ރޭ ބައްދަލުކުރި މެޗު އާސެނަލް ކާމިޔާބުކޮށް ދެވަނަ ބުރުގެ ޖާގައެއް ހޯދައިފިއެވެ.
އެމިރޭޓްސް ސްޓޭޑިއަމުގައި ނެދަލެންޑްސްގެ ޕީއެސްވީއާ ދެކޮޅަށް ކުޅުނު މި މެޗު އާސެނަލް ކާމިޔާބުކުރީ 0-1 ގެ ނަތީޖާއަކުންނެވެ.
މެޗުގައި މޮޅަށް ކުޅެ ގޯލަށް އަމާޒުކޮށް ގިނަ ހަމަލާތައް ފޮނުވާފައި ވަނީ އާސެނަލްއިންނެވެ. މެޗުގައި ފެނިގެންދިޔަ ހަމައެކަނި ލަނޑު އާސެނަލަށް ކާމިޔާބުކޮށްދިނީ 71 ވަނަ މިނެޓް ތެރޭގައި ގްރެނިޓް ޒަކާއެވެ.
މެޗަށްފަހު ވާހަކަދައްކަމުން އާސެނަލްގެ ކޯޗު މިކޭލް އަޓޭޓާ ބުނީ، މެޗުގައި އާސެނަލް ކުޅުންތެރިންގެ ފަރާތުން ދެއްކި ކުޅުމާއިމެދު ހިތްހަމަ ޖެހޭ ކަމަށެވެ. ގްރޫޕް ސްޓޭޖުގައި އަދިވެސް މެޗުތަކެއް ހުރުމާއިއެކު އެ މެޗުތަކަކީ ވެސް މުހިއްމު މެޗުތަކެއް ކަމަށް އަޓޭޓާ ފާހަގަކުރިއެވެ.
ޒަކާއާ ބެހޭގޮތުން އަޓޭޓާ ބުނީ ޒަކާއަކީ ހަޤީޤީ ލީޑަރެއްކަން މެޗުގައި ސާބިތުކޮށްދީފި ކަމަށާއި، ކުރިއަށް އޮތްތަނުގައި ޒަކާ ފެންނާނީ މާބޮޑަށް ވެސް ވަރުގަދަކޮށްކަމަށެވެ.
މެޗަށް ފަހު މި ގްރޫޕްގެ ޕޮއިންޓް ތާވަލް މިހާރު އޮތްގޮތަށް ބަލާއިރު 12 ޕޮއިންޓާއެކު އާސެނަލް އެއްވަނައިގަ އުޅޭއިރު، 7 ޕޮއިންޓާއެކު ދެވަނައިގަ އުޅެނީ ޕީއެސްވީއެވެ.