21 Oct 2022, 11:28
ޝާހުރުކް ޚާންގެ 'ޖަވާން' އަކީ ތަމަޅަ ފިލްމެއްގެ ވާހަކައެއް ކަމަށް މުހައްމަދު ރާޝިދު މުހައްމަދު އިގްބާލް ކަމާލް ނުވަތަ ކަމާލް ރާޝީދު ޚާން ބުނެފިއެވެ.
ބޯޖްޕުރީ ގިނަ ފިލްމުތަކެއް އުފައްދާފައިވާ ކަމާލް ރާޝިދު ޚާން – ކޭއާރްކޭ ޓްވިޓާގައި ބުނި ގޮތުގައި ޝާހުގެ އެންމެ އަވަހަށް ނެރޭ ފިލްމަކީ ތަމަ ފިލްމެއްގެ ވާހަކައަކާ އެއްގޮތް ފިލްމެއް ކަމަށެވެ. އޭނާ ބުނި ގޮތުގައި، އޭނާއަށް ހަބަރު ލިބިފައިވަނީ ޖަވާންގެ ވާހަކަ އަކީ ތަމަ ފިލްމު 'ސަރްދާރް'ގެ ދާދި އެއްގޮތް ވާހަކައެއް ކަމަށެވެ. އަދި ދެ ފިލްމުގެ ޕޯސްޓަރުވެސް އޭނާ ވަނީ ޓްވިޓާގައި ހިއްސާކޮށްފައެވެ.
ތަމަޅަ ފިލްމުވެސް ދާދި އަވަހަށް ރިލީޒްކުރަން ހަމަޖެހިފައިވާއިރު މި ފިލްމު ހިންދީ ބަހުން ވެސް ނެރެން ވަނީ ހަމަޖެހިފައެވެ.
ކޭއާރްކޭގެ މި ޓްވީޓަށް ގިނަ ބަޔަކު ވަނީ ނުރުހުން ފާޅުކޮށްފައެވެ. ޝާހުގެ ފޭނުން އޭނާގެ ދިފާއުގައި ނިކުމެ ބުނެފައިވަނީ މި ކަން މިއީ ދޮގެއް ކަމަށް މީގެ ކުރިންވެސް ބުނެފައިވާ ކަމަށާއި ދޮގު ހަބަރު ފެތުރުން ހުއްޓާލުމަށް އެދޭ ކަމަށެވެ.
އެހެން މީހަކު ބުނެފައިވާ ގޮތުގައި، ޖަވާން ފިލްމުގެ ޓީޒާއަށް ބަލާފައި އެގޮތަށް ގޮތް ނިންމުން ރަނގަޅު ނޫން ކަމަށާއި ފިލްމު ބަލާފައި އެފަދަ ނިންމުމެއް ނިންމާނީ ބެލުންތެރިން ކަމަށް ބުންޏެވެ.
ހަބަރުތައް ބުނާގޮތުން ކޭއާރްކޭ އަކީ ބޮލީވުޑުން ނެރޭ ކޮންމެ ފިލްމަކަށް ވެސް މިފަދަ ތުހުމަތުތަކެއް ކުރާ މީހެކެވެ. އެގޮތުން، 'ތޭންކް ގޯޑް' ފިލްމު ނެރުނު ދުވަސް ކަމު ނުދާ ކަމަށް ބުނެފައިވެއެވެ.
ޝާހުގެ އާ ފިލްމުތަކުގެ ފަހުގެ މަސައްކަތްތައް މިހާރު ކުރަމުންދާއިރު، 'ޕަޓާން' އަންނަ އަހަރު ޖެނުއަރީގައި ރިލީޒްކުރާނެއެވެ. އަދި، އަހަރުގެ މެދުތެރެއިން 'ޖަވާން' އަދި އަހަރުގެ ފަހުކޮޅު 'ޑަންކީ' ރިލީޒްކުރަން ދަނީ މަސައްކަތް ކުރަމުންނެވެ. އަންނަ އަހަރަކީ ޝާހުގެ އަހަރު ކަމަށް ގިނަ ބަޔަކު ބުނެއެވެ.