17 Oct 2022, 15:16
ކިއެވް (17 އޮކްޓޯބަރު 2022): ޔުކްރެއިންގެ ވެރިރަށް ކިޔޭވްއަށް މިއަދު ހެނދުނު ރަޝިއާގެ ވަރުގަދަ ހަމަލާތަކެއް އަރައިފިއެވެ.
ކިޔޭވްގެ މޭޔަރު ވިތާލީ ކްލިޗްކޯ ވިދާޅުވިގޮތުގައި ރަޝިއާގެ ހަމަލާތައް އަމާޒުކޮށްފައިވަނީ ކިޔޭވްގެ މެދުގައިވާ އިމާރާތްތަކަކަށެވެ. މީގެތެރޭގައި ޔުކްރެއިންގެ އިލެކްޓްރިސިޓީއާ ބެހޭ ކުންފުނީގެ މައި އޮފީސް ހިމެނޭ އިމާރާތާއި އާންމުން ދިރިއުޅޭ އިމާރާތްތަކާއި ޔުކްރެއިންގެ މުވާސަލާތީ މަރުކަޒުތައް ހުންނަ އިމާރާތްތައް ހިމެނޭކަމަށް އޭނާ ވިދާޅުވިއެވެ.
ކިޔޭވް އަށް މި ހަމަލާތައް އަރާފައި މިވަނީ ރަޝިޔާއާއި ޔޫކްރެއިނުގެ ސަރަހައްދީ ރޮނގު ކައިރީގައި އޮންނަ ރަޝިއާގެ ރަށެއް ކަމުގައިވާ ބެލްގޮރޮޑްއަށް ޔުކްރެއިން އިން ވަރުގަދަ ހަމަލާތަކެއް ދީފައިވަނިކޮށެވެ. ޔުކްރެއިންގެ ސިފައިން ބެލްގޮރޮޑްއަށް ހަމަލާދީފައިވަނީ އެމެރިކާއިން ޔުކްރެއިން އަށް ފޯރުކޮށްދީފައިވާ ހައިމާސް މަރުކާގެ މިސައިލުންކަމަށާއި އޭގެތެރެއިން އެތައް މިސައިލެއް ވައްޓާލާފައިވާނެކަމަށް ރަޝިއާގެ ދިފާއީ ވުޒާރާއިން ބުނެފައިވެއެވެ.
ޔުކްރެއިންގެ ސިފައިން ބެލްގޮރޮޑްއަށް ދިން ހަމަލާތައް އަމާޒުކުރި ތަންތަނުގެ ތެރޭގައި ބެލްގޮރޮޑްގައި ހުންނަ ތެޔޮ ވަޅެއް ހިމެނެއެވެ. ތެޔޮވަޅަށް އަމާޒުކޮށް ދިން ހަމަލާގެ ސަބަބުން ހަތަރު މީހުން ޒަޚަމުވުމުގެ އިތުރުން ތެޔޮ ވަޅުގައި އަލިފާން ރޯވިކަމަށް ރަޝިއާގެ މަސްއޫލުވެރިން ވިދާޅުވެފައިވެއެވެ.
ޔުކްރެއިންގެ ސިފައިން ރަޝިއާގެ ބެލްގޮރޮޑްއަށް ހަމަލާދެނީ އެއީ ޔުކްރެއިންގައި ހަނގުރާމަކުރާ ރަޝިއާގެ ސިފައިންނަށް ބޭނުންވާ ހަތިޔާރާއި އެނޫންވެސް ލޮޖިސްޓިކްސް ސަޕްލައިކޮށްދޭ މަގުތަކާއި ރޭލްވޭތައް ހުރި ސަރަހައްދަކަށް ވާތީ ކަމަށް ތަޖުރިބާކާރުން ވިދާޅުވެއެވެ.
ޔުކްރެއިންއިން ރަޝިއާގެ ބެލްގޮރޮޑްއަށް ދޭ ހަމަލާތައް މިފަހަކަށް އައިސް ވަނީ އިތުރުވެފައެވެ. ޔުކްރެއިން އިން އެކިފަހަރުމަތިން ތަކުރާރުކޮށް ބެލްގޮރޮޑްއަށް ދީފައިވާ ހަމަލާތަކުގައި ރަޝިއާގެ 11 މީހަކު މަރުވެފައިވާ ކަމަށް ރިޕޯޓްތައް ބުނެއެވެ. މިމަހުގެ 14 ވަނަ ދުވަހު ޔުކްރެއިނުންވަނީ ބެލްގޮރޮޑްގެ ކަރަންޓު ސަބްސްޓޭޝަނަކަށް ވެސް ހަމަލާތަކެއް ދީފައެވެ. އޭގެކުރިން ދިން ހަމަލާތަކެއްގައި ރަޝިޔާގެ ހަތިޔާރު ގުދަނެއްވެސް ވަނީ ހަލާކު ކޮށްލާފައި ކަމަށް ޔުކްރެއިން އިން ބުނެފައިވެއެވެ.
އަސްކަރީ ޑްރޯނެއް (40 އަށް ވުރެ ގިނަ ވައްތަރުގެ އަސްްކަރީ ޑްރޯން އީރާނުން އުފައްދާ)
ރަޝިއާވެސް ގެންދަނީ ދޭތެރެއަކުން ޔުކްރެއިންގެ ވެރިރަށް ކިޔޭވް އަށް ޑްރޯންއާއި ބަލިސްޓިކް މިސައިލުން ހަމަލާތައް ދެމުންނެވެ. ރަޝިއާގެ ހަމަލާތައް މައިގަނޑު ގޮތެއްގައި އަމާޒު ކުރަނީ ޔުކްރެއިން ސިފައިންގެ ކޮމާންޑް އެންޑް ކޮންޓްރޯލް މަރުކަޒުތަކަށާއި ރޭލްވޭތަކާއި ހަތިޔާރު ގުދަންތަކަށާއި އެމެރިކާއާއި ޔޫރަޕުން ޔުކްރެއިންއަށް ފޯރުކޮށްދޭ ހަތިޔާރުތައް ގެންނަ ސަޕްލައި ޗެއިންތަކަށެވެ.
ރަޝިއާގެ ހަމަލާތަކުގެ ސަބަބުން ޔުކްރެއިންގެ ގިނަ ސަރަހައްދުތަކުން މޯބައިލް ފޯނުގެ ޚިދުމަތްތަކާއި އިންޓަނެޓްގެ ޚިދުމަތްތައްވަނީ ކެނޑިފައެވެ. މިކަމުގެ ދަތިކަން ޔުކްރެއިންގެ އާންމުންގެ އިތުރުން އެގައުމުގެ އަސްކަރިއްޔާއަށް ވެސް ދަނީ ފޯރަމުންނެވެ.
ރަޝިއާގެ ހަމަލާތަކުގެ ސަބަބުން ޔުކްރެއިންގެ މުވާސަލާތާބެހޭ މަރުކަޒުތައް ހަލާކުވެ އިންޓަނެޓާއި މޯބައިލް ފޯނުގެ ޚިދުމަތްތައް ހުއްޓިފައިވާތީ އެމެރިކާ ގެންދަނީ އެމެރިކާގެ މަހުޖަނެއްކަމަށްވާ އިލޯން މަސްކްގެ ސްޓާލިންކް ސެޓަލައިޓް މެދުވެރިކޮށް ޔުކްރެއިންއަށް އިންޓަނެޓް ފޯރުކޮށްދިނުމަށް އޭނާއަށް ފިއްތުންތައް ކުރިމަތި ކުރަމުންނެވެ. މަސްކް މިކަމާ ކުރިން ދެކޮޅު ހެދިނަމަވެސް މިހާރު އެކަމަށް އޭނާ އެއްބަސްވެފައިވާ ކަމަށް ޚަބަރުތައް ބުނެއެވެ.
ރަޝިއާއިން ޔުކްރެއިންއަށްދޭ ވައިގެ ހަމަލާތަކުގައި އީރާނުގެ ޑްރޯންތައް ގިނަ އަދަދަކަށް ބޭނުންކުރާ ކަމަށް ޔުކްރެއިންގެ ރައީސް ވްލަދިމީރު ޒެލެންސްކީ ވަނީ ތުހުމަތު ކުރައްވާފައެވެ. މިއަދު ރަޝިއާ ކިޔޭވްއަށް ދިން ވައިގެ ހަމަލާތަކުގައިވެސް ގިނައިން ބޭނުންކުރީ އީރާނުގެ ޑްރޯންތައް ކަމަށް ޔުކްރެއިން ބުނެއެވެ.
އެމެރިކާގެ ނޫހެއްކަމަށްވާ "ވޮޝިންޓަން ޕޯސްޓް" ބުނާގޮތުން އީރާން ގެންދަނީ އެގައުމުގައި އުފައްދާ ޑްރޯންތަކުގެ އިތުރުން ބަލިސްޓިކް މިސައިލްވެސް ރަޝިއާއަށް ސިއްރިޔާތުގައި ފޯރުކޮށްދެމުންނެވެ.
މިގޮތުން އީރާނުގައި އުފައްދާ ބިމުން ބިމަށް ފޮނުވާ ދެބާވަތެއްގެ ބަލިސްޓިކް މިސައިލް ކަމަށްވާ "ޒުލްފިގާރު" އާއި "އަލްފާތިހު 110" ގެ ގިނަ މިސައިލްތަކެއް ރަޝިއާއަށް ވިއްކުމުގެ އެއްބަސްވުމެއްގެ ދަށުން އެތަކެތި ސިއްރިޔާތުގައި އީރާނުން ރަޝިއާއަށް ފޯރުކޮށްދެމުން ގެންދާކަމަށް އެމެރިކާގެ މަސްއޫލުވެރިއަކާ ހަވާލާދީ "ވޮޝިންޓަން ޕޯސްޓް" ބުނެފައިވެއެވެ.
މީގެތެރެއިން "ޒުލްފިގާރު"އަކީ 300 ކިލޯމީޓަރުގެ ރާސްތާގެ މިސައިލެއްކަމަށާއި "އަލްފާތިހު 110"އަކީ އޭގެ ނަމުން ދޭހަވާ ގޮތަށް، 110 ކިލޯމީޓަރުގެ ރާސްތާގެ މިސައިލެއް ކަމަށް އެނޫސް ބުނެއެވެ.