17 Oct 2022, 10:52
ޖާންވީ ކަޕޫރާއި އޭނާގެ މަންމަ ސްރީދޭވީގެ މަސައްކަތުގައި ހުރި އެއްގޮތް ކަންކަމާއި ތަފާތުތައް ބަލައި، އޭގެ ތެރެއިން ރަނގަޅީ ވަކި މީހެއްގެ މަސައްކަތް ކަމަށް ބުނެ، އެފަދަ ވާހަކަތައް ނުދެއްކުމަށް ޖާންވީގެ ބައްޕަ އަދި މަޝްހޫރު ޕްރޮޑިއުސަރު ބޮނީ ކަޕޫރު އެދިއްޖެއެވެ.
ބޮނީ ކަޕޫރު އެހެން ބުނީ ޖާންވީގެ އައު ފިލްމު 'މިލީ'ގެ ޓްރެއިލާ ދައްކާލަން ބޭއްވި ހަފުލާގައެވެ.
މީޑިއާއަކުން ކުރި ސުވާލަކާ ގުޅިގެން ބޮނީ ބުނީ، އެކި އެކްޓަރުން ކެރެކްޓާތައް ކުޅެން ތައްޔާރު ވަނީ އެކި ގޮތްގޮތަށް ކަމަށެވެ. އެގޮތުން ސްރީދޭވީއަކީ ފިލްމެއްގެ ކެރެކްޓާ ކުޅޭ މީހެއް ނޫން ކަމަށާއި އޭނާ އެ ކެރެކްޓާއަކަށް ބަދަލުވަނީ ކަމަށް ބޮނީ ކަޕޫރު ބުންޏެވެ. ޖާންވީ ވެސް މަސައްކަތް ކުރަނީ އެގޮތަށް ކަމަށާއި އޭނާ ފިލްމީ ދާއިރާއިން މިހާތަނަށް ހޯދި ކުރިއެރުމުން އެކަން އެނގޭ ކަމަށް ބޮނީ ބުންޏެވެ.
"ސްރީދޭވީގެ ފިލްމުތަކަށް ތަރުހީބު ލިބެން ފެށީ 150-200އެއްހާ ސައުތު ފިލްމު ކުޅުނު ފަހުން. އަހަރެންގެ ދަރިފުޅު އަދި އޭނާގެ ދަތުރު ފެށީ. އެހެންވީމާ އޭނާގެ މަންމަ ކުރި މަސައްކަތާ އަޅާ ނުބަލާ. އޭނާގެ މަންމަ ސްރީދޭވީގެ ދަތުރުވެސް ފުރިހަމަ،" ބޮނީ ކަޕޫރު ބުންޏެވެ.
މިލީގެ ޓްރެއިލާ ދޫކޮށްލުމާއެކު ގިނަ ބަޔަކު ވަނީ ޖާންވީއަށް ތައުރީފުކޮށްފައެވެ. އެގޮތުން ބޮލީވުޑްގެ ތަރި އަނުޝްކާ ޝަރްމާ ބުނެފައިވަނީ މި ފިލްމުގެ ޓްރެއިލާ ބަލާލުމުން މުޅި ފިލްމު ބަލާހިތްވާ ކަމަށެވެ.
ޖާންވީގެ އެއް ބަފާ ބޭބެ އަދި އެކްޓަރު އަރްޖުން ކަޕޫރު ވެސް ފިލްމުގެ ޓްރެއިލާގެ ފުރިހަމަކަން ފާހަގަކޮށް، އޭނާގެ ކޮއްކޮ ބޮޑު މަސައްކަތްތައް ކުރާތީ ފަޚުރުވެރިވާ ކަމަށް ބުނެފައެވެ.
މިލީއަށް ފަހު ޖާންވީ ވަނީ ދެ ފިލްމެއްގެ މަސައްކަތް ފަށާފައެވެ. އެގޮތުން، ރާޖްކުމާރު ރާއޮ އާއެކު މިސްޓަ އެންޑް މިސިސް މާހީ އާއި ވަރުން ދަވަން އާއެކު 'ބަވާލް'ގެ މަސައްކަތްވެސް އޭނާ ދަނީ ކުރަމުންނެވެ.
އިންޑިއާ ސިނަމާގެ ފުރަތަމަ 'އަންހެން ސުޕަސްޓާ'ގެ ނަމުން މަޝްހޫރުވި ސްރީދޭވީ އެ ދާއިރާގައި މަސައްކަތް ކުރަން ފެށީ އުމުރުން ހަތަރު އަހަރުގައެވެ. އޭނާ މަރުވީ 2018 ވަނަ އަހަރު އުމުރުން 54 އަހަރުގައެވެ.