15 Oct 2022, 16:28
ދިވެހި މީޑިއާގެ އަޚްލާގީ މިންގަނޑު އިސްލާހުކޮށް މީޑިއާތަކުން އޭގައި މިއަދު ސޮއިކޮށްފިއެވެ.
ދިވެހިރާއްޖޭގެ އަޑުގެ ސެނެކޯ މާލަމުގައި މިއަދު ބޭއްވި ރަސްމިއްޔާތެއްގައި 60 އަށްވުރެ ގިނަ މީޑިއާތަކުން ވަނީ އަޚްލާގީ މިންގަނޑުގައި ސޮއިކޮށްފައެވެ.
ދިވެހި މީޑިއާގެ އަޚުލާގީ މިންގަނޑު އިސްލާހުކޮށްފައި މިވަނީ 11އަހަރު ފަހުންނެވެ.
ދިވެހި މީޑިއާގެ އަޚްލާގީ މިންގަނޑުގައި މީޑިއާތަކުން ސޮއިކުރުމަށް ބޭއްވި ރަސްމިއްޔާތުގެ ތެރެއިން --- ސަން ފޮޓޯ/ މުޙައްމަދު ހައްޔާން
"ސަން"އާ ވާހަކަދައްކަވަމުން މީޑިއާ ކައުންސިލްގެ ރައީސް މުހައްމަދު ޝަފާއު ހަސަން ވިދާޅުވީ ދިވެހި މީޑިއާގެ އަޚްލާގީ މިންގަނޑު ޒަމާނާއެއްގޮތަށް އިސްލާހު ކުރުމަށް މީޑިއާތަކުގެ ފުރިހަމަ އެއްބާރުލުން ލިބުނު ކަމަށެވެ.
"އިސްލާހު ކުރެވުނު ކޯޑް އޮފް އެތިކްސް އަކީ ހުރިހާ މީޑިއާ އަކުން އެއްތާކު ތިބެގެން އިސްލާހު ކުރި އެއްޗެއް،" އޭނާ ވިދާޅުވިއެވެ.
ދިވެހި މީޑިއާގެ އަޚްލާގީ މިންގަނޑުގައި މީޑިއާތަކުން ސޮއިކުރުމަށް ބޭއްވި ރަސްމިއްޔާތުގައި މީޑިއާ ކައުންސިލްގެ ރައީސް މުހައްމަދު ޝަފާއު ހަސަން ވާހަކަދައްކަވަނީ --- ސަން ފޮޓޯ/ މުޙައްމަދު ހައްޔާން
ޝަފާއު ވިދާޅުވީ މީޑިއާގެ އަޚުލާގީ މިންގަނޑު އިސްލާހުކުރުމަށް މީޑިއާތަކުގެ އިތުރުން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި އެޑިޓާސް ގިލްޑުގެ އެއްބާރުލުން ލިބުނު ކަން އޭނާ ފާހަގަކުރެއްވިއެވެ.
"އަޅުގަނޑުމެން އަބަދުވެސް ދައްކަން ނޫސްވެރިންގެ ހައްގުގެ ވާހަކަ. ނަމަވެސް ހައްގުތަކާއެކު އަދާކުރަން ޖެހޭ ޒިންމާތަކެއްގެ ވާހަކަވެސް އެބަ އާދެ. މި ފަހަރުގެ އިސްލާހުގައި އަޅުގަނޑުމެން ޕަބްލިކަށް އަންގަދީފަ ވާނެ އަޅުގަނޑުމެންގެ ޒިންމާތައް. މަސައްކަތް ކުރާނެ ގޮތް ވެސް،" އޭނާ ވިދާޅުވިއެވެ.
ގެނައި އިސްލާހުތަކުގެ ތެރެއިން އެންމެ މުހިއްމު ކަމެއްގެ ގޮތުގައި ޝަފާއު ވިދާޅުވީ މިފަހަރު ގެނައި އިސްލާހާއެކު ޚަބަރެއްގައި ގޯސް މައުލޫމާތެއް ވާނަމަ އެކަން ރަނގަޅުކޮށް، އެ ރަނގަޅުކުރި ވާހަކަ ބުނަން ވާނެ ކަމަށެވެ.
ހަމައެއާއެކު ޚަބަރެއް ނެގި ނަމަވެސް ކުރިއާ ޚިލާފަށް އެ ޚަބަރު ނަގަން ޖެހުނީ ކީއްވެކަން ބަޔާން ކޮށްދޭން ޖެހޭނެ ކަމަށްވެސް އޭނާ ވިދާޅުވިއެވެ.
ދިވެހި މީޑިއާގެ އަޚްލާގީ މިންގަނޑުގައި މީޑިއާތަކުން ސޮއިކުރުމަށް ބޭއްވި ރަސްމިއްޔާތުގެ ތެރެއިން --- ސަން ފޮޓޯ/ މުޙައްމަދު ހައްޔާން
ޝަފާއު ވިދާޅުވީ ކުރިއަށް އޮތްތާނގަ ކޮންމެ މީޑިއާއަކުން ވަކިވަކިން އެމީޑިއާއެއް އަމަލުކުރަން ޖެހޭ އަޚުލާގީ މިންގަނޑެއް އެކުލަވައިލަން ޖެހޭނެ ކަމަށާއި އެ ކައުންސިލްގެ ޖަލްސާއަކުން އެކަން ފާސްކުރުމަށްފަހު ވަރަށް އަވަހަށް އެކަން މީޑިއާތަކަށް އަންގާނެ ކަމަށް ވެސް ޝަފާއު ވިދާޅުވިއެވެ.
އެގާރަ އަހަރު ފަހުން އިސްލާހުކޮށް މިއަދު ސޮއިކުރި ދިވެހި މީޑިއާގެ އަޚްލާގީ މިންގަނޑުގައި ބަޔާން ކޮށްފައިވާ ގޮތަށް ހުރިހާ މީޑިއާތަކުން އަމަލުކުރަން ޖެހޭނެއެވެ.