13 Oct 2022, 14:30
ޑްރަގްގެ ބޮޑެއް ކަމަށް ބުނާ ގދ. ހޯޑެއްދޫ، އަލޯރާ، އަރުޝަދު ޚާލިދު ދުބާއީން ޑީޕޯޓް ކޮށްލުމުން ރާއްޖެ ގެނެސް ކޯޓަށް ހާޒިރުކުރުމުގެ ކުރިން އޭނާ ދޫކޮށްލުމުން ފުލުހުންނަށް އަމާޒުވި ބޮޑެތި ފާޑުކިޔުންތަކާއެކު އެފަދަ މައްސަލަތަކުގައި އަމަލުކުރާ އުސޫލު މިއަދުން ފެށިގެން ބަދަލުކޮށްފިއެވެ.
ހައިކޯޓުން ވަނީ އަރުޝަދު ލަންކާގައި ހުއްޓައި ބަންދުގައި ބަހައްޓައިގެން ހާޒިރުކުރުމަށް ފުލުހުންގެ މައްޗަށް އަމުރެއް ނެރެފައެވެ. އަދި އެނާ ލަންކާއިން މަލެ ގެނެސް ބަންދާ މެދު ގޮތެއް ނިންމަން ހައި ކޯޓުގައި ތާވަލުކޮށްފައި ވަނީ ރޭ 19:45އަށެވެ.
ނަމަވެެސް ހައިކޯޓުން ބުނެފައިވަނީ ފުލުހުންގެ ބެލުމުގެ ދަށުން ކޯޓަށް ހާޒިރުކުރުމުގެ އަމުރެއް އޮއްވައި، ރޭ ތާވަލުކުރި އަޑުއެހުމަށް އޭނާ ހާޒިރުވީ އަމިއްލައަށް ކަމަށެވެ.
އެކަމާ ގުޅިގެން ފުލުހުންގެ އޮފިޝަލަކު މިއަދު "ސަން"އަށް ވިދާޅުވީ ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް ކޯޓުތަކުން ނެރޭ އަމުރުތަކަށް އަބަދުވެސް އަމަލު ކުރަނީ އެ އުސޫލުގެ މަތިން ކަމަށެވެ.
އެގޮތުން ކޯޓަށް ހާޒިރުކުރުމުގެ ކުރިން އެ މީހަކު ދޫކޮށްލަނީ، ކޯޓަށް ހާޒިރުވާންޖެހޭ ގަޑިއަށް ފުލުހުންނާއެކު ހާޒިރުވުމަށް އެންގުމަށްފަހު ކަމަށް އޭނާ ވިދާޅުވިއެވެ.
ނަމަވެސް އަރުޝަދުގެ މައްސަލައިގައި ފުލުހުން އޭނާ ގަސްދުގައި ދޫކޮށްލީ ކަމުގެ ތުހުމަތުތައް އަމާޒުވެ އާއްމުންގެ ފާޑުކިޔުންތައް އަމާޒުވާން ފެށުމުން އެފަދަ އަމުރުތަކުގައި އަމަލު ކުރަމުން އައި އުސޫލު މިއަދުން މިއަދަށް ބަދަލުކުރަން ޕޮލިސް ކޮމިޝަނަރު މުހައްމަދު ހަމީދު އަންގަވާފައިވާ ކަމަށް އޭނާ ވިދާޅުވިއެެވެ.
"ސީޕީގެ އެންގެވުމުގެ މަތިން މިއަދުން ފެށިގެން ބަންދުގައި ބަހައްޓައިގެން ކޯޓަށް ހާޒިރުކުރުމުގެ އަމުރެއް ނެރެފިނަމަ، ކޯޓަށް ހާޒިރުކުރާނީ ހަމަ ފުލުހުންގެ ބަންދުގައި ބަހައްޓައިގެން،" އޭނާ ވިދާޅުވިއެވެ.
ރާއްޖެއަށް މަސްތުވާތަކެތި އެތެރެކޮށް ފުޅާދާއިރާއެއްގައި އެތަކެތީގެ ވިޔަފާރި ކުރާ ކަމަށް ފުލުހުން ތުހުމަތު ކުރާ އަރުޝަދު ވަނީ 2020 ވަނަ އަހަރުގެ މާޗު މަހުގެ ތެރޭގައި ގިނައަދަދެއްގެ މަސްތުވާތަކެއްޗާއެކު ހައްޔަރު ކޮށްފައެވެ. ނަމަވެސް އޭނާގެ މައްޗަށް ކުރި ދައުވާތައް ސާބިތުނުވާ ކަމަށް ކްރިމިނަލް ކޯޓުން ހުކުމް ކުރުމާއެކު އޭނާ ވަނީ މިނިވަންވެފައެވެ. އެ މައްސަލަ ދައުލަތުން ވަނީ ހައިކޯޓުގައި އިސްތިއުނާފުކޮށްފައެވެ.
އޭގެފަހުން މަސްތުވާތަކެތީގެ އިތުރު މައްސަލައެއްގައި އޭނާ ހައްޔަރުކުރަން ބެލިއިރު ދުބާއީއަށް ގޮސް ވަނީ ފިލައިފައެވެ.
އެއީ މިދިޔަ އަހަރު ފުލުހުން ހިންގި އޮޕަރޭޝަނެއްގައި ބުރުޒުމަގުގައި ޕާކްކޮށްފައި އޮތް ޓެކްސީއަކުން އަތުލި މަސްތުވާތަކެތީގެ މައްސަލައެވެ. މިދިޔަ އަހަރުގެ ޑިސެމްބަރު މަހުގެ 12 ވަނަ ދުވަހު ހިންގި އެ އޮޕަރޭޝަނުގައި ސައިކަލެއްގެ މަޑިދަށުން ވެސް މަސްތުވާތަކެތި ހޯދިއެވެ. އެ ހުރިހާ މަސްތުވާތެކެތީގެ ޖުމްލަ ބަރުދަން 100 ކިލޯއަށްވުރެ މައްޗެވެ.
އެ މަސްތުވާތަކެތި ރާއްޖެ އެތެރެކުރުމަށްފަހު އަރުޝަދުގެ އިތުރުން އޭނާގެ ޑްރަގް ނެޓްވޯކްގައި ހިމެނޭ ކަމަށް ފުލުހުން ތުހުމަތުކުރާ މުޙައްމަދު އަކްރަމް އަބްދުލް ހަންނާން ވެސް ވަނީ ރާއްޖޭން ފުރައިގެން ގޮސްފައެވެ.