13 Oct 2022, 11:23
ޔޫއެފާ ޗެމްޕިއަންސް ލީގުގައި ވިކްޓޯރިއާ ޕްލެޒެންގެ ބަލިކޮށް ކުރިއަށް ދެ މެޗު އޮށްވާ ބަޔާން ދެވަނަ ބުރުގެ ޖާގައެއް ކަށަވަރުކޮށްފައެވެ.
ވިކްޓޯރިއާގެ ދަނޑުގައި ރޭ ކުޅުނު އެ މެޗު ބަޔާނުން ކާމިޔާބުކުރީ 4-2 ގެ ނަތީޖާއަކުންނެވެ. އެ މެޗުގައި ދެ ޓީމުގެ ފަރާތުން ގިނަ ހަލަމާތަކެއް ވަނީ ފެނިފައެވެ.
އެގޮތުން މެޗުގެ 10 ވަނަ މިނެޓުގައި ބަޔާންގެ ލިއޮން ގޮރެޓްޒްކާގެ އެހީތެރިކަމާއެކު ސާޑިއޯ މާނޭ ވަނީ ރީތީ ގޯލެއް ޖަހައި މެޗުގެ ލީޑު ނަގައިފައެވެ.
އޭގެ ހަތަރު މިނެޓު ފަހުން، ނެޗުގެ 14 ވަނަ މިނެޓުގައި ބަޔާނުން ވަނީ އިތުރު ގޯލެއްޖަހައި މެޗުގެ ލީޑު އިތުރަށް ފުޅާކޮށްފައެވެ. އެ ގޯލަކީ ކިންގްސްލޭ ކޮމަން ތަނަވަސްކުރި ފުރުސަތެއްގެ ބޭނުން ހިފައިގެން ތޯމަސް މުލާ ޖެހި ގޯލެކެވެ.
ކައިރި ކައިރީ ގިނަ ގޯލުތަކެއް ފެނުނު އެ މެޗުގައި ބަޔާންގެ ތިން ވަނަ ގޯލަކީ މެޗުގެ 25 ވަނަ މިނެޓުގައި ޖެހި ގޯލެކެވެ. އެ ގޯލު ޖެހީ މުލާ ތަނަވަސްކޮށްދިން ފުރުސަތެއްގެ ބޭނުން ހިފައިގެން ގޮރެޓްޒްކާއެވެ.
ޗެމްޕިއަންސް ލީގުގައި ވިކްޓޯރިއާ އަދި ބަޔާން ބައްދަލުކުރި މެޗުގެ ތެރެއިން --- ފޮޓޯ ޗެމްޕިއަންސް ލީގް
މެޗުގެ 35 ވަނަ މިނެޓުގައި ބަޔާންގެ ހަތަރު ވަނަ ގޯލު ފެނުނުއިރު އެ ގޯލަކީ ލިއޮރީ ސާނޭގެ އެހީތެރިކަމާއެކު ގޮރެޓްޒްކާ ޖެހި ގޯލެކެވެ.
އެ ނަތީޖާއާއެކު މެޗުގެ ފުރަތަމަ ހާފު ނިމުނު ނަމަވެސް ދެވަނަ ހާފު ފަށައިގެން ވިކްޓޯރިއާގެ ކުޅުން ރަނގަޅުކޮށް އެ ހާފުގައި އެ ޓީމުން ވަނީ ދެ ގޯލު ޖަހައިފައެެވެ.
އެގޮތުން މެޗުގެ 62 ވަނަ މިނެޓުގައި އެޑަމް ވްލޮކަނޯވާ ވިކްޓޯރިއާށް މެޗުގެ ފުރަތަމަ ގޯލު ޖަހައިދިނއިރު އެ ޓީމުން ޖެހި ދެވަނަ ގޯލަކީ މެޗުގެ 75 ވަނަ މިނެޓުގައި ލިބޯރް ހޮލިކް ތަނަވަސްކޮށްދިން ފުރުސަތެއްގެ ބޭނުން ހިފައިގެން ޖަން ކްލިމެންޓު ޖެހި ގޯލެކެވެ.
ގްރޫޕް ސީގެ ބަޔާންއާއި ވިކްޓޯރިއާގެ އިތުރުން އެ ގްރޫޕްގައި ބާސެލޯނާއާއި އިންޓަ މިލާން ވެސް ހިމެނެއެވެ. އެ ދެ ޓީމު ރޭގައި ކުރިމަތި ލިއިރު މެޗު ނިމިފައިވަނީ 3-3 ގެ ނަތީޖާއަކުން އެއްވަރުވެގެންނެވެ.
ރޭގެ މެޗުން ވިކްޓޯރިއާ ބަލިވުމާއެކު އެ ޓީމު ވަނީ ޗެމްޕިއަންސް ލީގުން ކަޓައިފައެވެ. މެޗުން މޮޅުވި ބަޔާންއަށް ގްރޫޕް ސީގެ އެއްވަނަ ލިބެނީ ކުޅުނު ހަތަރު މެޗުން މޮޅުވެ ލިބުނު 12 ޕޮއިންޓާއެކުއެވެ. އަދި ދެވަނައިގައި އިންޓަމިލާން ހަތް ޕޮއިންޓާއެކު އޮތްއިރު ތިން ވަނައިގައި ބާސެލޯނާ އޮތީ ހަތަރު ޕޮއިންޓާއެކުއެވެ.