13 Oct 2022, 09:50
ޖާންވީ ކަޕޫރަކީ އެންމެ ހުނަރުވެރި އެންމެ ރީތި މީހާއަށް ނުވިޔަސް، ފިލްމު ސެޓުގައި އެންމެ ގަދައަށް މަސައްކަތް ކުރާ މީހަކީ އޭނާ ކަމަށް ޖާންވީ ބުނެފިއެވެ.
ގުޑް ޓައިމްސް ޓީވީ ޗެނަލަށް ދިން އިންޓަވިއުއެއްގައި ބޮލީވުޑްތަރި ޖާންވީ ކަޕޫރު ބުނީ، އޭނާ އާ ބެހޭ ގޮތުން މީހުން ގެންގުޅޭ އެންމެ ގޯސް ވިސްނުމަކީ އޭނާއަކީ 'ޕްރިވެލެޖްޑް' މީހެއް ކަމަށް ބުނާ ބުނުމާއި ބުރަ މަސައްކަތް އޭނާ ނުދައްނަ ކަމަށެވެ. އަދި، އޭނާ އަކީ އެންމެ ހުނަރުވެރި އެންމެ ރީތި މީހާއަށް ނުވިޔަސް، ފިލްމު ސެޓުގައި އެންމެ ގަދައަށް މަސައްކަތް ކުރާ މީހަކީ އޭނާ ކަމަށް ޖާންވީ ބުންޏެވެ.
"އަހަރެން މިއީ ވަރަށް ފަސޭހައިން ފޫހިވާ މީހެއް. އަބަދުއަބަދު އެއް ކަމެއް ނުކުރެވޭ. ބޭނުންވަނީ ތަފާތު ކަމެއް އަބަދުވެސް ކޮށްލަން،" އިންޓަވިއުގައި ޖާންވީ ބުނެއެވެ.
ޖާންވީ އެންމެ ފަހުން ކުޅެފައިވަނީ ފިލްމު 'މިލީ' އެވެ. މި ފިލްމުގެ ޓީޒާއެއް މިހާރު ނެރެފައިވާއިރު މި ޓީޒާއިން ފެންނަނީ ޖާންވީ ފްރީޒަރެއް ތެރޭ ތާށިވެފައި އިންނަތަނެވެ. އަދި އެ ފްރީޒަރުން ނިކުންނަން އޭނާ މަސައްކަތްކުރާ މަންޒަރުވެސް ފެނެއެވެ.
މި ފިލްމުގައި ޖާންވީ އަކީ ނަރުހެކެވެ. ތުރިލާ މި ފިލްމަކީ ޖާންވީގެ ބައްޕަގެ ޕްރޮޑަކްޝަންގެ ދަށުން ނެރޭ ފިލްމެކެވެ. ފިލްމު ރިލީޒް ކުރަން ތާވަލުކޮށްފައިވަނީ އަންނަ މަހު ހަތަރެއްގައެވެ.
ޖާންވީ އަކީ ދާދި ފަހުން ބޮލީވުޑަށް ނިކުތް ތަރިއެއް ކަމުގައި ވިޔަސް، އޭނާ ވަނީ ފާހަގަކޮށްލެވޭ ގިނަ ފިލްމުތަކެއް ކުޅެ ބެލުންތެރިންގެ ލޯބި ހޯދާފައެވެ. އެގޮތުން، އޭނާގެ ޑެބިއު ފިލްމު 'ދަޅަކް' އާއި 'ގުންޖަން ސަކްސޭނާ' ފާހަގަކޮށްލެވެއެވެ.