12 Oct 2022, 12:44
ޔޫއެފާ ޗެމްޕިއަންސް ލީގުގައި ފަހު ވަގުތު އެންޓޯނިއޯ ރޫޑިގާ ޖެހި ގޯލުން ރެއާލް މެޑްރިޑް ދެވަނަ ބުރުގެ ޖާގައެއް ކަށަވަރުކޮށްފިއެވެ.
ރޭ ޝަކްތާ ޑޮނެސްކާ ދެކޮޅަށް އެ ޓީމުގެ ދަނޑުގައި ރެއާލްއިން ކުޅުނު މެޗު ނިމުނީ 1-1ގެ ނަތީޖާއަކުންނެވެ.
އެ މެޗުގައި ދެ ޓީމުގެ ފަރާތުން ވަނީ ގޯލު ޖަހާނެ ފުރުސަތުތައް ތަނަވަސްކޮށްފައެވެ. އެގޮތުން މެޗުގެ ކުރީ ކޮޅު ކަރީމް ބެންޒެމާ ފޮނުވާލި ބާރު ހަމަލާ ޝަކްތާގެ ކީޕަރު ވަނީ ދިފާއު ކޮށްފައެވެ.
މެޗުގެ 36 ވަނަ މިނެޓުގައި އޭރިއާ ބޭރުން ފެޑެރީކޯ ވެލްވާޑޭ ފޮނުވާލި ބާރު ހަމަލާގެ ހުރަހަކަށް ވީވެސް މެޗުގައި މޮޅު ކުޅުމެއް ދެއްކި ޝަކްތާގެ ޒުވާން ކީޕަރު ޓްރޫބިންއެވެ.
މެޗުގެ 46 ވަނަ މިނެޓުގައި ޝަކްތާއިން ވަނީ ގޯލުޖަހައި މެޗުގެ ލީޑު ނަގައިފައެވެ. އެ ގޯލަކީ އޮލެކްޒެންޑާ ޒުބްކޯވް ބޮލުން ޖެހި ގޯލެކެވެ.
މެޗުން މޮޅުވެ ރެއާލްގެ ކުޅުންތެރިން އުފާ ފާޅުކުރަނީ--- ފޮޓޯ/ ރެއާލް މެޑްރިޑް
އޭގެ ފަހުން މެޗުގެ 64 ވަނަ މިނެޓުގައި ޝަކްތާގެ ފޯވާޑް ބާޓްރަންޑް ޓްރައޯރޭއަށް ލިބުނު ފުރުސަތުގައި ރެއާލްގެ ކީޕަރު، ޔޫކްރޭންގެ އަންޑް ލުނިން ކައިރިން ނައްޓާފައި ގޮސް ވެސް ބޯޅަ ގޯލާ އަމާޒު ކޮށެއް ނުލެވުނެވެ. އޭނާ ފޮނުވާލި ބޯޅަ ދިޔައީ ގޯލު މަތީ ދަނޑިމަތިން ބޭރަށެވެ.
މެޗުގެ ފުރިހަމަ ވަގުތު ހަމަވެ އިތުރު ވަގުތުގެ އެންމެ ފަހު ސިކުންތު ކޮޅުގެ ތެރޭގައި ރެއާލްއިން ވަނީ ގޯލެއް ޖަހައި މެޗުގެ ނަތީޖާ ހަމަހަމަކޮށްފައެވެ. އެ ގޯލަކީ ޓޯނީ ކްރޫސް އޭރިއާ ތެރެއަށް މަތިން ވައްޓާލި ބޯޅައަށް ބޮލުން އަރައި ރުޑިގާ ޖެހި ގޯލެކެވެ.
އެ ނަތީޖާއާއެކު ގްރޫޕް އެފްގެ އެއްވަނައިގައި ރެއާލް އޮތީ 10 ޕޮއިންޓާއެކުއެވެ. އަދި ދެވަނައިގައި އޮތް ލެއިޕްޒިގްއަށް ހަ ޕޮއިންޓު ލިބިފައިވާއިރު ފަސް ޕޮއިންޓާއެކު ތިންވަނައިގައި އޮތީ ޝަކްތާއެވެ. އަދި އެއް ޕޮއިންޓާއެކު ތާވަލުގެ ފުލުގައި އޮތީ ސެލްޓިކްއެވެ.