11 Oct 2022, 08:57
އެމެރިކާގައި އަންހެނެއްގެ ގޯތި ތެރެއަށް ގެއްލުނު އަނގޮޓިއެއް ބޮޑު ތޫފާނަކަށް ފަހު ފެނިއްޖެއެވެ.
އެމެރިކާގެ ފްލޮރިޑާގައި ދިރިއުޅޭ އޭޝްލީ ގާނާގެ ކައިވެނީގެ އަނގޮޓި ގެއްލުނީ މިދިޔަ ހޯމަ ދުވަހެވެ. އެ ގެއްލުމާއެކު އޭނާގެ ދަރިންނާއި އޭނާގެ ފިރިމީހާއާ އެންމެން އެކުގައި އަނގޮޓި ހޯދުމަށް މަސައްކަތް ކުރިއެވެ. އޭޝްލީ ބުނިގޮތުގައި އަނގޮޓި ގެއްލުނީ ގޯތިތެރެއަށެވެ.
ނަމަވެސް މުޅި ގޯތިތެރެ ބަލައި ނިމުން އިރުވެސް އެ އަނގޮޓިއެއް ނުފެނުނެވެ.
"ދެން އެންމެފަހުން ގަބޫލުކުރީ އެ އަނގޮޓި ނުފެންނާނެ ކަމަށް. އެހެން ހިތަށް އަރައި ދެން އެ ހޯދުމުގެ މަސައްކަތް ހުއްޓާލީ،" އޭނާ ބުންޏެވެ.
އެ އަނގޮޓި ގެއްލުނުތާ ދެ ދުވަސް ފަހުން ބުދަ ދުވަހު ފްލޮރިޑާއަށް އެރީ "ހަރިކޭން އީއަން"އެވެ. މި ތޫފާން އެރިއިރު އާއިލާ އެއްކޮށް ތިބީ ގޭގައެވެ. ނަސީބަކުން އެ ގޭގެ އެއްވެސް މީހަކަށް އަދި ގެއަށް ވެސް މާ ބޮޑު ގެއްލުމެއް ލިބިފައެއް ނުވެއެވެ.
ތޫފާނުގެ ބާރު ދަށްވުމުން އެ އާއިލާ އެންމެން ނިކުތީ ގޯތިތެރެ ސާފުކުރުމަށެވެ. އޭރު މުޅި ގޯތި ތެރެއަށް ގަސްތަކުގެ ގޮފިގަނޑުތަކާއި ގަސްގަނޑުތައް ވެއްޓި އެ ސަރަހައްދު ވަނީ ހަލާކުވެފައެވެ. އެ ގޯތި ސާފުކުރަން އުޅުމުގެ ތެރޭގައި އަނގޮޓި ފެނުމުން އޭޝްލީއަށް ލިބުނީ ބޮޑު ޝޮކެކެވެ.
"ހީވެސް ނުކުރަން ފެންނާނެ ކަމަށް. ފިރިމީހާއަށް އަނގޮޓި ފެނުނީ. ގޭގެ ގަރާޖު ދޮރު ބޭރު ސަރަހައްދުގައި ހުރި ކުޑަ ގަސްގަނޑެއްގެ ތެރޭގައި އޮތީ،" އޭޝްލީ ކިޔައިދިނެވެ.