08 Oct 2022, 11:52
މިމަހުގެ ނިޔަލަށް ބައެއް އައިފޯންތަކުގައި، ވަޓްސްއެޕް ބޭނުން ނުކުރެވުން އެކަށީގެންވެއެވެ.
ވަޓްސްއެޕްއިން ކުރިން އިންޒާރުކޮށްފައިވާ ގޮތަށް ކަންކަންދާނަމަ މި މަސް ނިމޭއިރު އައިފޯން ބޭނުންކުރާ އެތައް މިލިއަން މީހުންނަށް ވަޓްސްއެޕްގެ ޚިދުމަތް މެދުކެނޑޭނެއެވެ.
ރިޕޯޓްތައް ބުނާގޮތުގައި މިމަހުގެ ނިޔަލަށް ވަޓްސްއެޕް ބޭނުން ނުކުރެވޭނެކަން ސީދާ ޔަޤީންކަމާ އެކު މިހާރު އެނގިފައިވަނީ އައިފޯން 5 އަދި އައިފޯން 5ސީ ބޭނުންކުރާ މީހުންނަށެވެ. އެފަދަ މީހުން މި މަހުގެ 24 ވަނަ ދުވަހުގެ ކުރިން އާ އައިފޯނަކަށް އަޕްގްރޭޑް ކުރަން ނުވަތަ ވަޓްސްއެޕް ސަޕޯޓްކުރާ ޒާތުގެ ފޯނަކަށް ބަދަލުވާންޖެހޭނެއެވެ.
ޓެކްނޮލޮޖީގެ މިފަދަ ޚަބަރުތައް ފަތުރާ އިތުބާރުހުރި ވެބްސައިޓެއްކަމަށްވާ 'ޑަބްލިޔުއޭ ބީޓާ އިންފޯ' އިން ނެރުނު ރިޕޯޓެއްގައިވާ ގޮތުން ވަޓްސްއެޕް އިން އެންޑްރޮއިޑް އަދި އައިއޯއެސްގެ ބައެއް ވާޝަންތަކުގައި މަސައްކަތް ކުރުން ވަރަށް އަވަހަށް ހުއްޓާލާނެއެވެ. އެއީ ކުރީގެ އޮޕަރޭޓިން ސިސްޓަމްތަކުގައި މަސައްކަތް ނުކުރެވިދާނެ ވަކި ފަންކްޝަނަލިޓީތަކެއް ވަޓްސްއެޕްގެ އަޕްޑޭޓް ވާޝަންގައި އެކުލެވިފައިވުމުން ކަމަށްވެސް އެރިޕޯޓްގައިވެއެވެ.
އަދި އައިއޯއެސް އާއި އެންޑްރޮއިޑްގައި ވަޓްސްއެޕް ރަންކުރުމަށް ބޭނުންވާ ފަންކްޝަން އަޕްގްރޭޑް ކުރުމަށް އެފުރުޞަތު އެ ކުންފުނިތަކަށް ދީފައިވާ ކަމަށާއި އެގޮތުން މިހާރު އައިއޯއެސް 10، އައިއޯއެސް 11، އައިފޯން 5 އަދި އައިފޯން 5ސީ އަށް ފުރުޞަތު ދިނުމަށްފަހު، އެޕްލިކޭޝަން ސަޕޯޓް ދޫކުރުމަށް ވަޓްސްއެޕް އިން ރާވަމުންދާ ކަމަށް ވެސް އެރިޕޯޓްގައި ފާހަގަ ކޮށްފައިވެއެވެ.
ވަޓްސްއެޕްގެ އެފްއޭކިއު ޕޭޖުގައި މައުލޫމާތު ދީފައިވާ ގޮތުގައި މިވަގުތު، ވަޓްސްއެޕް އިން ސަޕޯޓް ދިނުމާއެކު ބޭނުން ކުރުމަށް ލަފާދެނީ އެންޑްރޮއިޑް އޯއެސް 4.1 އާއި އޭގެ ފަހުގެ ވާޝަން ތަކުގެ ފޯނުތަކަށެވެ. އަދި ހަމަ އެހެންމެ އައިފޯނުގައި އައިއޯއެސް 12 އާއި އޭގެ ފަހުގެ ވާޝަންތަކަށާއި، ޖިއޯފޯން އަދި ޖިއޯފޯން 2 ހިމެނޭ ގޮތަށް އައިއޯއެސް 2.5.0 އާއި އޭގެ ފަހުގެ ފޯނުތައްވެސް ހިމެނެއެވެ.
އެ ޕޭޖްގައި އިތުރަށް ވަޓްސްއެޕްއިން ބުނެފައިވަނީ އެއްވެސް ޑިވައިސް އަކަށް އޮޕަރޭޓިން ސިސްޓަމް ސަޕޯޓް ދިނުން ވަޓްސްއެޕްއިން ހުއްޓާލާނަމަ، ހުއްޓާލުމުގެ ކުރިން ސީދާ އެފަދަ މީހުންނަށް އަންގާނެ ކަމަށާއި އަޕްގްރޭޑް ކުރުމަށް އެއްފަހަރަށްވުރެ ގިނަފަހަރު ހަނދާންކޮށްދޭނެކަމަށެވެ.
އެހެންކަމުން އައިއޯއެސް 10 ނުވަތަ އައިއޯއެސް 11 ބޭނުންކުރާނަމަ ވަޓްސްއެޕް ބޭނުން ކުރަމުން ގެންދިއުމަށްޓަކައި އައިއޯއެސް 12 އަށް އޮކްޓޯބަރުގެ ފަހުން އަޕްޑޭޓް ކުރަން ޖެހޭނެއެވެ. "އޭގެ މާނައަކީ އަދިވެސް އައިފޯން 5އެސް، އައިފޯން 6، އަދި އައިފޯން 6އެސްގައި ވަޓްސްއެޕް ބޭނުން ކުރެވުނަށް އައިއޯއެސް ވާޝަން އަޕްޑޭޓް ކުރަން ޖެހޭނެކަމެވެ. ހިތާމައަކީ އައިފޯން 5 އަދި އައިފޯން 5ސީ އަށް ދެން މީގެފަހުން އައިއޯއެސް 12 ބޭނުން ނުކުރެވޭތީ މިޑިވައިސްތަކަށް ދާއިމީ ގޮތެއްގައި ވަޓްސްއެޕް އަލްވަދާޢު ކިޔަންޖެހުމެވެ.
އެންމެ ފަހުގެ އައިއޯއެސް ވާޝަން އަޕްޑޭޓްސް ގެންނަން ބޭނުންނަމަ، ސެޓިންސް ޖެނެރަލް އަށް ގޮސް، ސޮފްޓްވެއާ އަޕްޑޭޓް އަށް ފިތާލާށެވެ. ދެން ލިބޭ އަޕްޑޭޓްސް ޑައުންލޯޑްކުރުމަށްފަހު އިންސްޓޯލް ކޮށްލާށެވެ.