18 Sep 2022, 19:46
އިނގިރޭސި ޕްރިމިއާ ލީގްގައި މިއަދު އާސެނަލް އާއި ބްރެންޓްފޯޑް ބައްދަލުކުރި މެޗު އާސެނަލް ކާމިޔާބުކޮށް ތާވަލްގެ އެއްވަނައިގަ އެޓީމު ހަމަޖެހިލައިފިއެވެ.
ބްރެންޓްފޯޑުގެ އަމިއްލަ ދަނޑުގައި ކުޅުނު މިމެޗު އާސެނަލް ކާމިޔާބުކުރީ 3-0 ގެ ނަތީޖާއަކުންނެވެ. މުޅި މެޗުގައި ވެސް މޮޅަށް ކުޅުނު އާސެނަލުން މެޗުގައި ޖެހި ތިން ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ.
މެޗުގައި އާސެނަލަށް ގޯލް ހުޅުވާލަދިނީ 17 ވަނަ މިނެޓްތެރޭގައި ސާކާ ތަނަވަސްކޮށްދިން ފުރުސަތެއްގައި ސަލީބާއެވެ. އާސެނަލްގެ ދެވަނަ ލަނޑު ކާމިޔާބުކޮށްދިނީ 28 ވަނަ މިނެޓް ތެރޭގައި ޒަކާ ތަނަވަސްކޮށްދިން ފުރުސަތެއްގައި ކުރިން މެންޗެސްޓާ ސިޓީގައި ހުރެފައި މި ފަހުން އާސެނަލާ ގުޅުނު ގެބްރިއަލް ޖީސަސްއެވެ. މެޗުގައި އާސެނަލްގެ އެންމެ ފަހު ލަނޑު ކާމިޔާބުކޮށްދިނީ 49 ވަނަ މިނެޓް ތެރޭގައި ސާކާއެވެ.
މެޗުގައި އާސެނަލުން ވަނީ ބްރެންޓްފޯޑުގެ ގޯލަށް އަމާޒުކޮށްގިނަ ހަމަލާތަކެއް ފޮނުވާލާފައެވެ. މެޗުގައި ބްރެންޓްފޯޑަށް ވެސް ލަނޑު ޖަހާނެ ރަނގަޅު ފުރުސަތުތައް ލިބި ވަނީ ބޭނުންނުކުރެވި ގޮސްފައެވެ.
މެޗަށްފަހު އިނގިރޭސި ޕްރިމިއާ ލީގުގެ ޕޮއިންޓް ތާވަލް މިހާރު އޮތްގޮތަށް ބަލާއިރު ތާވަލްގެ އެއްވަނައިގަ އާސެނަލް އުޅެނީ 18 ޕޮއިންޓް ހޯދައިގެންނެވެ.
މެންޗެސްޓާ ސިޓީ އާއި ޓޮޓެންހަމަށް 17 ޕޮއިންޓް ލިބިފައިވާއިރު ފައިދާ ގޯލުގެ ތަފާތުން، ތާވަލުގެ ދެވަނަ ލިބެނީ މެންޗެސްޓާ ސިޓީއަށެވެ. މިއަދުގެ މެޗުން ވަލިވި ބްރެޓްފޯޑް އުޅެނީ ނުވަ ޕޮއިންޓާއެކު ތާވަލުގެ ނުވަ ވަނައިގައެވެ.