15 Sep 2022, 10:27
ޗެމްޕިއަންސް ލީގުގައި ފަހު ދިހަ މިނިޓުގައި ޖެހި ދެ ގޯލުން އެންމެ ފަހުގެ ޗެމްޕިއަން ރެއާލް މެޑްރިޑުން ލައިޕްޒިގް ބަލިކޮށްފިއެވެ.
ރޭ ރެއާލްގެ އަމިއްލަ ދަނޑުގައި ކުޅުނު އެ މެޗު ރެއާލްއިން ކާމިޔާބުކުރީ 2-0ގެ ނަތީޖާއަކުންނެވެ.
ރޭގެ މެޗުގައި ރެއާލްއިން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް ދެ ޓީމުގެ ފަރާތުން ވެސް ގޯލު ޖަހާނެ ފުރުސަތުތައް ވަނީ ފެނިފަައެވެ.
އެގޮތުން މެޗުގެ ފަސް ވަނަ މިނިޓުގައި ލައިޕްޒިގުގެ ރިސްޓޮފާ އެންކުންކޫ އޭރިއާ ތެރެއަށް ވަދެ ފޮނުވާލި ބާރު ހަމަލާ ރެއާލްގެ ކީޕަރު ތިބައޫ ކޯޓުއާ ވަނީ މަތަކޮށްފައެވެ.
މެޗުގެ 28 ވަނަ މިނިޓުގައި ލައިޕްޒިގްއަށް ލީޑު ނަގައިދިނުމަށް ޓީމޯ ވާނާއަށް ވަނީ ހުސް ފުރުސަތެއް ލިބި ބޭކާރުވެފައެވެ. އެންކުންކޫ ތިރިތިރިން ރެއާލްގެ އޭރިއާ ތެރެއަށް ނަގައިދިން ހުރަސް ޖެހުމަށް ވާނާ އެރި ނަމަވެސް ބޯޅަ އޭނާ ފައިގައި ލައްވާލައިފައިނުވެއެވެ.
ރެއާލަށް ފުރަތަމަ ގޯލުޖަހައި ލީޑު ނަގައިދިނީ 80 ވަނަ މިނެޓުގައި ފެޑެރީކޯ ވަލްވޭޑޭއެެވެ. އެ ގޯލަކީ ވިނީޝިއުސް ޖޫނިއާގެ އެހީތެރިކަމާއެކު އޭނާ ޖެހި ގޯލެކެވެ.
މެޗުގެ އިތުރު ވަގުތުގެ ތެރޭގައި ރެއާލްއިން ވަނީ މެޗުގެ ދެވަނަ ގޯލު ޖަހައި މެޗުގެ ލީޑު ފުޅާކޮށްފައެވެ. އެ ގޯލަކީ ޓޯނީ ކްރޫސް ދިން ބޯޅައަކުން މާކޯ އަސެންސިއޯ ޖެހި ގޯލެކެވެ.
އެ މޮޅާއެކު ރެއާލް ވަނީ ގްރޫޕް އެފްގެ އެއްވަނައިގައި ދެ ޕޮއިންޓުގެ ލީޑެއް ނަގައިފައެވެ. ތާވަލުގެ އެއްވަނައިގައި ރެއާލް ހަ ޕޮއިންޓާއެކު އޮތްއިރު، ތާވަލުގެ ދެވަނައިގައި ހަތަރު ޕޮއިންޓާއެކު އޮތީ ޝަކްތަރު ޑޮނެސްކެވެ. ތިންވަނައިގައި ސެލްޓިކް އެއް ޕޮއިންޓާއެކު އޮތްއިރު މިރޭގެ މެޗުން ބަލިވި ލައިޕްޒިގް ތާވަލުގެ ފުލުގައި އޮތީ އެއްވެސް ޕޮއިންޓެއް ނުލިބިއެވެ.