12 Sep 2022, 13:58
މިދިޔަ ހުކުރު ދުވަހު މާލޭގެ ގޭންގަކުން ތިން ފުލުހަކަށް ހަމަލާދިން މައްސަލައިގައި އިތުރު މީހަކު މިއަދު ހައްޔަރުކޮށްފިއެވެ.
އެ މައްސަލައިގައި އެ ދުވަހު ވަނީ ދެ މީހުން ކުށުގެ ވެށިން ހައްޔަރުކޮށްފައެވެ. އެ މީހުން ޝަރީއަތް ނިމެންދެން ވަނީ ބަންދު ކޮށްފައެވެ.
ފުލުހުންގެ މީޑިއާ އޮފިޝަލް މިއަދު "ސަން" އަށް ވިދާޅުވީ އެ މައްސަލައިގެ ތުހުމަތަށް 20 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން މިއަދު ހައްޔަރު ކޮށްފައިވާ ކަމަށެވެ.
އެ މީހުންގެ ވަނަވަރެއް ވެސް އަދި އިތުރު މައުލޫމާތެއް ވެސް ފުލުހުން ނުދެއެވެ.
މަޖީދީމަގު ޔޫރޯ ސްޓޯރު ކައިރިން ފުލުހުންތަކަށް ހަމަލާދިން މައްސަލައިގައި ކޮމިޝަނާ އޮފް ޕޮލިސް މުޙައްމަދު ހަމީދު އެ ދުވަހު ކުރެއްވި ޓްވީޓެއްގައި ވަނީ ޑްރަގްގެ މައްސަލަތައް ހައްލުކުރުމަށް މިހާރަށް ވުރެ ފުޅާ، ހަރުދަނާ ނިޒާމެއް ގާއިމް ކުރަންޖެހޭ ކަމަށެވެ. އަދި ފުލުހުންގެ ވާޖިބު އެންމެ އެދެވޭގޮތުގައި ފުރިހަމަ ކުރުމަށް ފުލުހުންނަށް އިތުރު ހިތްވަރާއި ރައްކާތެރިކަން ބޭނުންވާކަމަށް ސީޕީގެ ޓްވީޓުގައިވެއެވެ.
ސީޕީގެ ޓްވީޓުން އެނގޭގޮތުގައި ފުލުހުންނަށް ހަމަލާދިނީ މާލޭގައި މަޝްހޫރު ގޭންގަކުންނެވެ. އަދި މިއީ ހަމަލާ ލިބުނު ތިން ފުލުހުންގެ އޮފް ޑިއުޓީ ގަޑީގައި ހިނގި ހާދިސާއެކެވެ.
އެ ތިން ފުލުހުންނަށް ވެސް އެކިވަރުގެ އަނިޔާތައް ލިބުމާ ގުޅިގެން ވަނީ ފަރުވާދީފައެވެ.