11 Sep 2022, 17:46
މާލޭގައި މިނީ ބަހުގެ ރޫޓަށް އުނދަގޫވާ ގޮތަށް ޕާކުކޮށްފައި ހުރި 538 އުޅަނދުގައި ފުލުހުން ޓްރެފިކް ވަޔަލޭޝަން ސްޓިކާ ޖަހައިފިއެވެ.
ފުލުހުން ބުނެފައިވަނީ މާލޭގައި މިނީ ބަހުގެ ޚިދުމަތް ފެށުމާއެކު ބަސް ރޫޓުތަކަށް އުނދަގޫވާ ގޮތްގޮތަށް އުޅަނދު ޕާކުކުރުން މަނާ ކޮށްފައިވާ ސަރަހައްދުތަކުގައި ޕާކު ކޮށްފައިވާ ނަމަ އެ އުޅަނދެއްގައި ވައިލޭޝަން ސްޓިކާ ޖަހައި އަދި ޓޯ ކުރަން ޖެހިއްޖެ ހާލަތުގައި އެ އުޅަނދެއް ޓޯ ކުރާނެ ކަމަށެވެ.
އެގޮތުގެ މަތިން ޕާކުކުރުން މަނާކޮށްފައިވާ ސަރަހައްދުތަކުގައި ޕާކު ކޮށްގެން މި މަހުގެ ހަ ވަނަ ދުވަހުން ފެށިގެން 10 ވަނަ ދުވަހާ ހަމައަށް 30 ސައިކަލާއި އެއް ކާރު ޓޯ ކޮށްފައިވާއިރު 538 އުޅަނދުގައި ވައިލޭޝަން ސްޓިކާ ޖަހާފައިވާ ކަމަށް ފުލުހުން މިއަދު ބުންޏެވެ.
ފުލުހުން ބުނީ މިނީ ބަސް ދުއްވާ ރޫޓްގައި ޓްރެފިކް ބާރު ބޮޑުވާ ސަރަހައްދުތަކުގައި ދިމާވާ ޓްރެފިކް މައްސަލަތައް ހައްލު ކުރުމަށް ފުލުހުން ހަރަކާތްތެރިވަމުން ދާނެ ކަމަށެވެ.
އެމްޓީސީސީން މާލޭގައި މިނީ ބަހުގެ ޚިދުމަތް ފެށުމަށް ޓަކައި އެ ބަސްތައް ދަތުރުކުރަން ހަމަޖެހިފައިވާ މަގުތަކުގެ ޓްރެފިކަށް ވަނީ ބަދަލު ގެނެސްފައެވެ.
މާލޭގައި މިނީ ބަސް ތިން ރޫޓަކަށް ދަތުރުކުރާއިރު، އެއީ އަމީނީ މަގާއި ސޯސަން މަގާއި އޯކިޑު މަގުގެ ރޫޓެވެ. މިތަނުން ކޮންމެ ރޫޓެއްގައި ވެސް 40 ބަސްހުއްޓި ވަނީ ހަދާފައެވެ.