09 Sep 2022, 16:04
އިނގިރޭސި ރާނީ ކުއީން އެލިޒިބަތު އަވަހާރަ ވުމާ ގުޅިގެން އިނގިރޭސި ޕްރިމިއާ ލީގުގެ މި ހަފުތާގެ މެޗްތައް ފަސްކޮށްފިއެވެ.
ދެންމެ ޕްރިމިއާ ލީގުން ނެރުނު ބަޔާނެއްގައި ބުނެފައިވަނީ ރާނީއަށް އިހްތިރާމްކުރުމުގެ ގޮތުން ޕްރިމިއާ ލީގުގެ މި ހަފުތާ ކުޅެން ހަމަޖެހިފައިވާ މެޗުތައް ފަސްކޮށްފައިވާ ކަމަށެވެ.
މީގެއިތުރުން މި ހަފުތާގެ މެޗުތައް ތާވަލު ކުރާނެ ވަކި ތާރީހެއް ކައިރި މުސްތަގުބަލެއްގައި އަންގާނެކަމަށް ވެސް އެ ބަޔާނުގައިވެއެވެ.
ކުއީން އެލިޒިބަތު ނިޔާޒުމާ ގުޅިގެން ޕްރިމިއާ ލީގުގެ ކުލަބުތަކުން ވަނީ ޓީމުގެ ސޯޝަލް މީޑިއާ އެކައުންޓުތަކުގެ ޕްރޮފައިލް ފޮޓޯއާއި ކަވާ ފޮޓޯ ކަޅު ކޮށްފައެވެ. އެގޮތުން މެންޗެސްޓާ ސިޓީއާއި، މެންޗެސްޓާ ޔުނައިޓެޑާއި، ލިވަޕޫލްގެ އިތުރުން ގިނަ ކުލަބުތަކަކުން ވަނީ އެގޮތަށް އަމަލުކޮށްފައެވެ. އަދި ޔުރޮޕާ ލީގުގައި ރޭ ޔުނައިޓެޑާއި ރެއާލް ސޮސިއާޑެޑް ބައްދަލުކުރި މެޗުގެ ކުރިން ދެ ޓީމުން ވަނީ ރާނީއަށް އިހުތިރާމު އަދާ ކުރުމުގެ ގޮތުން ހަމަ ހިމޭން ކަމުގެ ސުކޫތު ކޮޅެއް ވެސް ވަނީ ގެނެސްފައެވެ.
ކުއީން އެލިޒިބަތު އަވަހާރަވެފައި ވަނީ ރޭގެ ވަގުތެއްގައެވެ. އިނގިރޭސި ރަސްކަމުގެ ރަސްމީ ގަނޑުވަރު ބަކިންހަމް ޕެލަސް އިން އިއުލާނު ކުރިގޮތުގައި ރާނީ އެލިޒަބަތު 2 އަވަހާރަވީ އުމުރުފުޅުން 96 އަހަރުގައެވެ. އެލިޒަބަތު އަވަހަރަވީ ސްކޮޓްލެންޑުގައި ހުންނަ ބެލްމޯރަލް ގަނޑުވަރުގައި ހުންނަވަނިކޮށް ސިއްޙީ ހާލުކޮޅު ދެރަވެގެން ފަރުވާ ދެމުން ދަނިކޮށެވެ.
އިނގިރޭސި ރަސްކަމުގައި އެންމެ ދިގު މުއްދަތަކަށް ރަސްކަން ކުރެއްވީ އެލިޒަބަތެވެ. އެލިޒަބަތު ރާނީގެ މަގާމުގައި ހުންނަވާތާ މިހާރު ވަނީ 70 އަހަރުވެފައެވެ.