25 Aug 2022, 11:42
މިދިޔަ އަހަރަކީ ރާއްޖޭގެ ތާރީޚުގައި, އޯލެވެލް އަދި އޭލެވެލް ނަތީޖާއިން ވެސް އެންމެ ގިނަ ދަރިވަރުން ގަދަ 10ގައި ހިމެނުނު ފަހަރު ކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން ބުނީ މިދިޔަ އަހަރު އޯ ލެވެލް އިމްތިހާނު ހެދި 5،955 ދަރިވަރުންގެ ތެރެއިން 757 ދަރިވަރުން ގަދަ 10ގައި ހިމެނިފައިވާ ކަމަށެވެ. ހަމައެއާއެކު ހުރިހާ މާއްދާއަކުން އޭ ސްޓާ ހޯދައިގެން 28 ދަރިވަރަކު އޯލެވެލް ގަދަ 10ގެ އެއްވަނައިގައި ހިމެނުނުކަން އެ މިނިސްޓްރީން ފާހަގަކުރިއެވެ.
އޯލެވެލް ގަދަ 10ގައި ހިމެނުނު ދަރިވަރުންގެ ތެރެއިން 13 ދަރިވަރަކު ވަކި ވަކި މާއްދާތަކުން ދުނިޔޭގެ ގަދަ 10ގައި ހިމެނިފައިވާއިރު ހަ ދަރިވަރަކު ވަނީ ހައި އެޗީވްމެންޓް އެވޯޑް ހާސިލުކޮށްފައެވެ.
މިދިޔަ އަހަރު ޖުމުލަ 2،642 ދަރިވަރުން އޭ ލެވެލް ހަދާފައިވާއިރު 348 ދަރިވަރުން ވަނީ އޭލެވެލް ގަދަ 10ގައި ހިމެނިފައެވެ. އޭގެ ތެރެއިން ހުރިހާ މާއްދާއަކުން އޭ ސްޓާ ހޯދައި ހަ ދަރިވަރަކު ވަނީ އޭލެވެލް ގަދަ 10ގެ އެއްވަނައިން ޖާގަ ހޯދާފައެވެ.
ހަމައެއާއެކު، 41 ދަރިވަރަކު ވަނީ ވަކިވަކި މާއްދާތަކުން ދުނިޔޭގެ އެންމެ މޮޅު 10ވަނައިން އެކި ވަނަތައް ހާސިލުކޮށްފައެވެ.
"މަތީ އަރުތަވެރިންގެ އިނާމު 2020-2021" ދިނުމުގެ ރަސްމިއްޔާތު --- ފޮޓޯ/ ރައީސް އޮފީސް
އެޑިއުކޭޝަން މިނިސްޓްރީން ބުނީ މިދިޔަ އަހަރަކީ ދިވެހި ތައުލީމީ ދާއިރާގައި ފާހަގަކޮށްލެވޭ އަހަރެއް ކަމަށެވެ. އަދި އެހާ ރަނގަޅު ނަތީޖާއެއް ލިބުމަށް މަގުފަހިވީ ދަރިވަރުންނާއި ޓީޗަރުންނާއި ސުކޫލު މެނޭޖުމެންޓުތަކާއި ޕްރިންސިޕަލުންގެ ހިތްވަރާއި ބެލެނިވެރިންގެ ފަންވަރުން ކަމަށް ވެސް އެ މިނިސްޓްރީން ބުންޏެވެ.
މިދިޔަ އަހަރު ސާނަވީ އަދި މަތީ ސާނަވީ ނިންމާ އިމްތިހާނުތަކުން އެންމެ ރަނގަޅު ނަތީޖާ ހޯދި ދަރިވަރުންނަށް އިނާމާއި ހަނދާނީ ލިޔުން ދިނުމަށް ހަމަޖެހިފައިވަނީ ދެ ރެއެއްގެ މަތިންނެވެ.
އެގޮތުން ދަރުބާރުގޭގައި ރޭ ބޭއްވި ޖަލްސާގައި ބައެއް ދަރިވަރުންނަށް އިނާމާއި ހަނދާނީ ލިޔުން ހަވާލުކޮށްފައިވާއިރު ބާކީ ތިބި ދަރިވަރުންނަށް އިނާމާއި ހަނދާނީ ލިޔުން ދިނުމަށް ބާއްވާ ޖަލްސާ އޮންނާނީ މިރެއެވެ.
ރޭގެ ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ދެކަނބަލުންނާއި ސަރުކާރުގެ އިސްވެރިން ބައިވެރިވެވަޑައިގެންނެވިއިރު، މިރޭ އޮންނަ ޖަލްސާ ވެސް ޝަރަފުވެރި ކުރައްވާނީ ރައީސް ޞާލިޙެވެ.