09 Aug 2022, 21:39
މިދިޔަ ހުކުރު ދުވަހު މާލޭގައި އަންހެނަކު ރޭޕްކުރި މައްސަލައެއް ފުލުހުން ތަހުގީގުކުރަން ފަށައިފިއެވެ.
ފުލުހުން ބުނީ މާލޭގައި އަންހެނަކު ރޭޕްކުރި މައްސަލައެއް އިއްޔެ ފުލުހުންނަށް ރިޕޯޓުކޮށްފައިވާކަމަށެވެ. މި މައްސަލަ ދަނީ ތަހުގީގުކުރަމުން ކަމަށް ފުލުހުން ބުންޏެވެ. އަދި މައްސަލައިގެ އިތުރު ތަފްސީލެއް ފުލުހުން ހިއްސާކޮށްފައެއް ނުވެއެވެ.
އެ ހާދިސާގައި ކަން ހިނގިގޮތް ރޭޕްގެ ޝިކާރައަކަށްވި އަންހެން މީހާ ވަނީ ޓްވިޓާގައި ހިއްސާކޮށްފައެވެ.
އޭނާ ބުނީ ރައްޓެހިވެގެން އުޅޭ މީހާއާ އާއި އިތުރު ބަޔަކާ އެކު އެކުގައި ބައްދަލުވެލުމަށް މިދިޔަ ހުކުރު ދުވަހު ތަނަކަށް ގޮސްފައިވާނެ ކަމަށެވެ. އަދި އެތަނުގައި ތިބުމަށްފަހު ރައްޓެއްސަކު ތަނަކަށް ލުމަށް އޭނާ ރައްޓެހިވެގެން އުޅޭ މީހާ ދިޔަފަހުން އެތަނުގައި ހުރި މީހަކު އޭނާ ރޭޕްކުރީ ކަމަށް އެ އަންހެން މީހާ ކިޔައިދިނެވެ.
"ރޭޕްކުރީ އަހަރެން އެކަނި ހުއްޓައި. ރައްޓެހިވެގެން އުޅޭ މީހާ އެނބުރި އައިއިރު އެކަން ވެ ނިމިއްޖެ. ލިބުނު ޝޮކުގެ ސަބަބުން އެވަގުތު ވާހަކަދައްކަން އަހަންނަށް އުނދަގޫވެ ބަހެއް ނުބުނެވުނު،" އެ އަންހެން މީހާ ކިޔައިދިނެވެ.
ރައްޓެހިވެގެން އުޅޭ މީހާ އެނބުރި އައުމުން އޭނައަށް ކަން ހިނގިގޮތް ކިޔައިދީފައިވާނެ ކަމަށް ވެސް އޭނާ ބުންޏެވެ.
މައްސަލަ ފުލުހުންނަށް ހުށަހެޅުމުން ސުވާލުކުރީ ލައިގެން ހުރި ހެދުމުގެ ކުރުމިނާމެދުކަމަށް އޭނާ ބުންޏެވެ.