07 Aug 2022, 11:49
އަނިޔާވެރި ގޮތަކަށް ރޭ ދިވެހި ޒުވާން އަންހެން ކުއްޖަކު މަރާލި މައްސަލައިގެ ތުހުމަތަށް ހައްޔަރު ކޮށްފައިވާ ފ. ނިލަންދޫ ފިނިފެންމާގޭ އަލީ ޝާހިލް، 22، އަކީ މީގެ ކުރިން ވެސް އަނިޔާ ކުރުމާއި ހަމަނުޖެހުން ހިންގުމުގެ މާޒީއެއް އޮތް މީހެއް ކަމަށް އޭނާ ދަންނަ މީހުން ބުނެފިއެވެ.
ރޭ މަރާލާފައި ވަނީ ޏ. ފުވައްމުލަކު، ކުރި، ޝިއާއު މުޙައްމަދު ސަޢީދު، 22، އެވެ. އެނގިފައިވާ ގޮތުގައި ހަމަލާގައި ޝިއާއުގެ ހަށިގަނޑުގެ ބައިތައް ވަނީ ވަކިކޮށްލާފައެވެ. އެގޮތުން، އޭނާގެ އަތާއި، ފައި އެއްކޮށް ބުރިކޮށްލާފައިވާއިރު، ކަރަށް ވެސް ވަނީ ފުން ހަމަލާތަކެއް ދީފައެވެ.
ޝިއާއުގެ އެކުވެރިއަކު ނަން ނުޖެހުމަށް ޝަރުތުކޮށް މި ނޫހާ ވާހަކަ ދައްކަމުން ބުނީ ޝާލިހްއާއި ޝިއާއުއަކީ ދެ އެކުވެރިން ކަމަށެވެ. އެ ދެމީހުން އެކުގައި އުޅޭ ކަމަށާއި ނަމަވެސް ޖެހިގެން އުޅޭ މައްސަލައެއް ނޭނގޭ ކަމަށް އޭނާ ބުންޏެވެ.
އޭނާ ބުނި ގޮތުގައި ޝާހިލްއަކީ މީގެ ކުރިން ވެސް ގެވެށި އަނިޔާ ކުރުމުގެ ރެކޯޑް އޮތް މީހެކެވެ.
"ޝާހިލްގެ ކުރީގެ ރިލޭޝަންޝިޕްތަކުގައި ވެސް އޭނާ އަނިޔާކޮށްފައި ހުރޭ. ވަރަށް ރުޅިގަދަ މީހެއް އެއީ،" އޭނާ ކިޔައިދިނެވެ.
ސްކޭޓް ކުރުމަށް އުޅޭ ޝާހިލްއަކީ ފ. ނިލަންދޫ ފިރިހެނަކާއި ފުވައްމުލަކު އަންހެނަކަށް ލިބިފައިވާ ކުއްޖެކެވެ. އޭނާއަކީ ވަރަށް ރުޅިގަދަ މީހެއް ކަމަށް އޭނާ ދަންނަ މީހުން ބުނެއެވެ.
މަސްތުވާތަކެތި ބޭނުން ކުރާކަމުގެ ތުހުމަތު ވެސް އޭނާ ދަންނަ ބައެއް މީހުން ޝާހިލްއަށް ކުރެއެވެ. ނަމަވެސް އެ މައުލޫމާތު ކަމާބެހޭ އެއްވެސް ރަސްމީ އިދާރާއަކުން ކަށަވަރުކޮށެއް ނުދެއެވެ.
ހ.ޝީރީންވިލާގައި ހިނގި މަރުގެ ހާދިސާއާ ގުޅިގެން ހައްޔަރުކުރި އަލީ ޝާހިލް، 22 ---
މަރާލާފައިވާ ޝިއާއުއަކީ ފުވައްމުލަކު ދެ މީހެއްގެ ދަރިއެކެވެ. އޭނާގެ މަންމައަކީ ފުވައްމުލަކު ހޮސްޕިޓަލުގެ ނަރުހެކެވެ. އޭނާގެ އާއިލާގައި އަދި ތިން ކުދިން ތިބެއެވެ.
ޝިއާއުއަކީ ކުރެހުމާއި މިއުޒިކް ކުޅުމުގެ އިތުރުން މޮޑެލިންގައި ހަރަކާތްތެރިވަމުން އައި ޒުވާނެކެވެ.
ހ. ޝީރީންވިލާގައި ޝިއާއު މަރާލާފައިވާއިރު މި މައްސަލާގައި ފުލުހުން ޝާހިލް ހައްޔަރު ކުުރީ ކުށުގެވެށިންނެވެ. އެ ގެއިން އޭނާ ހައްޔަރުކޮށްގެން ފުލުހުންގެ ވެހިކަލާ ހަމައަށް ގެންގޮސްފައިވަނީ ހަޒްމަޓު ސޫޓެއް ލައްވައިގެންނެވެ. އެގެއަކީ ޝާހިލް ދިރިއުޅޭ ގެއެވެ.
މި އަނިޔާވެރި މަރާ ގުޅޭ އިތުރު މައުލޫމާތެއް ފުލުހުން ހާމަ ކޮށްފައެއްނުވެއެވެ.