24 Jul 2022, 15:47
އިސްރާއީލުން ހިފާފައިވާ ހުޅަނގު އައްސޭރީގެ ނާބުލުސްގައި އިސްރާއީލު ސިފައިން ރޭ ދަންވަރު ހިންގި އޮޕަރޭޝަނެއްގައި ފަލަސްތީނުގެ ދެމީހަކު މަރާލާފައިވާ ކަމަށް ފަލަސްތީނުގެ ހެލްތު މިނިސްޓްރީން ބުނެފިއެވެ.
ފަލަސްތީނުގެ ނޫސް އޭޖެންސީ ވަފާއިން ބުނި ގޮތުގައި، އިސްރާއީލުގެ އުދުވާނީ ބާރުތަކުން ރޭގެ ދަންވަރު ނާބްލުސްގެ އަލް ޔަސްމީނާ އަވަށަށް ވަދެގަނެ، ދެ ޒުވާނުން މަރާލީ ގެއަކަށް ބޮން އަޅައި، ބަޑީގެ ހަމަލާތައް ދީފައެވެ.
ރޭ ދަންވަރު ހިންގި އެ އޮޕަރޭޝަންގައި މަރާލާފައިވަނީ އުމުރުން 25 އަހަރުގެ މުހައްމަދު އަޒީޒީ އާއި އުމުރުން 28 އަހަރުގެ އަބްދުއްރަހްމާން ޖަމާލް ސުލެއިމާނު ސޮބްއެވެ.
މުހައްމަދު އަޒީޒީގެ މެއަށް ބަޑި ޖަހާ މަރާލާފައިވާއިރު އަބްދުއްރަހްމާން ޖަމާލް މަރާލާފައިވަނީ ބޮލަށް ބަޑިޖަހައިގެން ކަމަށް ފަލަސްތީނުގެ ހެލްތު މިނިސްޓްރީން މިއަދު ބުންޏެވެ.
އެ ހާދިސާގައި އިތުރު 12 މީހުން ޒަޚަމްވެފައިވާ ކަމަށާއި، އޭގެ ތެރެއިން އެކަކުގެ ހާލު ސީރިއަސް ކަމަށް ފަލަސްތީނުގެ ރެޑް ކްރެސެންޓުން ބުނެފައިވެއެވެ.
Israeli occupation forces raided the Old City of Nablus after midnight & attacked a house for about 4 hours.
Two young Palestinians, Mohammad Azizi, 22y, and Abboud Soboh, 29y, were reportedly shot dead.pic.twitter.com/v7wLV6PzRY— Ramy Abdu| رامي عبده (@RamAbdu)July 24, 2022
މިދިޔަ މާޗް މަހުގެ ފަހުކޮޅުން ފެށިގެން މިހާތަނަށް ފަލަސްތީނުގެ 52 މީހަކު މަރާލާފައިވެއެވެ. އޭގެ ތެރެއިން ގިނަ މީހުން މަރާލާފައިވަނީ ހުޅަނގު އައްސޭރީގެ ސަރަހައްދުތަކުގައެވެ.
އޭގެ ތެރޭގައި ޖެނީންގައި އިޒްރޭލުން ހިންގި ރެއިޑެއް ކަވަރު ކުރަމުން ދިޔަ އަލްޖަޒީރާގެ ނޫސްވެރިޔާ ޝީރީން އަބޫ އަކްލޭހް ވެސް ހިމެނެއެވެ.
ފަހަކަށް އައިސް އިސްރާއީލުގައި ދެމުންދާ ހަމަލާތައް އިތުރުވުމާ ގުޅިގެން އިސްރާއީލުގެ ސަލާމަތީ ބާރުތަކުން ވަނީ ހުޅަނގު އައްސޭރީގައި ކޮންމެ ދުވަހަކު ހަމަލާތައް ދޭން ފަށާފައެވެ.