22 Jul 2022, 20:24
ދިވެހި ޕްރެމިއާ ލީގުގައި ދަ ގްރާންޑޭ އަތުން މޮޅުވެ މާޒިޔާއިން ހަތަރު ވަނަ ފަހަރަށް ދިވެހި ޕްރެމިއާ ލީގު ކާމިޔާބުކޮށްފިއެވެ.
މިއަދު ހަވީރު ގަލޮޅު ދަނޑުގައި މާޒިޔާއިން ދަ ގްރާންޑޭ އާ ދެކޮޅަށް ކުޅުނު މެޗު އެ ޓީމުން ކާމިޔާބުކުރީ 1-0ގެ ނަތީޖާއަކުންނެވެ.
އެ މެޗު ކޮންޓްރޯލު ކޮށްގެން މޮޅަށް ކުޅެފައިވަނީ މާޒިޔާއިންނެވެ. އެ ޓީމުން ވަނީ ގޯލުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގައި ފެނުނު ހަމައެކަނި ގޯލު މެޗުގެ 41 ވަނަ މިނެޓުގައި ކާމިޔާބުކޮށްދިނީ މާޒިޔާގެ ސްޕެއިންގެ މިޑްފީލްޑަރު ޓަނާ ޑޮމިންގުއޭޒްއެވެ.
ދަ ގްރާންޑޭ އާ ދެކޮޅަށް ކުޅުނު މެޗުގައި ގޯލު ޖެހުމަށްފަހު ޓަނާ އުފާ ފާލުކުރަނީ--- ފޮޓޯ/ މާޒިޔާ
އެ ނަތީޖާއާއެކު ލީގުގައި ބާކީ ތިން މެޗު އޮއްވައި މާޒިޔާއަށް ވަނީ ލީގު ލިބިފައެވެ. އެ ޓީމަށް ލީގު ލިބިފައިވަނީ އެ ޓީމު ކުޅުނު 19 މެޗުން 54 ޕޮއިންޓު ހޯދައިގެންނެވެ.
ލީގުގެ ދެވަނައިގައި އޮތީ ކްލަބް އީގަލްސްއެވެ. އެޓީމަށް 19 މެޗު ކުޅެގެން ލިބިފައިވަނީ 46 ޕޮއިންޓެވެ.
މާޒިޔާއިން މި އަހަރުގެ ދިވެހި ޕްރެމިއާ ލީގު ކާމިޔާބުކުރުމާއެކު އެ ޓީމަށް ވަނީ ހަތަރުވަނަ ފަހަރަށް ލީގު ލިބިފައެވެ. މީގެ އިތުރުން އެ ޓީމު ވަނީ ޖެހިޖެހިގެން ތިންވަނަ ފަހަރަށް ލީގު ޗެމްޕިއަންކަން ހޯދައިފައެވެ. ވޭތުވެދިޔަ ތިން އަަހަރުގެ އިތުރުން 2016 ވަނަ އަހަރު ވެސް އެ ޓީމުން ވަނީ ޕްރެމިއާ ލީގު ކާމިޔާބުކޮށްފައެވެ.