12 Jun 2022, 21:38
މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެން އެސްޑީއޭ) ގެ ސިލްސިލާ ސެމިނާތަކުގެ ތެރެއިން ފުރަތަމަ ސެމިނާ މިއަދު ކުރިއަށް ގެންގޮސްފިއެވެ.
މި ސެމިނާ ޝަރަފްވެރިކޮށްދެއްވާފައި ވަނީ މިނިސްޓާ އޮފް ހަޔާ އެޑިއުކޭޝަން ޑރ. އިބްރާޙީމް ޙަސަންއެވެ.
މި ސެމިނާގައި މިނިސްޓަރުގެ އިތުރުން ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުން އަދި އެމްއެންއެސްޑީއޭގައި ރަޖިސްޓްރީވެފައިވާ އެސެސަރުންނާއި ޓްރެއިނިންގް ޕްރޮވައިޑަރުންގެ އިތުރުން ޓެކްނިކަލް ޕެނަލް މެމްބަރުން، ސެކްޓާ ކައުންސިލް ތަކުގެ މެމްބަރުންނާއި ޓިވެޓް ދާއިރާގެ ތަޖުރިބާކާރުން ބައިވެރިވެ ވަޑައިގެންނެވިއެވެ.
މިއީ ނޭޝަނަލް ޓްރޭޑް ޓެސްޓިން އެންޑް ސާޓިފިކޭޝަން (އެންޓީޓީސީ) އަދި ނޭޝަނަލް އެޕްރެންޓިސްޝިޕް ޕްރޮގްރާމް (ނެޕް) އާއި ގުޅޭ ސެމިނާތަކެކެވެ.
މި ސެމިނާގެ މަޤްސަދަކީ އެންޓީޓީސީ އަދި ނެޕް ހިންގާގޮތުގެ މައުލޫމާތު ކަމާ ގުޅުންހުރި ފަރާތްތަކަށް ހިއްސާ ކުރުމާއި، މި ޕްރޮގްރާމްތަކަށް އިތުރަށް މީހުން ހޭލުންތެރި ކުރުވުމެވެ.
އެމްއެންއެސްޑީއޭގެ ސިލްސިލާ ސެމިނާތައް ފެށުމުގެ ތެރެއިން -- ފޮޓޯ/ ހަޔާ އެޑިއުކޭޝަން
މި ސެމިނާ ފެށުމުގެ ގޮތުން ވާހަކަ ދައްކަވަމުން މިނިސްޓަރު ވިދާޅުވީ، ނޭޝަނަލް ޓްރޭޑް ޓެސްޓިންގްގެ މަޤްސަދަކީ ރަސްމީ ތަމްރީނަކާނުލާ ފަންނީ ހުނަރު ލިބިފައިވާ ހުނަރުވެރިންނަށް ޤައުމީ ފެންވަރުގެ ސަނަދެއް ދިނުން ކަމަށެވެ.
މީގެ އިތުރުން އެމްއެންއެސްޑީއޭ އިން ހިންގާ ނޭޝަނަލް އެޕްރެންޓިސްޝިޕް ޕްރޮގްރާމްއަކީ މަސައްކަތުގެ މާހައުލުގައި، އާމްދަނީ ހޯދުމަށް ކުރާ މަސައްކަތުގެ ތެރެއިން ރަސްމީ ތަމްރީނެއް ހަދާ ހުނަރެއް ލިބިގަނެ ޤައުމީ ފެންވަރުގައި ސަނަދެއް ލިބޭނެ ޕްރޮގްރާމެއްކަމަށް ވިދާޅުވިއެވެ.
އަދި ހަމައެއާއެކު، ރާއްޖޭގައި ޓިވެޓް ނިޒާމް ހަރުދަނާ ކުރުމުގެ މުހިންމުކަމަށް އަލި އަޅުވައިލައްވާ ވޮކޭޝަނަލް ދާއިރާ ކުރިއެރުވުމަކީ މިނިސްޓްރީން ވަރަށް ބޮޑު އަހަންމިއްޔަތުކަމެއް ދެއްވައިގެން ކުރިއަށްގެންދާ ކަމެއްކަން ވެސް ވިދާޅުވިއެވެ.