30 May 2022, 13:30
ހަތަރު ރަށެއްގައި ހޮސްޕިޓަލް އެޅުމުގެ މަސައްކަތް ހެލްތު މިނިސްޓްރީން އިންޑިއާގެ ކުންފުންޏަކާ މިއަދު ހަވާލުކޮށްފިއެވެ.
މި ޕްރޮޖެކްޓުގެ ތެރެއިން ހއ. ދިއްދުއާއި ދ. ކުޑަހުވަދުއާއި ގއ. ވިލިނގިލީގައި 50 އެނދުގެ ހޮސްޕިޓަލާއި ރ. އަލިފުށީގައި 30 އެނދުގެ ހޮސްޕިޓަލެއް އިމާރާތްކުރުމަށް ވަނީ ހަމަޖެހިފައެވެ. މިއީ ޖުމްލަ 57.2 މިލިއަން އެމެރިކާ ޑޮލަރުގެ ޕްރޮޖެކްޓެއް ކަމަށް ހެލްތު މިނިސްޓްރީން ބުންޏެވެ.
ހެލްތު މިނިސްޓްރީން މިއަދު ބޭއްވި ރަސްމިއްޔާތުގައި ހަތަރު ރަށެގެ ހޮސްޕިޓަލް އަޅަން ވެސް ހަވާލު ކޮށްފައިވަނީ ޓެލެކޮމިއުނިކޭޝަން ކޮންސަލްޓަންޓްސް އިންޑިއާ ލިމިޓެޑް (ޓީސީއައިއެލް)އާއެވެ. އެ މިނިސްޓްރީގެ ފަރާތުން މި އެއްބަސްވުމުގައި ސޮއި ކުރެއްވީ ހެލްތު މިނިސްޓްރީގެ ސްޓޭޓް މިނިސްޓަރު އަޙުމަދު އާދިލްއެވެ. އަދި ޓީސީއެލްގެ ފަރާތުން ސޮއި ކުރެއްވީ އެ ކުންފުނީގެ އެގްޒެކެޓިވް ޑިރެކްޓަރު އަތުލް ކުމާރު ޖެއިންއެވެ.
މި ހޮސްޕިޓަލްތަކުގެ އިތުރުން، އެހެން ރަށްރަށުގައި ވެސް ހޮސްޕިޓަލްތައް އިމާރާތްކޮށް ދޭނެ ބަޔަކު ހޯދަން ހެލްތު މިނިސްޓްރީން ވަނީ އިއުލާން ކޮށްފައެވެ.