26 May 2022, 21:08
ހައްޖު ކޯޕަރޭޝަނުން އާންމުންނަށް ހުޅުވާލި 100 ކޯޓާއަށް ކުރިމަތިލިމުގެ ފުރުސަތު އެ ކޯޕަރޭޝަނުން ހުޅުވާލައިފިއެވެ.
އެ ކޯޓާއަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ އަންނަ ހޯމަ ދުވަހުން ފެށިގެން ޖޫން މަހުގެ ދެވަނަ ދުވަހާހަމައަށް ކޮންމެ ދުވަހަކު މެންދުރު 1:00 އިން ހަވީރު 6:00 ޖެހުމާ ހަމައަށް އިސްލާމިކް މިނިސްޓްރީގެ ޖަލްސާކުރާ މާލަމުގައެވެ.
އީމްއިލް މެދުވެރިކޮށް ފޯމު ހުށަހަޅާނަމަ އަންނަ މަހުގެ ދެވަނަ ދުވަހުގެ ކުރިން ހައްޖު ކޯޕަރޭޝަނުގެ މެއިލްއަށް ފޮނުވުމަށް އެ ކޯޕަރޭޝަނުން ވަނީ ބުނެފައެވެ.
ހައްޖު ކޯޕަރޭޝަނުން ބުނީ އެ ކޯޓާގައި ހައްޖަށް ދާނެ މީހުން ކަނޑައެޅުމަށް ހަމަޖެހިފައިވަނީ ޝަރުތުހަމަވާ މީހުންގެ ތެރެއިން ލާ ގުރުއަތަކުން ކަމަށެވެ.
އެ ގުރުއަތުގައި 100 ޖާގައަށް މީހުން ނަގާނެއެވެ. އަދި ވެއިޓިން ކިއޫއެއްގެ ގޮތުގައި އިތުރު 25 ޖާގައަށް މީހުން ނަގާނެއެވެ.
އެ 100 ކޯޓާގައި މީހުން ހައްޖަށް ގެންދިއުމަށް ކަނޑައަޅާފައިވާ އަގަކީ 76،960.00 ރުފިޔާއެވެ.
ރާއްޖެއިން ހައްޖަށް މީހުން ގެންދިއުމުގެ ފުރުސަތު ސަރުކާރުން މިއަހަރު ދީފައިވަނީ ވެސް ހަމައެކަނި ހައްޖު ކޯޕަރޭޝަނަށެވެ.
އިސްލާމިކް މިނިސްޓްރީން މީގެ ކުރިން ބުނެފައިވަނީ ސަރުކާރުން އެހެން ނިންމީ މިއަހަރު ހައްޖަށް މީހުން ގެންދިއުމަށް އަމިއްލަ ޖަމާޢަތްތަކަށް ހުޅުވާލައިގެން، ޕްރޮޕޯސަލް ހުށަހަޅައި އިވެލުއޭޓު ކުރުމަށް ވަގުތު ނެތުމުންކަމަށެވެ.
އެހެން އަހަރުތަކާ ޚިލާފަށް މިއަހަރު ހުރިހާ ގައުމަކަށް ހައްޖަށް މީހުން ފޮނުވުމުގެ ފުރުސަތު ވެސް ލިބުނީ މަދުންނެވެ. އެގޮތުން ހައްޖަށް މީހުން ފޮނުވުމަށް މިއަހަރު ރާއްޖެއަށް ލިބުނީ 453 ކޯޓާއެވެ.