15 May 2022, 20:23
އެމްޑީޕީގެ ޗެއާޕާސަން ހޮވުމަށް ބޭއްވި އިންތިޚާބުގައި ސަރުކާރުގެ ކުންފުނިތައް ބަނގުރޫޓްވާވަރު ކޮށްފި ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަދި ޕީއެންސީގެ ނައިބު ރައީސް އާދަމް ޝަރީފް އުމަރު ވިދާޅުވެއްޖެއެވެ.
އެމްޑީޕީ ޗެއާޕާސަން ހޮވުމަށް ބޭއްވި އިންތިޚާބަށް ނުފޫޒު ފޯރުވަން ވެގެން ސަރުކާރުގެ މުދަލާއި ވަސީލަތްތައް ނަހަމަ ގޮތުގައި ބޭނުން ކުރާ ކަމަށް ތުހުމަތު ކުރާ އަޑުތަކެއް ވަނީ ފެތުރިފައެވެ.
މި ތުހުމަތުތަކުގެ ތެރޭގައި ވަޒީފާގައި ތިބި ފަރާތްތަކަށް އިންޒާރުދީ، ބިރުދެއްކުމާއި، އައު ވަޒީފާތައް އުފެއްދުމާއި ގިނަ ބަޔަކަށް އެ ވަޒީފާތައް ދިނުން ފަދަ ތުހުމަތު ހިމެނެއެވެ. ނަމަވެސް ސަރުކާރުން ވަނީ އެ ތުހުމަތުތައް ދޮގުކޮށްފައެވެ.
އެމްޑީގެ ޗެއާޕާސަން ހޮވުމަށް ބޭއްވި އިންތިޚާބަށް ފާޑު ވިދާޅުވަމުން އާދަމް ޝަރީފް ވިދާޅުވީ އިންތިޚާބުތަކުގައި މިފަދަ ކަންކަން ތަކުރާރުވާ ނަމަ، ރާއްޖެ ބަނގުރޫޓުވެދާނެ ކަމަށެވެ. މީގެ އިތުރުން އިންތިޚާބުތަކުގެ އިތުބާރު ގެއްލި، ރައްޔިތުން ވޯޓު ލާން ނުކުތުން ވެސް މަދުވެދާނެ ކަމަށް އޭނާ ވިދާޅުވިއެވެ.
"ކުންފުނިތަކުގެ އޮޑިޓެއް ވީހާވެސް އަވަހަކަށް ހަދަންޖެހޭ،" އާދަމް ޝަރީފް
އެމްޑީޕީގެ އެތެރޭގެ މި އިންތިޚާބު، ވެފައިވަނީ އެ ޕާޓީ، ވުޖޫދަށް އުފަންކުރިފަހުން ބޭއްވި އެންމެ ވާދަވެރި އިންތިޚާބަށެވެ. މި އިންތިޚާބަށް ގިނަ ބައެއްގެ ސަމާލުކަން ހުއްޓުނީ ވެސް މިހެން ވެގެންނެވެ.
މި އިންތިޚާބުގައި ޖުމުލަ 94،211 މީހުންނަށް ވޯޓު ލުމުގެ ހައްޤު ލިބިފައިވާއިރު، މާލެ އާއި އަތޮޅު ތެރޭގެ ރަށްރަށުގައި ބެހެއްޓި ވޯޓު ފޮށީގެ އަދަދަކީ 281އެވެ. މީގެ ތެރޭގައި ހިމެނެނީ މާލޭގައި ބެހެއްޓި 87 ވޯޓު ފޮއްޓާއި ރަށްރަށުގައި ބެހެއްޓި 194 ފޮއްޓެވެ.
މީގެ ތެރެއިން ގިނަ ވޯޓު ފޮށިތަކުގެ އަޣުލަބިއްޔަތު ހޯއްދެވީ ވެސް ފައްޔާޒް އިސްމާޢީލެވެ. އެގޮތުން ބައެއް ވޯޓު ފޮށިތަކުން ފައްޔާޒު، ވަނީ 90 ޕަސެންޓް، ވޯޓު، ހޯއްދަވާފައެވެ.
އެމްޑީޕީގެ ޗެއާ ޕާސަން ކުރައްވައި ބޭފުޅަކަށް ލިބޭނީ ފަސް އަހަރު ގެ ދައުރެކެވެ.