07 May 2022, 15:41
އޭޑީކޭ ހޮސްޕިޓަލުގެ ފާރުގައި "އިންޑިއާ އައުޓް" ޖެހުމުން އެކަން އެ ހޮސްޕިޓަލުން ކުށްވެރިކޮށްފިއެވެ.
އެކަމާ ގުޅިގެން "ސަން"އާ ވާހަކަދައްކަވަމުން އޭޑީކޭ ހޮސްޕިޓަލުގެ މެނޭޖިން ޑިރެކްޓަރު އަޙުމަދު އައްފާލް ވިދާޅުވީ ސިއްހީ ހިދުމަތް ދޭ ތަނެއްގައި އެފަދަ އެއްޗެއް ލިޔުމަކީ ބަލައިގަނެވޭނެ ކަމެއް ނޫންކަމަށެވެ.
"އަޅުގަނޑުމެންގެ ހޮސްޕިޓަލުގެ ފާރަކީ އެއްވެސް ލިޔުމެއް ޝިޔާރެއް އެއްވެސް އެއްޗެއް އަޅުގަނޑުމެންގެ އަމިއްލަ އެއްޗެއް ނޫނީ ބޭނުން ނުކުރާތަނެއް،" އޭނާ ވިދާޅުވިއެވެ.
މިފަދަ އަމަލުތައް ހަރުކަށި އިބާރާތުން ކުށްވެރިކުރާކަމަށް ވެސް އައްފާލް ވިދާޅުވިއެވެ.
"ކަމާބެހޭ ފަރާތްތަކަށް އަޅުގަނޑުމެން އަންގާނަން މިކަހަލަ ކަންކަން ހިނގާކަން. މިއީ އަޅުގަނޑު ގަބޫލުކުރާގޮތުގައި ވަރަށް ވިޔާނުދާ އަމަލެއް،" އޭނާ ވިދާޅުވިއެވެ.
އޭޑީކޭ ހޮސްޕިޓަލުގެ ފާރުގައި އިންޑިއާ އައުޓް ޖަހާފައި ވަނީ ކޮން ބަޔެއްކަން އަދި ޔަގީންވެފައި ނުވެއެވެ.
އިދިކޮޅު ޕީޕީއެމް އާއި ޕީއެންސީން ކުރިއަށް ގެންދާ އިންޑިއާ އައުޓް ހަރަކާތަކީ ރާއްޖޭގައި އިންޑިއާ ސިފައިން ގާއިމުވެ ތިބުމާ ދެކޮޅަށް ކުރިއަށް ގެންދާ ކެމްޕެއިނެކެވެ. އެ ހަރަކާތް ހުއްޓުވުމަށް ސަރުކާރުން ދަނީ މަސައްކަތްތަކެއް ކުރަމުންނެވެ.
މީގެ އިތުރުން، އެ ހަރަކާތަކީ ގައުމީ ސަލާމަތަށް ހުރި ނުރައްކަލެއްކަމަށް ގައުމީ ސަލާމަތާ ބެހޭ މަޖިލީހުން ވަނީ ކަނޑައަޅާފައެވެ. އަދި އެ ހަރަކާތަކީ ގާނޫނީ ގޮތުން މަނާކަމެއް ކަމަށް ވެސް ރައީސުލްޖުމްހޫރިއްޔާގެ ގަރާރަކުން ވަނީ ކަނޑައަޅުއްވާފައެވެ.
އެހެންކަމުން ގޭގޭގައި ދަމާފައިވާ އިންޑިއާ އައުޓް ބެނާތައް ނެގުމުގެ މަސައްކަތް ފުލުހުން ދަނީ ކުރަމުންނެވެ. އެގޮތުން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ގެކޮޅުގައި ދަމާފައިހުރި ބެނާ ވެސް ނަގާފައިވެއެވެ.