06 May 2022, 22:07
ރާއްޖޭގައި ހުރި ބުދުދީނުގެ އާސާރުތައް އިންޑިއާއިން މަރާމާތު ކުރަން އުޅޭ ކަމަށް ބުނެ ދެކެވޭ ވާހަކަ ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ދޮގު ކޮށްފިއެވެ.
ރާއްޖޭގައި ހުރި ބުދުދީނުގެ އާސާރުތައް އަވަށްޓެރި އިންޑިއާ އިން މަރާމާތު ކުރަން އުޅޭ ކަމުގެ ވާހަކަތަކެއް ވަނީ ބައެއް މީއާތަކުގައި ރިޕޯޓް ކޮށްފައެވެ.
މި ކަމާއި ގުޅުވައިގެން އާއްމު ރައްޔިތުންގެ ފަރާތުން ގިނަ ފާޑުކިޔުންތަކެއް ސަރުކާރަށް އަމާޒުވެފައި ވަނިކޮށް، ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވަނީ އެ ވާހަކަތައް ދޮގު ކޮށްފައެވެ.
މި ވާހަކަތައް ދޮގު ކުރަމުން ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ބުނީ ރާއްޖޭގައި ހުރި ބުދުދީނުގެ އާސާރުތައް އިންޑިއާ އިން މަރާމާތު ކުރަން އުޅޭ ކަމަށް ބުނެ ފިތުނަ އުފެދޭ ގޮތަށް ބައެއް މީޑިއާ ތަކުން ފަތުރަމުން އަންނަނީ ދޮގު ޚަބަރު ކަމަށެވެ.
އެ މަރުކަޒުން ބުނީ ނ. ލަންދޫ މާބަދިގެ ސަރަހައްދުގެ ފޮޓޯ ބޭނުންކޮށްގެން އެ ސަރަހައްދުގައި ހުރި ކަމަށް ބެލެވޭ ބުދު ދީނުގެ އާސާރުތައް އިންޑިއާއިން މަރާމާތު ކުރަން އުޅޭ ކަމަށް ދޭހަވާ ގޮތަށް ބައެއް މީޑިއާތަކުން ރިޕޯޓްކޮށްފައިވީ ނަމަވެސް، އެ ސަރަހައްދުގައި ހިންގަން ރާވާފައިވާ މަޝްރޫއުގައި ހިމެނެނީ ދާރުލްއާސާރެއް ބިނާކުރުމާއި ހެރިޓޭޖް ޕާކެއް ތަރައްޤީ ކުރުމުގެ މަސައްކަތް ކަމަށެވެ.
މި މަޝްރޫއަކީ ސަރުކާރުން އިސްނަގައިގެން ހުށަހެޅި ޕްރޮޕޯސަލަކަށް ބިނާކޮށް އިންޑިއާ ސަރުކާރުން ލިބިފައިވާ ހަތަރު މިލިއަން ރުފިޔާގެ ހިލޭ އެހީގައި ކުރިއަށްގެންދާ މަޝްރޫއެއް ކަން އެ މަރުކަޒުން ފާހަގަ ކުރިއެވެ.
މީގެ އިތުރުން އިންޑިއާ ސަރުކާރުގެ މާލީ އެހީގައި މިވަގުތު ކުރަމުން އަންނަ އެންމެ މުހިއްމު މަސައްކަތްތަކުގެ ގޮތުގައި އެ މަރުކަޒުން ފާހަގަ ކުރީ މާލޭ ހުކުރު މިސްކިތުގެ އާބާތުރަފިލުވުމުގެ މަސައްކަތާއި ތ. ދިޔަމިގިލީ ގަނޑުވަރުގެ އާބާތުރަފިލުވުމުގެ މަސައްކަތާއި ނ. ލަންދޫ މާބަދިގެ (ހަތްކަ) ނުވަތަ މާބުދުގެ ސަރަހައްދުގައި ދާރުލްއާސާރަކާއެކު ހެރިޓޭޖް ޕާކެއް ތަރައްޤީ ކުރުމުގެ މަސައްކަތް ކަމަށް ސަޤާފީ ތަރިކައާއި ބެހޭ ޤައުމީ މަރުކަޒުން ބުންޏެވެ.
އެ ދާއިރާއިން މިހާރު ކުރިއަށް ގެންދާ މުހިއްމު މަޝްރޫތަކުގެ ގޮތުގައި އެ މަރުކަޒުން ފާހަގަ ކުރީ ޖަޕާނުގެ ކިޔޯޓޯ ޔުނިވާސިޓީއާ ގުޅިގެން އާކޭޑިއާ ފަންޑުގެ މާލީ އެހީގައި ރާއްޖޭގެ މާއްދީ، ސަޤާފީ ތަރިކަ ޒަމާނީ ފެންވަރަށް ކިތާބުކޮށް، ތްރީޑީ ސްކޭންކޮށް އަދި އާސާރީ ސަރަހައްދުތައް، ޖިއޯޓެގް ކުރުމުގެ މަސައްކަތުގެ އިތުރުން ރާއްޖޭގެ ހިރިގަލު މިސްކިތްތައް ޔުނެސްކޯގެ ދުނިޔޭގެ ތަރިކައިގެ ލިސްޓުގައި ހިމެނުމަށް ޓަކައި ވޯލްޑް މޮނިއުމަންޓް ފަންޑުގެ އެހީގައި ކުރާ މަސައްކަތްތައް ހިމެނޭ ކަމަށެވެ.
އެފަދަ ދޮގު ޚަބަރު ތަކަކީ ދިވެހީންގެ ދީނީ އެއްބައިވަންތަ ކަމާއި މުޖުތައުގެ ހަމަޖެހުން ގެއްލި، ދިވެހީން ތެރޭގައި ފިތުނަފަސާދަ އުފެދި، ބައިބައިވުމަށް މަގުފަހިވާނޭ އަމަލު ތަކެއްކަން ފާހަގަ ކުރަމުން އެ މަރުކަޒުން ބުނީ ސިޔާސީ ބޭނުންމަށް ހިންގާ އެ ބާވަތުގެ އަމަލުތައް ވަގުތުން ހުއްޓާލުމަށް ގޮވައިލާ ކަމަށެވެ.