02 May 2022, 04:47
"އިންޑިއާ އައުޓް" ކެމްޕޭނުގެ ދަށުން ޕީޕީއެމް އޮފީސް ހުންނަ ހ. ހުރަފަ އިމާރާތުގައި ދެމި ދެވަނަ ބެނާ ވެސް ފުލުހުން ނަގައިފިއެވެ.
މިރޭ މެންދަމުން އަލިވެ 03:30 ހާއިރު ފުލުހުން ވަނީ ކޯޓު އަމުރެއްގެ ދަށުން އެ އިމާރާތަށް ވަދެ، ބޭރުގައި ދަމާފައި ހުރި ބެނާ ނަގާފައެވެ. އެ ކޯޓު އަމުރު ނެރެފައިވަނީ މިރޭ 23:30ގައެވެ.
ކްރިމިނަލް ކޯޓުން ނެރުނު އެ އަމުރުގައި ވަނީ "އެ ބެނާގައި އިންޑިއާގެ ގައުމީ ދިދައިގެ ކުލަތަކާއި ނިޝާން ރަމްޒުވާ ގޮތަށް ލިޔެފައިވުމުންނާއި" އެފަދަ ބެނާގައި "އައުޓް" ޖަހާފައި ވުމުން ޚާރިޖީ ގުޅުންތަކަށް ނޭދެވޭ އަސަރުކުރާނެ ކަމަށް ބެލެވޭ ކަމަށެވެ.
ހ. ހުރަފަ ގޭގައި ހުރި "އިންޑިއާ އައުޓް" ބެނާ ފުލުހުން ނެގުމުގެ ތެރެއިން --- ސަން ފޮޓޯ
މީގެ އިތުރުން، "އިންޑިއާ އައުޓް" ކެމްޕޭނުގައި މީގެ ކުރިން ދެމި ބެނާތައް ނެގުމަށް ކޯޓުން އަމުރު ނެރުނު ފަހުން، "އިންޑިއާ"ގެ ނަމުގެ އަކުރުތައް ބަދަލުކޮށްގެން ބެނާ ދަމާ، އެ މަންޒަރު ސިފަވާ ފަދަ ގްރެފިޓީ ބޭނުން ކުރަނީ ކޯޓު އަމުރަށް ގޮންޖަހައި، ނުސީދާ ގޮތުން އެ ޝިއާރު ފާޅުކުރުމަށް ކަމަށް ބެލެވެން އެބަ އޮތަ ކަމަށް ވެސް އެ އަމުރުގައި ވެއެވެ.
މި މަހުގެ 21 ވަނަ ދުވަހު ވެސް ފުލުހުން ވަނީ ޕީޕީއެމް އޮފީހާއި، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ އަމިއްލަ ގެކޮޅުގައި ނަގާފައި ހުރި "އިންޑިއާ އައުޓް" ބެނާ ނަގާފައެވެ. ހަމަ އެ ދުވަހު ރައީސުލްޖުމްހޫރިއްޔާގެ ގަރާރަކުން ވަނީ "އިންޑިއާ އައުޓް" ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމުގައި ކަނޑައަޅުއްވާފައެވެ.
ހ.ހުރަފަ ގޭގައި ހުރި "އިންޑިއާ އައުޓް" ބެނާ --- ސަން ފޮޓޯ
ނަމަވެސް، އިދިކޮޅު ފަރާތްތަކުން ވަނީ އެ ގަރާރުގެ ގާނޫނީ ސައްހަ ކަމާމެދު ސުވާލު އުފައްދާ، އެ މައްސަލަ ސިވިލް ކޯޓަށް ހުށަހަޅާފައެވެ. އޭގެ ފަހުން މާލޭގެ އެކި ސަރައްދުގައި "އިންޑިއާ"ގެ އަކުރުތައް ބަދަލުކޮށްގެން ދެމި ބެނާތައް ވެސް ފުލުހުން ވަނީ ނަގާފައެވެ.
ހ. ހުރަފަ އިމާރާތުގައި ދެވަނަ ބެނާއެއް ނެގީ މާލޭގެ އެކި ގޭގޭގެ ފާރުތަކުގައި "އިންޑިއާ އައުޓް" ދޭހަވާ ފަދަ ގްރެފިޓީ ކުރަހަން ފަށާފައި ވަނިކޮށެވެ. އިދިކޮޅު ފަރާތްތަކުން ބުނަނީ އެ ހަރަކާތް ކުރިއަށް އޮތް ތަނުގައި އިތުރަށް ވަރުގަދަ ވާނެ ކަމަށެވެ.