30 Apr 2022, 20:10
އެލައިޑް އިންޝޫރެންސުގެ އިސްލާމިކް ވިންޑޯ، އަޔާދީ ތަކާފުލް އިން 2019ވަނަ އަހަރުގެ ސާޕްލަސްގެ ގޮތުގައި 1.5 މިލިއަނަށް ވުރެ ގިނަ ރުފިޔާ ބެހުމަށް ނިންމައިފިއެވެ.
އެކުންފުނިން ބުނީ 2019ވަނަ އަހަރުގެ ސާޕްލަސް ލިބުމަށް ޝަރުތު ހަމަވާ 2389 ބައިވެރިން އެބަ ތިބި ކަމަށެވެ. އޭގެ ތެރޭގައި ހިމެނެނީ ސާޕްލަސް ދޭ ޚިދުމަތެއް 2019 ވަނަ އަހަރުގެ ތެރޭ ބޭނުންކޮށް، ބަދަލަށް އެދިފައިނުވާ ފަރާތްތަކެވެ.
ސާޕްލަސް ދޭ ތަކާފުލް ޕެކޭޖްތަކުގެ ތެރޭގައި ހިމެނެނީ:
ހޯމް
- ކޮންޓްރެކްޓާސް އޯލް ރިސްކު
- ފަޔާ
- މޮޓޯ
- ޓްރެވަލް
- ހައްޖު އުމްރާ
- ކާގޯ
އަޔާދީން ބުނީ ޝަރުތުހަމަވާ ފަރާތްތަކުން އެދިލެއްވުމުން ސާޕްލަސް ފައިސާ ބޭންކު އެކައުންޓަށް ޖަމާވާނެ ކަމަށެވެ. އެކަމަށް އެދުމުގެ ސުންގަޑިއަކީ އަންނަ ޖޫން މަހުގެ 26ވަނަ ދުވަހެވެ.
ސާޕްލަސްއަށް އެދި ފޯމް ހުށަނާޅާ ފަރާތްތަކުގެ ފައިސާ ކަނޑައެޅިފައިވާ އުސޫލުގެ ދަށުން އަނބުރާ ފަންޑަށް ޖަމާކުރެވޭނެ ކަމަށް ވެސް އެ ކުންފުނިން ބުނެއެވެ.
އެލައިޑްގެ "1600 އޭޖެންޓް" މެދުވެރިކޮށް ވައިބާ އަދި ފޭސްބުކް މެސެންޖާއިން ސާޕްލަސް ލިބޭ ފަރާތެއްކަން ޔަގީން ކުރެވޭނެކަމަށް އަޔާދީން ބުންޏެވެ. އަދި، އެ ކުންފުނީގެ ހޮޓްލައިން، 1600އަށް ގުޅައިގެންނާއި، ހ.އޯކިޑް، އަމީރު އަހުމަދު ހިނގުމުގައި ހުންނަ އެ ކުންފުނީގެ އޮފީހުން ވެސް އެ މައުލޫމާތު ސާފުކުރެވޭނެއެވެ.