20 Apr 2022, 11:28
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ގެކޮޅުގައި ދަމައިފައިވާ "އިންޑިއާ އައުޓް" ޖެހި ބޮޑު ބެނާ، ފުލުހުން ގޮސް "ވަގުތުން ވަގުތަށް" ނަގަން ޖެހޭ ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އިންޑިއާގެ މުސްލިމުންނަށް ކުރަމުން އަންނަ އަނިޔާތަކާ ދެކޮޅަށް ބަސް ބުނަން ގޮވާލައި، ނައިފަރު ދާއިރާގެ މެންބަރު އަހުމަދު ޝިޔާމް ވަނީ މަޖިލީހަށް މިއަދު ކުއްލި މައްސަލައެއް ހުށަހަޅުއްވައިފައެވެ. އެހެންނަމަވެސް މި މައްސަލައަކީ ކުއްލި މައްސަލައަކަށް ނުވާ ކަމަށް ކަނޑައަޅައި މަޖިލީހުގައި އެޖެންޑާ ކޮށްފައެއް ނުވެއެވެ.
މި މައްސަލައާ ގުޅިގެން މަޖިލީހުގެ ރިޔާސަތުގައި އިންނެވި ރައީސް ނަޝީދު ވިދާޅުވީ އެ މައްސަލަ "ކުއްލި ނުވުމުގެ" އިތުރުން ވެސް އިތުރު މައްސަލަތަކެއް ހުރިކަމަށެވެ.
ނަޝީދު ވިދާޅުވީ ދެކުނު އޭޝިއާގައި އެއް ނަސްލުތަކާއި ދީންތައް، އެއް މަސްލަހަތަކަށް އެނބުރުމަށް މަސައްކަތް ކުރާތާ އެތައް ސަތޭކަ އަހަރެއް ވެފައިވާ ކަމަށެވެ. އެހެންކަމުން މަޖިލީހުގައި އެކަމާ މެދު ބަހުސް ކުރުމުގެ ބޭނުމެއް ނެތް ކަމަށް ނަޝީދު ވިދާޅުވިއެވެ.
"500 އަހަރުވެއްޖެ، މިއަދު ކުއްލިއަކަށް އަޅުގަނޑުމެންނަށް މި އަވައްޓެރި ގައުމުތަކުގެ ދާޚިލީ ކަންކަމާ ގުޅޭ ގޮތުން މި މަޖިލީހުގައި ބަހުސް ކުރުމުގެ ފުރުސަތު އަޅުގަނޑަށް ދޭކަށް ނުފެނޭ،" ނަޝީދު ވިދާޅުވިއެވެ.
ހަމައެހެންމެ އެ މައްސަލައަށް ބަހުސް ކުރުމަށް މަޖިލީހުގައި ފުރުސަތު ދިނުމަކީ މަޖިލީހުގައި ގަވައިދުތަކާއި ޑިމޮކްރެޓިކް އުސޫލުތައް ވެސް ތަން ދޭނެ ކަމެއް ނޫން ކަމަށް ވެސް ނަޝީދު ވިދާޅުވިއެވެ.
މީގެ އިތުރުން ނަޝީދު ވިދާޅުވީ މާލޭގެ ބޮޑެތި އިމާރާތްތަކުގައި އަވައްޓެރި ގައުމުތަކާ ގުޅޭ ގޮތުން ބަދުބަސް ބުނެ، ބެނާތައް ހަރުކުރުމަކީ ގާނޫނުލް އުގޫބާތާ ހިލާފު ކަމެއް ކަމަށެވެ.
"[އެއީ] އާންމު މަސްލަހަތާ ހިލާފު ކަމެއް، އެ ތަކެތި އަޅުގަނޑު ދެކޭ ގޮތުގައި ވަގުތުން ވަގުތަށް ފުލުހުން ނަގާން ޖެހޭނެ،" ރައީސް ޔާމީންގެ ގެކޮޅުގައި ދަމައިފައިވާ ބެނާތަކަށް އިޝާރާތް ކުރައްވައި ނަޝީދު ވިދާޅުވިއެވެ.
އިދިކޮޅު ޕީޕީއެމް/ޕީއެންސީ ކޯލިޝަނުން ވަނީ "އިންޑިއާ އައުޓް" ޖެހި ބޮޑެތި ބެނާތަކެއް އެ ޕާޓީގެ އޮފީހުގައްޔާއި ޔާމީންގެ ގެކޮޅު, ހ. ދޫވެހީގައި ދަމައިފައެވެ.