19 Apr 2022, 14:35
"އުއްތަމަ ފަނޑިޔާރުގެ ކަރުބުޑުގައި ރަހަލާވަރު ކުރަން ޖެހޭ" ކަމަށް ވިދާޅުވެ، ވައިބާ ގުރޫޕަކަށް ފޮނުވި މެސެޖަކާ ގުޅިގެން، ޑްރަގް ކޯޓުގެ ގާޒީ މުހައްމަދު ނައީމްގެ ސުލޫކީ މައްސަލައެއް، ޖުޑީޝަލް ސާވިސް ކޮމިޝަން (ޖޭއެސްސީ)ން ބަލަން ފަށައިފިއެވެ.
ޖޭއެސްސީން މިއަދު ބުނީ ސޯޝަލް މީޑިއާ ގްރޫޕެއްގައި ފޮނުވާފައިވާ މެސެޖެއްގައި، ފަނޑިޔާރެއްގެ ސުލޫކާ ހިލާފުވާފަދަ ބަސްތަކެއް ބޭނުންކޮށްފައިވާތީ، އެ މައްސަލަ ބަލަން ފަށައިފައިވަނީ ކޮމިޝަނުންގެ އިސްނަގައިގެން ބަލާ ޝަކުވާއެއްގެ ގޮތުގައި ކަމަށެވެ.
މި މައްސަލަ ތަހުގީގު ކުރުމަށް މިހާރު ތަހުގީގު ކޮމިޓީއެއް އެކުލަވައިލައިފައިވާ ކަމަށް ވެސް ޖޭއެސްސީން ބުނެފައިވެއެވެ.
ގިނަ އަދަދެއްގެ ފަނޑިޔާރުން ތިއްބަވާ ގުރޫޕެއްގައި، ގާޒީ ނައީމު ވަނީ ފަނޑިޔާރުންނަށް ފްލެޓު ނުދޭ މައްސަލައިގައި އިހުތިޖާޖަށް ނިކުތުމަށް ގޮވާލާ، އެ މައްސަލައިގައި އުއްތަމަ ފަނޑިޔާރުގެ ކަރުބުޑުގައި ރަހަލާވަރު ކުރަން ޖެހޭ ކަމަށް ވިދާޅުވެފައެވެ.
"އުއްތަމަ ފަނޑިޔާރާއި ޖުޑިޝަރީގެ ވެރިންގެ ކަރު ބުޑުގައި ރަހަލާ ވަރުގެ ކަންތައް ކޮށްގެން މެނުވީ މި ކަންކަން ރަނގަޅެއް ނުވާނެ،" ގުރޫޕަށް ފޮނުވި މެސެޖުގައި ނައީމް ވިދާޅުވެފައިވެއެވެ.
މީގެ ކުރިން ވެސް ޖޭއެސްސީން ވަނީ ގާޒީ ނައީމްގެ މައްސަލައެއް ބަލައިފައެވެ. އެގޮތުން 2011 ވަނަ އަހަރު ކުރީގެ ބަންޑާރަ ނައިބު ޑރ. އަހުމަދު އަލީ ސަވާދަށް ރުހުން ނުލިބެނީސް ދައުލަތް ހިމެނޭ މައްސަލައެއް ނުބައްލަވަން ސިވިލް ކޯޓުގެ ގާޒީ މުހައްމަދު ނައީމް ނިންމެވި މައްސަލައިގައި، އަދަބެއްގެ ގޮތުން ގާޒީ ނައީމް ވަނީ ސިވިލް ކޯޓުން ޖުވެނައިލް ކޯޓަށް ބަދަލުކުރައްވައިފައެވެ.