14 Apr 2022, 13:19
މިއަހަރުގެ ރަމަޟާން މަހުގެ ފުރަތަމަ 11 ދުވަހުގެ ފިތުރު ޒަކާތުގެ ގޮތުގައި މާލެއިން އަށް ލައްކަ ރުފިޔާ ލިބިއްޖެކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ބުނީ ޖުމްލަ 19،523 މީހުން ޒަކާތް ދައްކާފައިވާއިރު މިނިސްޓްރީގައި ބަހައްޓާފައިވާ ކައުންޓަރުތަކަށް ޒަކާތް ދައްކާފައިވަނީ 4،956 މީހުންް ކަމަށެވެ. އަދި އޮންލައިންކޮށް ޒަކާތް ދެއްކީ 14،567 މީހުން ކަމަށެވެ.
މިދިޔަ އަހަރުގެ ރަމަޟާން މަހުގެ ފުރަތަމަ 11 ދުވަހުގެ ތެރޭގައި ޒަކާތުގެ ގޮތުގައި 899،031 ރުފިޔާ ލިބުނުކަން ފާހަގަކޮށް މިނިސްޓްރީން ބުނީ މި ރޯދަ މަހު އެ މުއްދަތުގައި ލިބިފައި ވަނީ 878،646 ރުފިޔާ ކަމަށެވެ.
ފިތުރު ޒަކާތް ބަލައިގަތުން އޮންލައިންކޮށްވެސް ހަމަޖެހިފައިވާއިރު، ދިރާގުޕޭ، އެސްއެމްއެސް، އުރީދޫ އެމްފައިސާ، މޯލްޑިވްސް އިސްލާމިކް ބޭންކުގެ ފައިސާ މޮބައިލް، ބޭންކް އޮފް މޯލްޑިވްސް ޕޯޓަލް، ފަހިޕޭ މެދުވެރިކޮށް ރަމަޟާންމަހުގެ 28 ވަނަ (އެޕްރީލް 29) ދުވަހާ ހަމައަށް ފިތުރު ޒަކާތް ދެއްކޭނެ އިންތިޒާމް ވަނީ ހަމަޖައްސާފައެވެ.
މިނިސްޓްރީން ޒަކާތް ބަލއިގަންނަމުންދަނީ ކޮންމެ ދުވަހެއްގެ ހެނދުނު 10:00އަކުން މެންދުރު 1:00އަށެވެ.
މިނިސްޓްރީގެ ހޯލުންވެސް ޒަކާތް ބަލައިގަތުމުގެ އިންތިޒާމު ހަމަަޖައްސާފައި ވަނީ އުމުރުން ދުވަސްވެފައިވާ މީހުންނަށާއި އޮންލައިންކޮށް ޒަކާތްދެއްކުމަށް އަހުލުވެރިނޫން މީހުންނަށެވެ.
ކައުންޓަރުތަކުން ޒަކާތް ބަލައިގަތުން ރަމަޟާންމަހުގެ އެންމެފަހު ދުވަހުގެ އިރުއޮއްސި 6:00 ޖެހުމާ ހަމައަށް ކުރިއަށް ދާނެއެވެ.
ފިތުރު ޒަކާތް ބަހަން ހަމަޖެހިފައިވަނީ ރަމަޟާން މަހުގެ 19 ވަނަ ދުވަހުން ފެށިގެންނެވެ. ފިތުރު ޒަކާތް ދޭނީ ފަގީރުންގެ ލިސްޓުގައިވާ މީހުންނަށެވެ. މި އަހަރުގެ ފަގީރުންގެ ލިސްޓުގައި 8،984 މީހުން ހިމެނެއެވެ.