10 Apr 2022, 05:35
ޕާކިސްތާނުގެ ބޮޑުވަޒީރު އިމްރާން ޚާންގެ އިތުބާރު ނެތް ކަމަށް އެގައުމުގެ ގާނޫނު ހަދާ މަޖިލީހުން ފާސްކޮށް، އޭނާ މަގާމުން ދުރުކޮށްފިއެވެ.
އިމްރާން ޚާންގެ އިތުބާރު އޮތްތޯ ބެލުމަށް ޕާކިސްތާނުގެ ގާނޫނު ހަދާ މަޖިލީހުގެ ތިރީގޭގައި ރޭ ނެގި ވޯޓުގައި 342 މެންބަރުންގެ ތެރެއިން ދެބައިކުޅަ އެއްބަޔަށް ވުރެ ގިނަ މެންބަރުން ވޯޓު ދިނީ އޭނާގެ އިތުބާރު ނެތް ކަމަށެވެ. އެއީ 174 މެންބަރުންނެވެ.
އެހެންކަމުން އިމްރާން ޚާން މަގާމުން ދުރުކުރަން ވަނީ ފާސްވެފައެވެ. އަދި އެގައުމަށް އާ ބޮޑުވަޒީރަކު ހޮވުމަށް އަންނަ ހޯމަ ދުވަހު ޕާލިމެންޓު ބައްދަލުވުމެއް ބާއްވާނެއެވެ.
ރޭ އެ ވޯޓު ނެގުމުގެ ކުރިން، ޕާކިސްތާނުގެ ގާނޫނޫ ހަދާ މަޖިލީހުގެ ތިރީގޭގެ ރައީސް އަސަދު ގައިސަރު ވަނީ މަގާމުން އިސްތިއުފާ ދެއްވާފައެވެ. އޭނާއަކީ އިމްރާން ޚާންގެ ޕާޓީގެ މެންބަރެކެވެ.
ހަމައެއާއެކު ވޯޓުގެ ކުރިން އެ ޕާޓީގެ މެންބަރުން ވަނީ މަޖިލީހުގެ ތަޅުމުން ބޭރަށް ނުކުމެވަޑައިގެންފައެވެ.
އިމްރާން ޚާންގެ އިތުބާރު އޮތްތޯ ބެލުމަށް ޕާކިސްތާނުގެ އިދިކޮޅު ޕާޓީތަކުން ފުރަތަމަ ވޯޓު ނަގަން މަސައްކަތް ކުރީ މިދިޔަ އާދިއްތަ ދުވަހުއެވެ. ނަމަވެސް އެ ވޯޓުގެ ފަހަތުގައި ބޭރުގެ ބަޔެއްގެ ނުފޫޒު އޮތް ކަމަށް ވިދާޅުވެ، ޕާލިމެންޓުގެ ނައިބު ރައީސް އަދި ވެރިކަން ކުރާ ޕާޓީގެ މެންބަރެއް ކަމަށްވާ ގާސިމް ޚާން ސުރީ އެ ވޯޓު ބާއްވަން ދެކޮޅު ހެއްދެވިއެވެ.
އެއަށްފަހު އިމްރާން ޚާންގެ އެންގެވުމަށް އެގައުމުގެ ޕާލިމެންޓު އުވާލިއެވެ.
ޕާކިސްތާނުގެ އިދިކޮޅު ޕާޓީތަކުން އެ މައްސަލަ ސުޕްރީމް ކޯޓަށް ހުށަހެޅުމުން މިދިޔަ ބުރާސްފަތި ދުވަހު އެ ކޯޓުން ނިންމީ، ޕާލިމެންޓު އުވާލީ ގާނޫނާ ހިލާފަށް ކަމަށެވެ.
އިމްރާން ޚާނަށް އިތުބާރު އޮތްތޯ ބެލުމުގެ މައްސަލަ ޕާލަމެންޓަށް ހުށަހަޅާފައިވަނީ ކުރީގެ ބޮޑުވަޒީރު ނަވާޒް ޝަރީފްގެ ޕާޓީ، ޕާކިސްތާން މުސްލިމް ލީގް ނަވާޒް (ޕީއެމްއެލް-އެން)އާއި ޖަމްއިއްޔަތު އުލަމާއުލްއިސްލާމް ޕާޓީންނެވެ. އެ ވޯޓަށް، ކުރީގެ ބޮޑުވަޒީރު ބޭނަޒީރު ބުއްޓޫގެ ޕާކިސްތާން ޕީޕަލްސް ޕާޓީ (ޕީޕީޕީ)އިން ވެސް ވަނީ ތާއިދުކޮށްފައެވެ.
މީގެ އިތުރުން، ވެރިކަން ކުރާ ކޯލިޝަނުގައި ހިމެނޭ ބައެއް ޕާޓީތަކާއި އިމްރާން ޚާންގެ ޕާޓީގެ ބައެއް މެންބަރުން ވެސް ވަނީ ފާއިތުވި ދުވަސްތަކުގައި އިދިކޮޅާ ގުޅިފައެވެ.
އެ ޕާޓީތަކުން ވަނީ އިމްރާން ޚާންގެ ސަރުކާރުން ކޮރަޕްޝަނުގެ އަމަލުތައް ހިންގާ ކަމަށާއި ގައުމުގެ އިޤްތިޞާދު ނަގަހައްޓަން ސަރުކާރު ނުކުޅެދިފައިވާ ކަމަށް ބުނެފައެވެ.
މީގެ ކުރިން އިމްރާން ޚާން ވަނީ، އިދިކޮޅުން އޭނާގެ ވެރިކަން ވައްޓާލަން މަސައްކަތް ކުރަނީ އެމެރިކާއާ ގުޅިގެން ކަމަށް ތުހުމަތުކުރައްވާފައެވެ. އަދި އެމެރިކާއިން އެ މަސައްކަތުގައި ބައިވެރި ވަނީ އޭނާގެ ސަރުކާރުން މިނިވަން ޚާރިޖީ ސިޔާސަތެއް ގެންގުޅޭތީ ކަމަށް ވެސް އޭނާ ވިދާޅުވިއެވެ.
ޕާކިސްތާނުގެ ތާރީޚުގައި އެއްވެސް ބޮޑުވަޒީރަކަށް އަދި ވެރިކަމުގެ ދައުރު ފުރިހަމަ ކުރެވިފައި ނުވެއެވެ. ނަމަވެސް އިމްރާން ޚާނަކީ އެގައުމުގައި އިތުބާރު ނެތް ކަމުގެ ވޯޓަކުން މަގާމުން ދުރުކުރި ފުރަތަމަ ބޮޑުވަޒީރެވެ.