07 Apr 2022, 16:16
ގަލޮޅު ރަސްމީ ދަނޑު ތަޅާލައި އާ ދަނޑެއް ތަރައްގީ ކުރުމަށް ނިންމުމުގެ ކުރިން ރައްޔިތުންނާ މަޝްވަރާ ކޮށްފައި ނުވާތީ، ޔޫތު މިނިސްޓަރު އަޙްމަދު މަޚްލޫފާ ސުވާލުކުރަން މަޖިލީހަށް ހާޒިރުކުރަން ހުށަހަޅައިފިއެވެ.
މިނިސްޓަރާ ސުވާލުކުރުމަށް ހުށަހަޅައިފައި ވަނީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމެވެ.
މީކާއިލް ވިދާޅުވީ އިންޑިއާގެ ލައިން އޮފް ކުރެޑިޓްގެ ދަށުން، ގަލޮޅުދަނޑު އާ ދަނޑެއްގެ ގޮތުގައި ތަރައްގީ ކުރުމަށް ނިންމާ އެކަން އިއުލާނު ކޮށްފައިވާއިރު، މާލޭގެ ރައްޔިތުންނާއި އެ ސަރަހައްދުގައި ދިރިއުޅޭ ގަލޮޅުގެ ރައްޔިތުންނާ އެ ކަމާ ގުޅޭ އެއްވެސް މަޝްވާރާއެއް ކޮށްފައިނުވާ ކަމުގެ ޝަކުވާ ލިބެމުން އަންނަ ކަމަށެވެ.
އެހެންކަމުން މިކަމުގައި އާންމުންނާ މަޝްވަރާ ކުރުމަށް ގަސްތު ކުރައްވަނީ ކޮން އިރަކުތޯ މީކާއީލް ވަނީ ސުވާލު ކުރައްވައިފައެވެ.
ހަމައެހެންމެ މާލޭ މެދުގައި މި ދަނޑު ތަރައްގީ ކުރުމުގެ ބަދަލުގައި މި ދަނޑު ހުޅުމާލެއަށް ބަދަލުކޮށް މާލޭގެ ޖާގައިގެ ދަތިކަމަށް ލުޔެއް ގެނައުމުގެ ވިސްނުން މިނިސްޓްރީން ގެންގުޅޭތޯ މިނިސްޓަރާ ސުވާލުކުރުމަށް ވެސް ހުށަހަޅައިފައިވެއެވެ.
އިންޑިއާގެ އެލްއޯސީގެ ދަށުން ތަރައްގީކުރާ މި ދަނޑުގެ ޖުމުލަ ޚަރަދުގެ ގޮތުގައި ގާތް ގަނޑަކަށް 18 މިލިއަން ޑޮލަރު ހަރަދުވާނެ ކަމަށް ބެލެވޭއިރު، އާ ދަނޑަކީ ގާތް ގަނޑަކަށް 11،500 މީހުންގެ ޖާގައިގެ ދަނޑަކަށް ވާނެ ކަމަށް ޔޫތު މިނިސްޓްރީން ވަނީ ބުނެފައެވެ.
އެހެންނަމަވެސް އާ ދަނޑުގެ ކުރެހުންތައް ހިއްސާކުރުމާއެކު، އާންމުން ވަނީ އެ ކަމަށް ވަރަށް ބޮޑަށް ފާޑުކިޔައިފައެވެ. މިގޮތުން ކާރޫބާރޫބޮޑު މަޖީދީމަގަށް ވާ ގޮތަށް އަނެއްކާ ވެސް ދަނޑު ތަރައްގީކުރުމަކީ އެންމެ ރަނގަޅު ގޮތްތޯ ސުވާލުކޮށް ގިނަ ބަޔަކު ވަނީ ދަނޑު ހުޅުމާލެއަށް ބަދަލުކުރަން ގޮވައިލައިފައެވެ.