05 Apr 2022, 10:05
ނެދަލޭންޑްގެ ގައުމީ ޓީމުގެ ކޯޗު ލުއިސް ވެން ހާލް ޕްރޮސްޓޭޓް ކެންސަރަށް ފަރުވާ ހޯދަމުންދާކަން އޭނާ ހާމަކޮށްފިއެވެ.
އޭނާ މިކަން ހާމަކޮށްފައިވަނީ އާރުޓީއެލް ޓީވީއަށް ދިން އިންޓަވިއުއެއްގައެވެ. އެ އިންޓަވިއުގައި އުމުރުން 70 އަހަރުގެ ވެން ހާލް ބުނެފައިވަނީ ކީމޯތެރަޕީގެ 25 ރައުންޑް މިހާތަނަށް އޭނާ ނަގާފައިވާ ކަމަށެވެ. އޭނާ ހާމަކޮށްފައިވާ ގޮތުގައި ގައުމީ ޓީމުގެ ކޭމްޕް ކުރިއަށް ދިޔަ އިރުވެސް އޭނާ ކީމޯ ނަގާފައިވެއެވެ. ނަމަވެސް، އެކަން ޓީމުގެ އެއްވެސް ކުޅުންތެރިޔަކަށް ނޭނގޭނެއެވެ.
"ޓީމުގެ ކުޅުންތެރިން ހީކުރަނީ އަހަރެން މިހުރީ ވަރަށް ރަނގަޅު ސިއްހަތެއްގައި ކަމަށް. އެކަމަކު އެޔެއް ނޫން ޙަޤީޤަތަކީ. މިހާރު މިއީ އަހަރެންގެ ދިރިއުޅުމުގެ ބައެއް. ހަޔާތުގައި ވަރަށް ގިނަ ތަޖުރިބާތަކެއް ކުރެވިއްޖެ. މިއީ ވެސް އެފަދަ ކަމެއް،" ވެން ހާލް ބުންޏެވެ.
އޭނާ ގައުމީ ޓީމުގެ ކޯޗުކަމާ ހަވާލުވީ 2020 ވަނަ އަހަރުގެ ޔޫރޯއަށް ފަހުއެވެ. މުބާރާތުގެ ދެ ވަނަ ބުރުން ނެދަލޭންޑްސް ކެޓުމާ ގުޅިގެން އޭރު ޓީމުގެ ކޯޗަކަށް ހުރި ފްރޭންކް ޑެ ބޯ ވަނޫ މަގާމުން ވަކިކޮށްފައެވެ. މިއީ ވެން ހާލް ނެދަލޭންޑްސްގެ ގައުމީ ޓީމުގެ ކޯޗުކަމާ ހަވާލުވި ތިން ވަނަ ފަހަރެވެ.
މިއަހަރު ގަތަރުގައި އޮންނަ ވޯލްޑް ކަޕްގައި ނެދަލޭންޑްސް ކުޅޭނެއެވެ. މުބާރާތުގައި ނެދަލޭންޑްސް ހިމެނެނީ މުބާރާތް ބާއްވާ ގައުމު ގަތަރު، އެކުއެޑޯ އަދި ސެނެގާލްއާއެކު ގްރޫޕް އޭގައެވެ.
ވޯލްޑް ކަޕްގައި ވެސް ނެދަލޭންޑްސްއަށް އިރުޝާދު ދޭނީ ވެން ހާލްއެވެ. ކެންސަރަށް ފަރުވާ ހޯދާކަން އޭނާ ހާމަކުރުމާ ގުޅިގެން އޭނާގެ ކުރީގެ ކްލަބްތަކުގެ އިތުރުން، ކޯޗުންނާއި ކުޅުންތެރިން ދަނީ ހިތްވަރުގެ މެސެޖު ދެމުންނެވެ.
ވެން ހާލް ވަނީ އޭނާގެ ކެރިއަރުގައި އަޔަކްސް، މެންޗެސްޓާ ޔުނައިޓެޑް އަދި ބާސެލޯނާގެ އިތުރުން ބަޔާންއަށް ވެސް ކޯޗުކަން ކޮށްދީފައެެވެ.