02 Apr 2022, 14:32
މިއަދު އަޅުގަނޑު މި ހިއްސާކޮށްލަނީ ކީރިތި ގުރުއާނުގެ މޫރިތި އާޔަތްތަކުގެ ތެރެއިން އިބްރަތް ހާސިލްވާ އާޔަތެކެވެ. މި އާތަޔް ބިނާވެފައި ވަނީ ހަލާލުގޮތުގަ މުދާ ބޭނުންކުރުމާ ބެހޭގޮތުންނެވެ.
ކީރިިތި ޤުރުއާނުގައި ﷲ ވަހީކުރައްވާފައިވާ ބަސްފުޅެއްގެ މާނައިގައި ވެއެވެ.
"އޭ އީމާންވެއްޖެ މީސްތަކުންނޭ! ތިޔަބައި މީހުން އެއްބައެއް އަނެއްބައެއްގެ މެދުގައި ހަލާލު ރަނގަޅު ގޮތުގައި މެނުވީ މުދާ ބޭނުންނުކުރާށެވެ. އަދި ދެފަރާތުގެ ރުހުމުގެ މައްޗަށް އޮންނަ ވިޔަފާރިއަކުން މެނުވީ، ހަލާލު ގޮތުގަ މެނުވީ ތިޔަބައި މީހުން އެއްބަޔަކު އަނެއްބައެއްގެ މެދުގައި މުދާ ބޭނުން ނުކުރާށެވެ،"
މި އާޔަތަކީ ވަރަށް މުހިންމު ފިލާވަޅެއް ލިބިގެންދާ އާޔަތެެކެވެ. އަޅުގަނޑުމެން ދުނިޔެއަށް ފޮނުއްވާފައިވާ މަގުސަދަކީ ﷲ ސުބުހާނަހޫ ވަތަޢާލާއަށް އަޅުކަން ކުރުމަށް ޓަކައި ކަމަށް ވާއިރު، ﷲ ތަޢާލާ އިންސާނުން އުޅެންވީ މަގު ވަނީ ދައްކަވައިފައެވެ. އެގޮތުން ދުނިޔޭގައި އުޅޭއިރު މީހުންގެ މުދާ ފައިސާ ނޫނީ ދުނިޔޭގައި އުޅުމަށް ރިޒުޤު ހޯދާނެ މުހިންމު މަގު ވަނީ އިސްލާމް ދީނުގައި އަޅުގަނޑުމެންނަށް ވަނީ އަންގަވައި ދެއްވާފައެވެ.
ﷲ ސުބްހާނަހޫ ވަތަޢާލާ އެކަލާންގެ ރަސޫލުބޭކަލުންނަށް ވެސް ހަލާލު ގޮތުގައި ނޫނީ މުދާ ބޭނުންނުކުރުމަށް އަންގަވާފައިވެއެވެ. ހަމައެގޮތަށް އެކަލާންގެއަށް އީމާންވި މުއުމިނުންނަށް ވެސް އެކަލާންގެ އަންގަވާފައިވަނީ ހެޔޮ، ރަނގަޅުގޮތުގައި މުދާ ބޭނުންކުރުމަށެވެ.
އިސްލާމްދީނުގައި މުދާ ބޭނުންކުރާނެ ގޮތްތައް އަންގަވާފައިވާއިރު މިކަންކަން ހޯދައި ދެނެގަތުމަކީ އަޅުގަނޑުމެން މުސްލިމުންގެ ހައިސިއްޔަތުން ވަރަށް މުހިންމު ކަމެކެވެ. ސަބަބަކީ މުދާ ބާާޠިލުގޮތުގައި ބޭނުންކުރެވޭ ކަމަށް ވާނަމަ އެކަމުގެ ސަބަބުން އެމީހާގެ ދުޢާ ﷲ ސުބްހާނަހޫ ވަތަޢާލާ ގަބޫލުނުކުރައްވާނެތީއެވެ.
ކީރިތި ރަސޫލާގެ ހަދީޘްކުރަށްވާފައިވާ ބަސްފުޅެއްގެ މާނައިގައިވެއެވެ. މީހަކު ދިގު ދަތުރެއްކޮށްފަ އައިސް އެ ވަރުބަލިކަމުގަ އޭނަގެ ގަޔަށް ހިރަފުސް ބުރާފައިވާ ހާލު އޭނަގެ ދެއަތްމައްޗަށް ނަގާ ދުޢާ ދަންނަވާއިރު އޭނަ ކަނީ ހަރާމް ތަކެތިކަމަށް، އޭނަ ބޮނީ ހަރާން ތަކެތިކަމަށް، އޭނަ ލާ އަންނައުނަކީ ހަރާމް ތަކެތިކަމަށް ވާނަމަ، އޭނަގެ ދުޢާ ﷲ ތަޢާލާ އިޖާބަކުރައްވާނީ ކިހިނަކުންތޯ އެ ހަދީޘްފުޅުގައި ސުވާލު ކުރައްވައިފައިވެއެވެ.
އެހެންވީމަ އަޅުގަނޑުމެން ދުނިޔޭގައި އުޅޭއިރު ރަނގަޅު ހަލާލުގޮތުގައި މުދާ ބޭނުންކުރެވޭތޯ ބަލަންޖެހެއެވެ. މިގޮތުން މުދާ ބޭނުން ކުރާއިރުގައި އިސްލާމްދީނުގައި ތަފާތު އާޔަތްތަކުން މުދާ ބާޠިލްގޮތުގައި ބޭނުންކުރުމަކީ ކޮބާކަން އަންގަވާފައިވެއެެވެ. އޭގެތެރޭގައި ބާޠިލްގޮތުގައި މުދާ ބޭނުންކުރެވޭ ކަންތައްތަކަށް ބަލާއިރު، ރިޝްވަތު ދިނުމާއި، ރިޝްވަތު ހިފުން ހިމެނެއެވެ. އަދި ރިބާއާއި، މީހުނަށް މަކަރުހަދާ އޮޅުވާލައިގެން މީހުންގެ ފައިސާ ބޭނުންކުރުމަކީ ވެސް ހަރާމްކަމެއްގެގޮތުގައި އަންގަވާފައިވާ ކަންތައްތަކެވެ.
ހަމައެގޮތުން ރަސޫލާގެ ސުންނަތުގައި، މަކަރުހަދާ އޮޅުވާލާ މީހުނަކީ މި އުންމަތުގެ މީހުންގެތެރޭގައި ވާބައެއް ނޫންކަމަށް އަންގަވައިފައިވެއެވެ. މިފަދަ އެތައް ދަލީލުތަކަކުން އަޅުގަނޑުމެނަށް އެނގޭކަމަކީ އިސްލާމްދީނުގައި މުދާ ބޭނުންކުރަން ޖެހެނީ ހަލާލު ގޮތުގައިކަމެވެ.
އެ ހަލާލުގޮގައި ހޯދާ އެއްޗެއް މެނުވީ ﷲ ސުބުހާނަހޫ ވަތަޢާލާ އަހަރެމެން މުސްލިމުގެ ކިބައިން ގަބޫލުކުރެވިގެނެއް ނުވެއެވެ. އަދި ހަރާމް ގޮތުގައި ފައިސާ ބޭނުން ކުރުމަކީ މީހާއަށް ނަރަކަ ހައްގުވާ ކަމެއްކަމަށް ވެސް ކީރިތި ގުރުއާނާއި ރަސޫލާގެ ސުންނަތުން އެނގިގެންދެއެވެ. އެހެންވީމައި މިފަދަ ޢިބުރަތްތެރި ފިލާވަޅުތަކުން އަޅުގަނޑުމެން ދިރިއުޅުމުގައި ޢިބްރަތް ހާޞިލްކޮށް މި ގޮތުގެ މަތީގައި ހަލާލު ފައިސާ ބޭނުންކުރާ ބައެއްގެ ގޮތުގައި އަޅުގަނޑުމެންގެ ދިރިއުޅުން ބައްޓަން ކުރަންޖެހެއެވެ. އަދި ކުރިން އެފަދަ ނޭދެވޭ ޢަމަލެއް ކުރެވިފައިވާ ނަމަވެސް ތަޢުބާވެ ﷲގެ މަގަށް ރުޖޫޢަވުމަށް އަޅުގަނޑު ނަސޭހަތްތެރިވަމެވެ.