30 Mar 2022, 12:13
ދެ ޖިންސު ދެމެދުގައި ތަފާތުކުރުންތައް ނުގެންގުޅުމަށް ހުރިހާ ކުޅިވަރު އެސޯސިއޭޝަންތަކަކަށް އަންގާފައިވާނޭ ކަމަށް ޔޫތު މިނިސްޓަރު އަޙްމަދު މަހްލޫފް ވިދާޅުވެއްޖެއެވެ.
ޔޫތު މިނިސްޓްރީގެ މަސައްކަތްތަކާ ގުޅޭގޮތުން ސުވާލުކުރުމަށް މިއަދު މިނިސްޓަރު މަހްލޫފް ވަނީ ރައްޔިތުންގެ މަޖިލީހުގެ ޖަލްސާއަށް ހާޒިރުކޮށްފައެވެ.
ސުވާލުކުރުމަށް ލިބުނު ފުރުސަތުގައި ކާށިދޫ ދާއިރާގެ މެންބަރު ޢަބްދުﷲ ޖާބިރު ވަނީ އެ މިނިސްޓްރީން ވޯޓާ ސޮޕޯޓްސްއަށް މާބޮޑު އިސްކަމެއް ނުދެނީ ކީއްވެގެންތޯ ސުވާލުކުރައްވާފަވެ.
މެންބަރުގެ ސުވާލަށް ޖަވާބުދެއްވަމުން މިނިސްޓަރު މަހުލޫފް ވިދާޅުވީ ޖާބިރުގެ ވާހަކައަށް ފުރިހަމައަށް ތާއިދުކުރެވެން ނެތްކަމަށެވެ. އެގޮތުން، ގައުމީ ކުޅިވަރު އެސޯސިއޭޝަންތަކަށް ކުރާ ޚަރަދުތަކާއި ކުޅިވަރުތައް ކުރިއެރުވުމަށް ކުރާ މަސައްކަތްތައް މިހާރު ކުރިއަށް ވުރެ މާ ބޮޑަށްވެސް އިތުރުވާނެކަމަށް މިނިސްޓަރު މަހުލޫފް ވިދާޅުވިއެވެ.
މީގެ އިތުރުން މިއަހަރު ބޮޑީ ބޯޑިން އެސޯސިއޭޝަން (އެމްބީބީ)އިން ބޭއްވި "ބުރުނު ޝިކާރަ" ބޮޑީ ބޯޑިން މުބާރާތުގައި އަންހެން ކެޓަގަރީއަށާއި ފިރިހެން ކެޓަގަރީއަށް 5000 ރުފިޔާގެ ތަފާތަކާއެކު އިނާމު ދިންކަން މަހުލޫފު ފާހަގަކުރެއްވިއެވެ. އަދި އެގޮތަށް ދެ ޖިންސުގެ މެދުގައި ތަފާތުކުރުންތައް ގެންގުޅުމަކީ ކަންބޮޑުވާ ކަމެއް ކަމަށް މިނިސްޓަރު ވިދާޅުވިއެވެ.
"މިފަހަރުގެ ބޮޑީ ބޯޑިން މުބާރާތުގަ އަންހެން އަދި ފިރިހެން ކެޓަގަރީއަށް 5000އެއްހާ ރުފިޔާގެ ތަފާތަކާއެކީ އިނާމު ދީފައި ހުރުމީ ވަރަށް ބޮޑު ކަންބޮޑުވުމެއް. އަޅުގަނޑުމެން މީގެ ދެ އަހަރު ކުރިން ހުރިހާ ކުޅިވަރު އެސޯސިއޭޝަންތަކަށް އަންގާފަވާނެ އެއްވެސް ތަފާތުކުރުމެއް ނުގެންގުޅެން،" މަހުލޫފް ވިދާޅުވިއެވެ.
ބޮޑީ ބޯޑިން މުބާރާތުގެ ފިރިހެން އެއްވަނަ އެތުލީޓަށް 10،000 ރުފިޔާ ދީފައިވެއެވެ. އަންހެން އެއްވަނަ އެތްލީޓަށް ދީފައިވަނީ 5000 ރުފިޔާއެވެ.