25 Mar 2022, 17:33
މި އަހަރު ނިމުމުގެ ކުރިން ރާއްޖޭގައި ގާއިމްވެފައި ތިބި އިންޑިއާގެ އަސްކަރީ ސިފައިން ރާއްޖެއިން ބާލަން ޖެހޭ ކަމަށް އިދިކޮޅު ލީޑަރު އަދި ކުރީގެ ރައީސް ޢަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
އިންޑިއާގެ ސިފައިން ރާއްޖޭގައި ގާއިމްވެ ތިބުމާ ދެކޮޅަށް އިދިކޮޅު ލީޑަރު، ރައީސް ޔާމީން އިސްވެ ހުންނަވައި ހިންގަވާ "އިންޑިއާ އައުޓް" ކެމްޕެއިނު ރާއްޖޭގެ އެކި ހިސާބުތަކުގައި ކުރިއަށް ގެންދާއިރު، މިއަދު މާލޭގައި ވެސް މިފަދަ ހަރަކާތެއް މިހާރު ދަނީ ކުރިއަށް ގެންދަމުންނެވެ.
މި އެއްވުމާ ގުޅިގެން ރައީސް ޔާމީން ރޮއިޓާސްއަށް ދިން އިންޓަވިއުއެއްގައި ވިދާޅުވީ ރާއްޖެއާއި އިންޑިއާ ކަނޑުގެ ސަރަހައްދުގައި އެއްވެސް ގައުމެއްގެ އަސްކަރިއްޔާ ތިބުމަކީ ރުހޭ ކަމެއް ނޫން ކަމަށެވެ.
އިންޑިއާގެ އަސްކަރީ ބާރު ރާއްޖޭގައި ޗައިނާ އާއި އެމެރިކާ ފަދަ ބާރުގަދަ ގައުމުތަކުގެ އަސްކަރިއްޔާއިން ވެސް ތިބުމަށް މަސައްކަތް ކުރާނެ ކަމަށް ޔާމީން ވިދާޅުވިއެވެ.
ޔާމީން އިތުރަށް ވިދާޅުވީ އިންޑިއާ އަސްކަރިއްޔާ ރާއްޖޭގައި ގާއިމްވެ ތިބުމުގެ ސަބަބުން ގެއްލުން ވަނީ ހަމައެކަނި ގައުމީ ސަލާމަތަށް ނޫން ކަމަށާއި އެއީ ރާއްޖޭގައި ތަރައްގީއާއި ކުރިއެރުމަށް ވެސް އެޅޭ ހުރަހެއް ކަމަށެވެ.
"މިއަހަރު ނިމުމުގެ ކުރިން އިންޑިއާގެ އަސްކަރިއްޔާ ބޭރު ކުރުމަކީ ކޮންމެހެން ވެސް ކުރަން ޖެހޭ ކަމެއް. އަޅުގަނޑުމެންގެ އަމިއްލަ ގައުމުގައި ބޭރު ގައުމެއްގެ ބާރު އޮތުމަކީ އަޅުގަނޑުމެން ރުހޭ ކަމެއް ނޫން،" ޔާމީން ވިދާޅުވިއެވެ.
ދިވެހި ސަރުކާރުން އިންޑިއާ އާއެކު ހަދައިފައިވާ އެއްބަސްވުންތައް ހާމަކުރުމަށް ގޮވާލާ ގޮވާލުން ޔާމީން ވަނީ ތަކުރާރުކުރައްވައިފައެވެ.
"އިންޑިއާ އައުޓް" އަށް ގޮވާލާ، "ނޭވާ ހޮޅިއަށް" ނަމުގައި މާލޭގައި މިއަދު ކުރިއަށް ގެންދާ އެއްވުން ފަށައިފައިވަނީ އެއްވުން ކުރިއަށް ނުގެންދެވޭނެ ކަމަށް ފުލުހުން ބުނެފައި ވަނިކޮށެވެ.