18 Mar 2022, 19:15
އޮޑިޓް ރިޕޯޓާއި އަހަރީ ރިޕޯޓް ހުށަހަޅާފައިވާތީ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ސަރުކާރު ކޯލިޝަނުގައި ހިމެނޭ ޖުމްހޫރީ ޕާޓީ (ޖޭޕީ) އަށް ފައިސާ ދޫކުރުމަށް އިލެކްޝަން ކޮމިޝަން (އީސީ) އިން ފިނޭންސް މިނިސްޓްރީއަށް އަންގައިފިއެވެ.
އީސީގެ ނައިބް ރައީސް އިސްމާޢީލް ހަބީބް މިއަދު 'ސަން' އަށް ވިދާޅުވީ, ޝަރުތު ހަމަވާ ހަތަރު ޕާޓީގެ ތެރެއިން ޕީޕީއެމާއި ޖޭޕީއަށް ފައިސާ ދޫކުރުމަށް މިދިޔަ ހަފްތާގައި ފިނޭންސް މިނިސްޓްރީއަށް ހުށަހަޅާފައިވާ ކަމަށެވެ.
ސިޔާސީ ޕާޓީތަކަށް ދައުލަތުން ދޭ ފައިސާ, ހަތަރު ޕާޓީއަކަށް ދިނުމަށް ނިންމައިފައިވާ ކަމަށް ހަބީބް ވަނީ ވިދާޅުވެފައެވެ. އެއީ ޕީޕީއެމާއި ޖޭޕީގެ އިތުރުން ވެރިކަން ކުރާ ކޯލިޝަނުގެ މައި ޕާޓީ އެމްޑީޕީ އަދި ކޯލިޝަން ޕާޓްނަރު އަދާލަތު ޕާޓީއެވެ.
އެ ދެ ޕާޓީއަށް ފައިސާ ދޫކުރުމަށް ފިނޭންސްއަށް ފޮނުވާނީ, ރިޕޯޓްތައް ހުށަހެޅުމުން ކަމަށް ހަބީބް ވިދާޅުވިއެވެ.
މެންބަރުންގެ އަދަދަށް ބަލައި އެންމެ ގިނަ ފައިސާ ދިނުމަށް ހަމަޖެހިފައިވަނީ ވެރިކަންކުރާ މައި ޕާޓީ އެމްޑީޕީއަށެވެ. އެގޮތުން އެ ޕާޓީއަށް 15.02 މިލިއަން ރުފިޔާ ދިނުމަށް އެ ކޮމިޝަނުން ވަނީ ނިންމާފައެވެ. އެ ޕާޓީގެ މެންބަރުންގެ އަދަދަކީ 54,782 އެވެ.
މެންބަރުންގެ އަދަދަށް ބަލާއިރު 34,368 މެންބަރުންނާ އެކު ދެވަނައަށް އެންމެ ގިނަ ފައިސާ ދިނުމަށް ހަމަޖެހިފައިވަނީ ޕީޕީއެމްއަށެވެ. އެ ޕާޓީއަށް ދިނުމަށް ނިންމާފައި ވަނީ 9.4 މިލިއަން ރުފިޔާއެވެ.
ތިންވަނައަށް އެންމެ މެންބަރުން ގިނަ ޕާޓީކަމަށްވާ ޖުމްހޫރީ ޕާޓީއަށް ދޭން ނިންމާފައިވަނީ 5.5 މިލިއަން ރުފިޔާއެވެ. އެޕާޓީގެ މެންބަރުންގެ އަދަދު 20،139އަށް އަރައެވެ.
އަދާލަތު ޕާޓީއަށް ދިނުމަށް ނިންމާފައިވަނީ 2.9 މިލިއަން ރުފިޔާއެވެ. އެ ޕާޓީގައި ތިބީ 10،589 މެންބަރުންނެވެ.