07 Mar 2022, 14:48
ރަޝިއާގެ އަސްކަރީ ލަޝްކަރު ޔުކްރޭންގެ ވެރިރަށް ކިޔޭވް އާ ތިންފަރާތަކުން ގާތްވަމުންދާއިރު ކުރޫޒް މިސައިލާއި ބޮޑުބަޑިއާއި އެނޫންވެސް ބަރު ހަތިޔާރުން ރަޝިއާ ސިފައިން ކިޔޭވް އަށް ވަރުގަދަ ހަމަލާތަކެއް ދެމުން ގެންދާކަމަށް ޔުކްރޭނުން ވަނީ ބުނެފައެވެ.
ޔުކްރޭން ސިފައިންގެ ޗީފް އޮފް ސްޓާފްގެ އޮފީހުން ނެރުނު ބަޔާނެއް ބުނާގޮތުން ރަޝިއާ ސިފައިން ރޭ ދަންވަރުވަނީ ކިޔޭވްގެ ހުޅަނގު އުރުތުގައި އޮންނަ އަވަށެއްކަމަށްވާ އިރްބީން ހިފާފައެވެ. އިރުބީންގައި ރަޝިއާ ސިފައިން ފައި ހަރުކުރަން މަސައްކަތް ކުރާކަމަށާ ނަމަވެސް ލޮޖިސްޓިކް ސަޕޯޓް ދަށްކަމުންނާއި ޔުކްރޭން ސިފައިންގެ ރައްދު ހަމަލާތައް ވަރުގަދަކަމުން އެރަށުގައި ފައިހަރުކުރަން ރަޝިއާ ސިފައިން ބޮޑު އަގެއް ދައްކަންޖެހޭނެ ކަމަށް ޔުކްރޭނުން ބުނެއެވެ.
އަސްކަރީ މުހައްލިލުން ވިދާޅުވާގޮތުގައި ރަޝިއާ ސިފައިންނަށް ކުރިމަތިވެފައިވާ މައިގަނޑު މައްސަލައަކީ ޔުކްރޭންގެ ބިމުގެ ސަރަހައްދު ބޮޑުވެފައި ހިފަންޖެހޭ ސަރަހައްދުތައް ގިނަވުމެވެ. ނުވަތަ އަމާޒުތައް ގިނަވުމެވެ. ޔުކްރޭންގެ ވެރިރަށް ކިޔޭވްއަކީވެސް ގާތްގަނޑަކަށް 800 އަކަ ކިލޯމީޓަރުގެ ބޮޑު ސިޓީއެކެވެ. އަދި ރަޝިއާ މިހާރު ކޮންޓްރޯލްކުރާ ޔުކްރޭންގެ އިރު ދެކުނުގެ ސަރަހައްދުތަކާއި އިރުމަތީ ސަރަހައްދުތަކާ ދެމެދުވެސް 700 ވަރަކަށް ކިލޯމީޓަރުގެ ދިގު ރާސްތާއެއް ވާއިރު މިސަރަހައްދުތަކާއި ކިޔޭވް އާ ދެމެދުވެސް އެހާ ދުރުރާސްތާއެއް އޮވެއެވެ.
ރަޝިއާ ސިފައިން ޔުކްރޭންގެ ތެރެއަށް ވަންނަމުންދާ ގޮތް
ޔުކްރޭނަށް ވަދެގަނެގެން އުޅޭ ރަޝިއާ ގެ ލަޝްކަރުގެ އަދަދު ޔުކްރޭން ފަދަ ބިމުގެ ގޮތުން ބޮޑު ގައުމެއްގެ ގިނަ ސިޓީތަކެއް އެއްވަގުތެއްގައި ކޮންޓްރޯލް ކުރެވޭވަރަށްވުރެ ކުޑަކަމަށް އަސްކަރީ ތަޖްރިބާކާރުން ވިދާޅުވެއެވެ.
އަނެއްކޮޅުން އެމެރިކާ ހިމެނޭގޮތަށް ނޭޓޯގެ 14 ގައުމަކުން ޕޮލެންޑާއި ރޫމޭނިއާގެ ސަރަހައްދީ ރޮނގު ހުރަސްކޮށް ޔުކްރޭނަށް ހުއްޓުމެއްނެތި ހަތިޔާރު އެތެރެކުރަމުން ގެންދިޔުމަކީވެސް ރަޝިއާ ސިފައިންނަށް ކުރިމަތިވާ ބޮޑު ގޮންޖެހުމެކެވެ. ޕޮލެންޑާއި ރޫމޭނިއާގެ ސަރަހައްދީ ރޮނގު ހުރަސްކޮށް ނޭޓޯގެ ގައުމުތަކުން ޔުކްރޭނަށް ހަތިޔާރު އެތެރެކުރަމުންގެންދަނީ އެދެގައުމަށް އެތެރެވާ ޔުކްރޭން ގެ ރެފިއުޖީން ބޭނުންކުރާ ސަރަހައްދުތަކުން ކަން މުހައްލިލުން ފާހަގަ ކުރައްވައެވެ.
ޔުކްރޭން ސިފައިން ބުނާގޮތުން ރަޝިއާ ސިފައިންގެ އަމާޒެއްކަމަށް ފެންނަނީ ކިޔޭވް ވަށާލުމެވެ. އެކަމުގެ ބޭނުމަކީ ސަރަހައްދީ ރޮނގު ހުރަސްކޮށް ޔުކްރޭނަށް އެތެރެކުރާ ނޭޓޯގެ ހަތިޔާރުތައް ކިޔޭވް އަށް ވެއްދުން ހުއްޓުވުމެވެ. މިކަން ހުއްޓުވިގެން ނޫނީ ކިޔޭވްއަށް ވެދެގަތުމަށާ އަދި ވަނުމަށްފަހު ކިޔޭވް ފަދަ ބޮޑު ސިޓީއެއް ކޮންޓްރޯލްކުރަން ރަޝިއާ ސިފައިންނަށް އުނދަނގޫވާނެއެވެ.
ރަޝިއާގެ ހަަމަލާތަކުގައި ޔުކްރޭނަށް ލިބިފައިވާ ގެއްލުންތައް
ފާއިތުވި ދިހަ ވަރަކަށް ދުވަހުގެ ތެރޭގައި އެމެރިކާއިން އެކަނިވެސް 500 މިލިޔަން ޑޮލަރުގެ ހަތިޔާރު ޔޫކްރެއިނަށް ފޯރުކޮށްދިންކަމަށް އެމެރިކާ ސަރުކާރުވަނީ އެއްބަސްވެފައެވެ. އޭގެކުރިންވެސް އެތަށް ސަތޭކަމިލިޔަން ޑޮލަރެއްގެ ހަތިޔާރުވަނީ ފޯރުކޮށްދީފައެވެ. އެމެރިކާގެ ސީ 70 ގެ މިލީޓްރީ ޓްރާންޕޯޓް މަތިންދާބޯޓުގެ 14 ބޯޓު އިއްޔެވެސް ހަތިޔާރާއެކު ޕޮލެންޑަށް އައިސްފައިވާއިރު އެއީވެސް އެމެރިކާ ޔުކްރޭނަށް ވެއްދުމަށް ފޮނުވި ހަތިޔާރު ކަމަށް ރިޕޯޓްތައް ބުނެއެވެ.
އެމެރިކާއިން ރަޝިއާއާ ހަނގުރާމަ ކުރުމަށް ޔުކްރޭނަށް ހަތިޔާރު ފޯރުކޮށްދޭއިރު އިސްރާއީލުގެ އަނިޔާވެރިކަމާއި އިސްތިއުމާރާ ދެކޮޅަށް ފަލަސްތީނުގެ ޖަމާއަތްތަކަށް ހަތިޔާރު ފޯރުކޮށްދިނުން އެމެރިކާ ސިފަކުރަނީ ޓެރަރިޒަމްގެ ގޮތުގައެވެ. އެމެރިކާއިން 10 ދުވަހުގެ ތެރޭގައި ދަތިކުރުމުގެ އެތައް ސަތޭކަ ފިޔަވަޅުތަކެއް ރަޝިއާ އާ ދެކޮޅަށް އަޅާފައިވާއިރު ފާއިތުވި 70 އަހަރު ތެރޭގައި ފަލަސްތީނަށް އަރައިގަނެ އިސްރާއީލުން ހިންގި ޖަރީމާތަކާ ގުޅިގެން އިސްރާއީލާ ދެކޮޅަށް އެެމެރިކާވެސް އަދި ޔޫރަޕުންވެސް އެންމެ ފިޔަވަޅެއްވެސް އަޅާފައެއް ނުވެއެވެ.
މީގެ ބަދަލުގައި އެމެރިކާ ގެންދަނީ އިސްރާއީލުގެ އަނިޔާވެރިކަމާއި އިސްތިއުމާރަށް ވާގިވެރިވެ އެކަން ދިފާއު ކުރަމުންކަން އިނގިރޭސިވިލާތުގެ ޕާލަމެންޓާއި އަޔަލޭންގެ ޕާލަމެންޓްގެ ދެތިން މެންބަރަކުވަނީ ފާހަގަކޮށްފައެވެ. ޔުކްރޭންގެ ހަނގުރާމައަކީ އެމެރިކާއާއި ޔޫރަޕްގެ ދެފުށް ދެގޮތްކަމާއި މުނާފިގުކަން ވަރަށް ބޮޑަށް ދުނިޔެއަށް ހާމަވަވަމުންދާ ހަނގުރާމައެކެވެ.
ރަޝިއާގެ ހަމަލާތަކުން ޔުކްރޭނަށް ލިބިފައިވާ ގެއްލުންތައް
ފަލަސްތީނު މައްސަލައިގެ އިތުރުން އިރާގާ އަދި އަފްޣާނިސްތާނާ ދެކޮޅަށް އެމެރިކާ ކުރި އުދުވާނީ ހަނގުރާމަތަކުގައި އެމެރިކާ ހިންގި ޖަރީމާތަކާއި މެރި މީހުންތައް މިކަމުގެ ހެއްކަކަށް ފުދެއެވެ. ދެވަނަ ބޮޑު ހަނގުރާމައަށްފަހު އެމެރިކާ 62 ގައުމަކަށް ބޮން އަޅައި އުދުވާން ހިންގާފައިވައިރު އެކިގައުމުތަކުގައި އެމެރިކާ ކުރި ހަނގުރާމަތަކުގައި އެމެރިކާ ހަ މިލިޔަން މީހުން މަރާފައިވާއިރު އަދި އިރާގުފަދަ ގައުމުތައް ސުންނާފަތިކޮށްލާފައިވާއިރު އެެމެރިކާއިން ރަޝިއާގެ އަނިޔާވެރިކަމުގެ ވާހަކަ ދެއްކުމަކީ ހަތްގުދު އޮތްމީހަކު އެއްގުދު އޮތް މީހަކާ ދެކޮޅަށް ގުދޯގުދޯ ގޮވުން ފަދަ ކަމެއްގެ ގޮތުގައި އެތައް ބަޔަކު އަންނަނީ ސިފަކުރަމުންނެވެ.
ޔުކްރޭނަށް ވަދެގަނެގެން އުޅޭކަމަށް ވަނީ ޔުކްރޭން ހަނގުރާމައަށް ކަނޑައަޅާފައިވާ ރަޝިއާގެ 150 ހާސް ސިފައިންގެ ތެރެއިން ގާތްގަނޑަކަށް ދެބައިކުޅަ އެއްބައި ކަމަށް އަސްކަރީ ޖާސޫސީ ފަރާތްތަކުން އަންދާޒާ ކުރެއެވެ. އަނެއް ބައިގެ ތެރޭގައި ހިމެނޭކަމަށްވަނީ ލޮޖިސްޓިކްސްއާއި އިދާރީ އަދި ޓެކްނީޝަނުންނާއި އެނޫންވެސް އަސްކަރީންް ކަމަށްވެއެވެ.
ރަޝިއާގެ އަސްކަރީ ބާރުތަކުގައި މިލިޔަނަކަށްވުރެ ގިނަ ސިފައިން ހިމެނޭއިރު ރިޒާވް ފޯސްވެސް ވަރަށް ބޮޑެވެ. ނަމަވެސް ޔުކްރޭނަށް ފޮނުވާފައިވަނީ އެގައުމުގެ ބިމުގެ ބޮޑުމިނާ އަޅާބަލާއިރު އަދި ރަޝިއާގެ މުޅި ލަޝްކަރުތަކަށް ބަލާއިރު ކުޑަ ބާރެއް ކަމަށްވެއެވެ.
އަނެއްކޮޅުން ރަޝިއާ ސިފައިންގެ އަތްދަށަށްދިޔަ ޔޫކްރޭންގެ ދެކުނުގެ ބޮޑު ސިޓީއެއް ކަމަށްވާ މަރިއުޕޮލް އޮތީ އިންސާނީ ކާރިސާއެއްގެ ތެރޭގައި ކަމަށާ ރަޝިޔާ ސިފައިން އެ ސިޓީއަށް ބޮމާއި މިސައިލްތަކާއި ރޮކެޓާއި ބޮޑުބަޑިން ދިން ހަމަލާތަކާއެކު އެސިޓީ ގެ ބޮޑުބައެއް ބިމާހަމަވެފައިވާ ކަމަށް މަރިއުޕޮލް ގެ މޭޔަރު އިއްޔެވަނީ ވިދާޅުވެފައެވެ.
ރަޝިއާގެ ހަމަލާތަކުން ޔުކްރޭންގެ ތަންތަން ހަލާކުވެފައި
މޭޔަރު ވަޑީމް ބޮއިޗެންކޯ ވިދާޅުވި ގޮތުގައި މަރިއުޕޮލް އިން ފެނާއި ކަރަންޓް ވަނީ ކެނޑިފައެވެ. މަގުތައްމަތީގައިވަނީ މަރުވެފައިވާ މީހުންގެ ހަށިތަކެވެ. އެހަށިތައް ނެގޭނެގޮތެއް ނެތުމުން ހަށިތައް ކުނިވަމުންދާކަން އޭނާ ފާހަގަކުރެއްވިއެވެ. މީގެއިތުރުން ސަލާމަތުން ތިބިމީހުން އެރަށުން ދާނެ ފުރުސަތެއްވެސް ނެތްކަމަށް މޭޔަރު ވިދާޅުވިއެވެ.
އިއްޔެ ރަޝިއާ ސިފައިންވަނީ ޔުކްރޭންގެ އެއާޕޯޓެއްކަމަށްވާ ފިނިސްޓްޒިޔާ އެއާޕޯޓް ވެސް ހިފާފައެވެ. މިކަން ޔުކްރޭންގެ ސިފައިންވެސް ވަނީ ކަށަވަރުކޮށްދީފައެވެ.
ޔޫކްރެއިންގައި ރަޝިއާ ކުރިޔަށް ގެންދާ އަސްކަރީ އޮޕަރޭޝަނާބެހޭގޮތުން ރައީސް ވްލަޑިމީރު ޕޫޓިން އިއްޔެ ވިދާޅުވެފައިވަނީ މި އޮޕަރޭޝަން ކުރިޔަށްދަނީ ކަނޑައެޅިފައިވާ ޕްލޭނާ އަދި ޝެޑިއުލްއާ އެއްގޮތަށް ކަމުގައެވެ. އޮޕަރޭޝަންއިން ރަޝިޔާގެ އަސްކަރީ މަގްސަދުތައް ހާސިލް ކުރެވޭނެކަމުގެ ޔަގީންކަން އޮތްކަމަށާ އޮޕަރޭޝަން މާ ދިގުނުވާނެކަމަށްވެސް ޕޫޓިން ވިދާޅުވިއެވެ. އަދި މަގްސަދު ހާސިލް ނުވަނީސް ރަޝިއާ ފަހަތަށް ނުޖެހެނެކަމަށާ ރަޝިއާގެ އަސްކަރިއްޔާއަށް ލޮޅުން އަރާވަރުގެ ފިޔަވަޅެއް އެމެރިކާއާއި ޔޫރަޕަށް އެޅިފައިނުވާކަމަށްވެސް ޕޫޓިން ވިދާޅުވިއެވެ.
ޔޫކްރެއިންގައި ރަޝިއާ ކުރިޔަށް ގެންދާ އަސްކަރީ އޮޕަރޭޝަން ފެށީ މިދިޔަ ފެބްރުއަރީ މަހުގެ 24 ގައެވެ. މި އޮޕަރޭޝަންގައި ޔޫކްރެއިންގެ އަސްކަރީ ގާބިލްކަން ވަރަށް ބޮޑަށް ކުޑަކުރެވިއްޖެކަމަށާ ވައިގެ ސިފައިން އެއްކޮށް ހަލާކުކޮށްލެވިފައިވާ ކަމަށްވެސް ޕޫޓިން ވަނީ ވިދާޅުވެފައެވެ.
ޕޫޓިންވަނީ ޔޫކްރެއިން އަޅުވެތިކޮށް އިސްތިއުމާރު ކުރުމުގެ އެއްވެސް ވިސްނުމެއްނެތްކަމަށާ މަގްސަދަކީ ޔޫކްރެއިނަކީ އަސްކަރީގޮތުން ނިއުޓްރަލް ގައުމަކަށް ހަދައި ޔުކްރޭނަކީ ރަޝިއާއާ ދެކޮޅަށް އެމެރިކާއާއި ނޭޓޯ ބޭނުންކުރާ ޓޫލެއްގެ ގޮތުގައި ހެދުމުގެ ފުރުސަތު ނުދިނުންކަމަށް ވިދާޅުވެފައެވެ. އަސްކަރީ ތަޖްރިބާކާރުން ވިދާޅުވާގޮތުގައި ދަތިތަކާއެކު ހަނގުރާމަ ދިގުލައިގެން ދިޔަނަމަވެސް އެހެން ގޮތެއް ނެތިއްޔާ ބާރުގަދަ ހަތިޔާރުތައް ބޭނުންކޮށްގެންވެސް ރަޝިއާއިން ޔުކްރޭންގެ ވެރިރަށާއި ބޮޑެތި ސިޓީތައް ހިފާނެއެވެ. އަދި ޔުކްރޭންގެ އަސްކަރިއްޔާ ހަލާކުކޮށްލާނެއެވެ.
ރަޝިއާގެ އަސްކަރީ އޮޕަރޭޝަންގައި ޔުކްރޭންގެ އެތައް ސިޓީއެއް ހަލާކުވެ 2.4 މިލިޔަން މީހުން ރެފިއުޖީންނަށްވެ ގައުމުގެ އިންފްރާސްޓްރަކްޗާ ފުނޑުފުނޑުވަމުންދާއިރުވެސް ޔުކްރޭންގެ ރައީސް ވްލަޑިމީރު ޒިލިންސްކީ ވަނީ ޔުކްރޭނުން ރަޝިއާގެ މައްޗަށް ކުރިހޯދަމުން ގެންދާކަމަށާ ރަޝިއާ ދަނީ ބަލިވަމުންކަމަށް ތަކުރާރުކޮށް ވިދާޅުވަމުންނެވެ. އަދި ރަޝިއާގެ 11 ހާސް ސިފައިން މަރާލެވިއްޖެކަމަށާ އަސްކަރީ ގިނަ އާލާތްތައް ހަލާކުކޮށް ލެވިފައިވާ ކަަމަށް ޒެލެންސްކީ ވިދާޅުވިއެވެ.
އަދި ނޭޓޯގެ އެހީއާއެކު ރަޝިއާ ބަލިކޮށްލާނެކަމަށްވެސް ޒިލިންސްކީވަނި ވިދާޅުވެފައެވެ. ނަމަވެސް ރަޝިއާގެ ހަމަލާތަކުގައި މަރުވަމުންދާ ޔުކްރޭން ސިފައިންނާއި ޔުކްރޭންގެ އަސްކަރީ އަދި މަދަނީ އިންފްރާސްޓްރަކްޗާ ހަލާކުވަމުންދާ މިންވަރު އޭނާ ހާމަކުރައްވާފައެއް ނުވެއެވެ.
ޒިލިންސްކީގެ ސިފައިން މިހާތަނަށްވަނީ ރަޝިއާގެ ތެރެއަށް އެންމެ ހަމަލާއެއްވެސް ދިނުމަށް ނުކުޅެދިފައެވެ. ޒިލިންސްކީގެ ބާރުތަކަށް ހަމަލާދެވެނީ ޔުކްރޭންގެ ތެރޭގައި އުޅޭ ރަޝިއާ ސިފައިންނަށެވެ.
ނަމަވެސް ރިޕޯޓްތައް ބުނާގޮތުން ރަޝިއާ ސިފައިން ގެންދަނީ މަޑުމަޑުން ނަމަވެސް ޔުކްރޭންގެ ސިޓީތައް ހިފައި ވެރިރަށް ކިޔޭވް ވަށާލައި ޔުކްރޭންގެ ނިއުކްލިޔާ މަރުކަޒުތައްފަދަ ހައްސާސްތަންތަން ރަޝިއާގެ ކޮންޓްރޯލްގެ ދަށަށް ގެންނަމުންނެވެ. އެމެރިކާވެސް ގެންދަނީ ޔުކްރޭނަށް ރަޝިއާ ބަލިކުރެވޭނެ ކަމަށް ބުނެ ޔުކްރޭންގެ ވެރިންނަށް ހިއްވަރު ދެމުންނެވެ.