06 Mar 2022, 22:33
މަގުމަތީގައި ޕާކުކޮށްފައި ހުންނަ އުޅަނދުތައް މަދުކުރުމަށް ކުރާ މަސައްކަތުގެ ތެރެއިން ހުޅުމާލޭގައި ޕާކިން ބިލްޑިންގެއް ޤާއިމުކުރުމަށް ދަމާސް ކޮންޕެނީ ޕްރައިވެޓް ލިމިޓެޑާއެކު ފްރޭމް ވޯކް އެއްބަސްވުމެއްގައި މިއަދު ސޮއިކޮށްފިއެވެ.
އެ އެއްބަސްވުމުގައި ދަމާސްގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުﷲ ޞާލިޙެވެ. އަދި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ސުހައިލް އަހްމަދެވެ.
ހުޅުމާލޭގައި ޕާކިން ބިލްޑިންގެއް ޤާއިމްކުރުމަށް ވެވުނު އެއްބަސްވުމުގައި ސޮއިކުރުން
އެ އެއްބަސްވުމުގެ މަގުސަދަކީ ހުޅުމާލޭގައި ދިރިއުޅޭ ފަރާތްތަކާއި އެކި ބޭނުންތަކަށް ހުޅުމާލެއަށް ޒިޔާރަތްކުރާ ފަރާތްތަކަށް ޕާކު ކުރުމުގައި ދިމާވާ ދަތިތަކަށް ހައްލު ހޯދައިދިނުމެވެ. އެ އެއްބަސްވުމުގެ ދަށުން ޤާއިމް ކުރަން ހަމަޖެހިފައިވާ ބިލްޑިންގައި ސައިކަލާއި ކާރު ޕާކުކުރެވޭނެއެވެ.
އެ ބިލްޑިން އިމާރާތްކުރަން ހަމަޖެހިފައިވަނީ ހުޅުމާލެ ފެރީ ޓާމިނަލް ކައިރި ހުންނަ އޯޝަން ފްރަންޓުގެ ފަހަތުގައެވެ.