06 Mar 2022, 09:45
ސްޕެއިންގެ ރެއާލް މެޑްރިޑާއެކު ޔުއޭފާ ޗެމްޕިއަންސް ލީގު އުފުލާލި ލެޖެންޑް މިޝޭލް ސަލްގާޑޯ, މޯލްޑިވްސް ސްޕޯޓްސް އެވޯޑްސް ހަފްލާގައި ބައިވެރިވާނެކަން ޔޫތު މިނިސްޓަރު އަޙްމަދު މަހްލޫފް ވިދާޅުވެއްޖެއެވެ.
އުމުރުން 46 އަހަރުގެ ސަލްގާޑޯއަކީ ސްޕެއިންގެ ގައުމީ ޓީމަށް ވެސް ކުޅެދީފައިވާ ލެޖެންޑެކެވެ.
ސަލްގާޑޯ ވަނީ ރެއާލްއާއެކު ޔުއޭފާ ޗެމްޕިއަންސް ލީގު ދެ ފަހަރަކު ކާމިޔާބުކޮށްފައެވެ. އަދި ޔުއޭފާ ސުޕާ ކަޕް އެއް ފަހަރު ކާމިޔާބުކޮށް، ހަތަރު ފަހަރެއްގެ މަތިން ރެއާލްއާއެކު އޭނާ ވަނީ ލަލީގާ ވެސް ކާމިޔާބުކޮށްފައެވެ.
މީގެ އިތުރުން އޭނާ ވަނީ އެ ޓީމާއެކު ތިން ފަހަރެއްގެ މަތިން ސްޕެނިޝް ސުޕާ ކަޕް ވެސް ކާމިޔާބުކޮށް، އިންޓަކޮންޓިނެންޓަލް ކަޕް އެއް ފަހަރު ކާމިޔާބުކޮށްފައެވެ.
ހަމައެއާއެކު، ސަލްގާޑޯ އަކީ ފީފާގެ ލެޖެންޑްސް އެމްބެސަޑަރެއްގެ އިތުރުން އެޑިޑާސްގެ ވެސް އެމްބެސެޑާއެކެވެ.
ފުޓިބޯޅަ ލެޖެންޑް ސަލްގާޑޯ-- ފޮޓޯ / ޔޫތު މިނިސްޓަރު އަޙުމަދު މަހްލޫފް
ސަލްގާޑޯ އޭނާގެ ކެރިއަރު ފަށާފައިވަނީ 1994 ވަނަ އަހަރު ސްޕެއިންގެ ސެލްޓާ ވިގޯގެ ބީ ޓީމުންނެވެ. އޭގެ ފަހުން އޭނާ ވަނީ ސެލްޓާގެ ސީނިއާ ޓީމަށާއި ރެއާލް އަށް ވެސް ކުޅެފައެވެ. ސަލްގާޑޯ އޭނާގެ ކެރިއަރު ނިންމާލީ 2018 ވަނަ އަހަރު އިންޑެޕިއެންޑެންޓުންނެވެ.
ސްޕެއިންގެ 21 އަހަރުން ދަށުގެ ގައުމީ ޓީމާއެކު ސަލްގާޑޯ ވަނީ ޔުއެފާ ޔޫރަޕިއަން ޗެމްޕިއަންޝިޕްވެސް ކާމިޔާބުކޮށްފައެވެ.
ސަލްގާޑޯ ވަނީ ރެއާލްއަށް 251 މެޗު ކުޅެދީފައެވެ. އަދި އޭނާ ވަނީ ރެއާލް އަށް ހަތަރު ލަނޑު ކާމިޔާބުކޮށްދީފައެވެ.
ސަލްގާޑޯ ވަނީ ސްޕެއިންގެ 18 އަހަރުން ދަށް، 19 އަހަރުން ދަށް، 20 އަހަރުން ދަށް، 21 އަހަރުން ދަށް އަދި ސީނިއާ ޓީމަށް ވެސް ކުޅެދީފައެވެ.
އޭނާގެ މުޅި ކެރިއަރުގައި އޭނާ ވަނީ 587 މެޗު ކުޅެފައެވެ.
ސަލްގާޑޯގެ އިތުރުން ސްވިޑެންގެ މަޝްހޫރު ފެތުންތެރިޔާ ސާރާ ޚޮރޮސްޓްރޮމް ވެސް މޯލްޑިވްސް ސްޕޯޓްސް އެވޯޑްސްގައި ބައިވެރިވާނެކަން ޔޫތު މިނިސްޓަރު މަހްލޫފް ވަނީ އިޢުލާން ކުރައްވާފައެވެ. އަދި މި ނޫންވެސް ތަފާތު ކުޅިވަރުތަކުގެ އެކި ލެޖެންޑުން ބައިވެރިވާނެކަމަށް މިނިސްޓަރު މަހްލޫފް ވިދާޅުވެއެވެ.