28 Feb 2022, 13:10
ރަޝިއާގެ ނިއުކްލިއާ ފައުޖު މަތީ އެލާޓަށް ގެނައުމުން އެގައުމުގެ ރައީސް ވްލަޑިމިއާ ޕޫޓިންއަށް ބޭރު ގައުމުތަކުގެ ފާޑުކިޔުން އަމާޒުވެއްޖެއެވެ.
އިއްޔެ ރަޝިއާގެ ގައުމީ ޓީވީ މެދުވެރިކޮށް ޕޫޓިން ދެއްވި ތަގުރީރެއްގައި ވިދާޅުވީ، ނިއުކްލިއާ ފައުޖުތައް އެލާޓަށް ގެންނަން ނިންމެވީ ނޭޓޯގެ ލީޑަރުން ދެއްވާ ހަރުކަށި ބަޔާންތަކާއި ރަޝިއާއާ ދެކޮޅަށް އަޅަމުންގެންދާ އިގުތިސާދީ ފިޔަވަޅުތަކުގެ ސަބަބުން ކަމަށެވެ.
އޭގެ ސަބަބުން ނިއުކްލިއާ ފައުޖުތައް ތައްޔާރީ ހާލަތަށް ގެންނަން ޑިފެންސް މިނިސްޓަރާއި ޗީފް އޮފް ޖެނެރަލް ސްޓާފަށް އަންގަވާފައިވާ ކަމަށް ޕޫޓިން ވިދާޅުވިއެވެ.
މި ނިންމުމުގެ ސަބަބުން، ރަޝިއާގެ އަސްކަރިއްޔާއިން ނިއުކްލިއާ ހަތިޔާރު ބޭނުންކޮއްފާނެކަމުގެ ބިރު އިތުރުވާނެ ކަމަށް ބޭރުގެ މީޑިއާތަކުން ރިޕޯޓުކުރެއެވެ.
އެމެރިކާގެ ވައިޓް ހައުސްގެ އިސް އޮފިޝަލަކު އެ ފިޔަވަޅު ސިފަކޮށްފައި ވަނީ "ބޭކާރު" ފިޔަވަޅެއްގެ ގޮތުގައެވެ. އަދި ޔޫކްރޭނާއި ނޭޓޯގެ ފަރާތުން ޕޫޓިންއަށް އެއްވެސް އިރެއްގައި ނުރައްކާ ނުވާ ކަމަށާއި ރަޝިއާގެ ފައުޖުތަކަށް މިހާރު ނުރައްކާވެފައި ވަނީ އެމީހުން މިނިވަން ގައުމަކަށް އަރައިގަތުމުން ކަމަށް ވެސް އޭނާ ވިދާޅުވިއެވެ.
މީގެ އިތުރުން، ޔޫކްރޭނަކީ ނިއުކްލިއާ ހަތިޔާރު ގެންގުޅޭ ގައުމެއް ނޫންކަން ވެސް އެމެރިކާގެ އޮފިޝަލް ފާހަގަ ކުރެއްވިއެވެ.
ޔޫކްރޭނުން ބުނި ގޮތުގައި ޕޫޓިން އެ ފައުޖުތައް އެލާޓަށް ގެނައިކަން އިއުލާން ކުރެއްވީ ޔޫކްރޭނަށް ބިރު ދެއްކުމުގެ ގޮތުންނެވެ. އަދި ނޭޓޯއިން ވަނީ ރަޝިއާގެ ނިންމުމަކީ "ޒިންމާދާރުކަން ކުޑަ، ނުރައްކާތެރި" ނިންމުމެއްގެ ގޮތުގައި ސިފަކޮށްފައެވެ.
ޕޫޓިން އެ އިއުލާން ކުރެއްވީ، ރަޝިއާއާ އެކު މަޝްވަރާ ބައްދަލުވުމެއް ބާއްވަން ޔޫކްރޭނުން އެއްބަސްވި ފަހުންނެވެ. އެ ބައްދަލުވުން ބާއްވަން އެއްބަސްވިކަން ޔޫކްރޭންގެ ރައީސްގެ އޮފީހުން ހާމަކުރި ނަމަވެސް، ބައްދަލުވުން ބާއްވާނެ ގަޑިއަކާއި ތަނެއް ހާމައެއް ނުކުރެއެވެ.
ޕޫޓިންގެ އަމުރަށް، ރަޝިއާގެ ސިފައިން ޔޫކްރޭނަށް އެރީ މިދިޔަ ބުރާސްފަތި ދުވަހުއެވެ. އޭގެ ފަހުން މިހާތަނަށް 352 އާންމު ރައްޔިތުން މަރުވެފައިވާ ކަމަށާއި އޭގެ ތެރޭގައި 14 ކުޑަކުދިން ހިމެނޭ ކަމަށް ޔޫކްރޭންގެ ހެލްތު މިނިސްޓްރީން އިއްޔެ ބުންޏެވެ.