23 Feb 2022, 13:43
މަސްތުވާތަކެތި ޓްރެފިކް ކުރުމުގެ ދައުވާތަކެއް އުފުލާފައިވާ މަޝްހޫރު ރެޕް ލަވަކިޔުންތެރިޔާ އިސްމާއިލް އިފްހާމް މުޙައްމަދު (ޕެސްޓު) ބޭސްފަރުވާއަށް ގޭ ބަންދަށް ބަދަލުކޮށްފިއެވެ.
މިދިޔަ އަހަރު ހައްޔަރުކޮށް، ޝަރީއަތް ނިމެންދެން ޖަލު ބަންދުގައި ހުރި ޕެސްޓު ގޭ ބަންދަށް ބަދަލު ކުރީ 60 ދުވަހަށެވެ. އޭނާއަށް ޝަރުތު ކުރީ ބޭސްފަރުވާއަށް ނޫން ގޮތަކަށް ބޭރުގައި ނޫޅުމަށެވެ.
ޕެސްޓް ފަރުވާއަށް އެދިފައިވަނީ ތޮންސިލަށް ދިމާވި މައްސަލައަކާ ގުޅިގެންނެވެ.
އެކަށީގެންވާ ބޭސްފަރުވާ ނުލިބޭ ކަމަށް ބުނެ ޕެސްޓް ޝަކުވާ ކުރުމުން ޕީޖީއިން އެދުނީ މުޖުތަމައުގެ ސަލާމަތަށްޓަކައި އޭނާ ޖަލު ބަންދުގައި ބަހައްޓައި ދިނުމަށެވެ. އަދި އޭނާއަށް މިހާރު ވެސް ފަރުވާ ކުރަމުން އަންނަ ކަމުގެ ލިޔުންތައް ވެސް ހުށަހެޅިއެވެ.
ނަމަވެސް ޝަރީއަތުން ނިންމީ ގޭ ބަންދަށް ބަދަލު ކުރުމަށެވެ.
ޕެސްޓްއާއެކު އެ މައްސަލާގައި ދެން ހައްޔަރު ކޮށްފައިވާ މުހައްމަދު ސުއައިދު ވެސް މިއަދު ވަނީ ގޭ ބަންދަށް ބަދަލުކޮށްފައެވެ.
ޕެސްޓުގެ މައްޗަށް ކޮށްފައިވަނީ ކެނަބިސް ޓްރެފިކް ކުރުމުގެ ދައުވާ އާއި ޑައިމޯފިން ޓްރެފިކް ކުރުމުގެ ދައުވާގެ އިތުރުން ކެނަބިސް ބޭނުން ކުރުމުގެ ދައުވާ އާއި ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ އާއި މަސްތުވާ ތަކެތީގެ ގާނޫނުގެ ޖަދުވަލު އެކެއް ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާ އެވެ.
އެ މައްސަލާގައި ދެން ހައްޔަރުކުރި މުހައްމަދު ސުއައިދުގެ މައްޗަށް ވަނީ ހަތަރު ދައުވާ އެއް އުފުލައިފައެވެ. އޭނާގެ މައްޗަށް އުފުލާފައިވަނީ ކެނަބިސް ޓްރެފިކް ކުރުމުގެ ދައުވާ އާއި ޑައިމޯފިން ޓްރެފިކް ކުރުމުގެ ދައުވާ އާއި މަސްތުވާ ތަކެތީގެ ގާނޫނުގެ ޖަދުވަލު އެކެއްގައި ބުނާ މަސްތުވާ އެއްޗެއް ޓްރެފިކް ކުރުމުގެ ދައުވާގެ އިތުރުން ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ އެވެ.
ރެޕް އާޓިސްޓެއްގެ ގޮތުގައި މަގުބޫލުކަން ހޯދާފައިވާ ޕެސްޓުގެ މައްޗަށް އުފުލާފައިވާ ދައުވާތައް ސާބިތުވެއްޖެ ނަމަ އުމުރު ދުވަހުގެ ހުކުމެއް އޭނާގެ މަައްޗަށް އަތުވެދާނެ އެވެ.
"ރީތި ކުދިން"ގެ ނަމުގައި ނެރުނު ރެޕް ލަވައަކުން 2011 ވަނަ މަޝްހޫރުކަން ހޯދި ޕެސްޓް އަކީ މިހާރު މަގުބޫލު މިއުޒިކް ލޭބަލް، ސިމްބޮލިކް ރެކޯޑްސްގެ އެންމެ މުހިންމު އެއް ފަންނާނެ އެވެ.