12 Feb 2022, 20:16
ސެންޓާ ފޯ އިންފޮމޭޝަން ޓެކްނޮލޮޖީ މެނޭޖެމެންޓް (ސީއައިޓީއެމް) ގެ ކޯސްތަކުގައި ކިޔަވައިދޭން ސްރީލަންކާއިން ރާއްޖެ ގެނައި ލެކްޗަރާއަކަށް މުސާރަނުދިނުމުން ހާލުގައިޖެހިއްޖެއެވެ.
"ސަން" އާ ވާހަކަދައްކަމުން ސީއައިޓީއެމްގެ ލެކްޗަރާ މުހައްމަދު އަސްލަމް ބުނީ އެތަނުން ހިންގި ކޯހެއްގައި ކިޔަވައިދޭން އޭނާ ފޮނުވީ ކުޅުދުއްފުއްޓަށް ކަމަށާއި ހަތަރު މަހަށްވުރެ ގިނަ ދުވަހުގެ މުސާރަ އޭނާއަށް ނުދީ ވާކަމަށެވެ.
މުސާރަ ނުދެވި ލަސްވަނީ ކޮވިޑްގެ ސަބަބުން ދަރިވަރުންގެ ފީ ނުލިބޭތީ ކަމަށް ސީއައިޓީއެމްގެ ޗެއާމަން މުހައްމަދު ތޮލާލް ބުނި ނަމަވެސް ހުރިހާކުދިން މަހުންމަހަށް ފީ ދައްކާކަމަށް ވެސް އަސްލަމް ބުންޏެވެ.
"އަޅުގަނޑުގެ ޕާސްޕޯޓް އޮންނަނީ ތޮލާލް އަތުގައި. އެހެންވެ އެ މައްސަލަ ކުޅުދުއްފުށީ ޕޮލިސް ސްޓޭޝަނަށް ހުށަހެޅުމުން މިހާރު އޭނާ ވަނީ ފުލުހުންގެ އިދާރާއާ ޕާސްޕޯޓް ހަވާލުކޮށްފައި،" އޭނާ ބުންޏެވެ.
މީގެއިތުރުން އަސްލަމް ބުނީ ޕާސްޕޯޓް ނަގަން މާލެ ފޮނުވަން ތޮލާލް އެއްބަސްވި ނަމަވެސް އެކަމުގެ އެއްވެސް އިންތިޒާމެއް ހަމަޖައްސައިދީފައި ނުވާކަމަށެވެ.
"ޕާސްޕޯޓް ނަގަން އަޅުގަނޑު މާލެ ފޮނުވާނެ ކަމަށް ތޮލާލް ބުނެފައި ވަނީ. އެކަމަކު އެކަމަށް ބޭނުންވާ އެއްވެސް ޚަރަދެއް އޭނަ ހަމަޖައްސައެއް ނުދޭ. އަޅުގަނޑުގެ އަތުގައި މިވަގުތު އޮތީ އެންމެ 40 ރުފިޔާ،" އަސްލަމް ބުންޏެވެ.
އަސްލަމް ބުނިގޮތުގައި މާލެ ދިއުމުން އަނބުރާ އޭނާ ގައުމަށް ފޮނުވައިދޭނެ ކަމަށް ތޮލާލް ވަނީ ބުނެފައެވެ.
މީގެ ކުރިން ސީއައިޓީއެމްގައި މަސައްކަތްކުރި ބޭރު ޓީޗަރުންނާދޭތެރޭ ވެސް އެ ކުންފުނިން އެފަދައިން ކަންތައްކޮށްފައިވާކަމަށް އަސްލަމް ބުންޏެވެ. އެހެންކަމުން ތޮލާލަށް އިތުބާރުކޮށް މާލެ ދާން ނުކެރޭނެކަމަށް އޭނާ ބުންޏެވެ.
އޭނާ ހުންނަނީ ސީއައިޓީއެމްއިން ކުއްޔަށް ހިފާފައި ހުންނަ ގެއެއްގައި ކަމަށާއި ކަނީ ދުވާލަކު ދެ ބިސް ކަމަށް އަސްލަމް ބުންޏެވެ. އަދި ސްރީ ލަންކާގައި ދިރިއުޅޭ އޭނާގެ އާއިލާއަށް ޚަރަދެއް ނުކުރެވި އެމީހުންވެސް އުޅެނީ ވަރަށް ހާލުގައި ކަމަށް އޭނާ ބުންޏެވެ.
މިކަމާ ގުޅިގެން ސީއައިޓީއެމްގެ ޗެއާމަން ތޮލާލްއަށް ގުޅުމުން އޭނާ ބުނީ އަސްލަމް ދައްކަނީ ދޮގު ވާހަކަމަށެވެ. އަދި އެކަމުގެ ތަފްސީލު ހޯދަން "ސަން"އިން ސުވާލުކުރުމުން އެ ސުވާލުތަކަށް ޖަވާބު ނުދީ އޭނާ ވަނީ ފޯނު ކަނޑާލާފައެވެ.
މޯލްޑިވްސް ކުއަލިފިކޭޝަން އޮތޯރިޓީ (އެމްކިއުއޭ)ގެ ގަވާއިދުތަކާ ޚިލާފަށް ކޯސްތައް ހިންގާތީ ސީއައިޓީއެމް ވަނީ މިދިޔަ އަހަރުގެ ނޮވެމްބަރުމަހު 'ބްލެކްލިސްޓް'ކޮށްފައެވެ.