12 Feb 2022, 19:45
ކާބުލް (12 ފެބްރުއަރީ 2022): އެމެރިކާގެ ފެޑްރަލް ރިޒާވް ބޭންކްގައި ހުރި އަފްޣާނިސްތާނުގެ ހަތް ބިލިޔަން ޑޮލަރު, ހާލުގައި ޖެހިފައިތިބި އަފްޣާން ރައްޔިތުންނަށް ބޭނުންވާ ކާބޯތަކެއްޗާއި ބޭސް ފަރުވާއަށް ބޭނުންކުރުމަށް ނުދީ އެފައިސާ އެމެރިކާގެ ބޭނުންތަކަށް ނެގުމަށް ރައީސް ޖޯ ބައިޑެން ނިންމެވުމުން އެއީ އެމެރިކާއިން ފާޅުގައި ކުރި ވައްކަމެއް ކަމަށް ތާލިބާން ޖަމާއަތުން ސިފަކޮށްފިއެވެ.
އަފްޣާނިސްތާނުގައި ވެރިކަންކުރާ ތާލިބާން ސަރުކާރުގެ ތަރުޖަމާނު މުޙައްމަދު ނަޢީމު ވިދާޅުވީ އަފްޣާން ރައްޔިތުންގެ އެތަށް މިލިޔަންބަޔަކު ބަނޑަށްޖެހޭ ހާލުގައާއި ބަލިތަކުގެ ޝިކާރައަކަށްވެ ބޭސް ފަރުވާކުރުމަށް ބޭނުންވެ ފައިސާނެތިގެން އެކަން ނުކުރެވޭ ހާލަތުގައި ތިއްބައި އަފްޣާން ރައްޔިތުންގެ ފައިސާ އެމެރިކާއިން ޖަހައިގަތުމަކީ ފާޅުގައި އެމެރިކާ ހިންގި ވައްކަމުގެ އަމަލެއްކަމަށާ އެއީ އެމެރިކާގެ އަޚްލާގީ ފެންވަރުގެ ދަށްކަން މުޅި ދުނިޔެއަށް ހާމަވެެގެންދިޔަ ކަމެއްކަމުގައެވެ.
ތާލިބާން ސަރުކާރުގެ ތަރުޖަމާން މުހައްމަދު ނައީމް
އެމެރިކާއަކީ ދުނިޔޭގެ އެންމެ މުއްސަނދި އެއްގައުމު ކަމަށްވެފައި އަފްޣާނިސްތާނަކީ ދުނިޔޭގެ އެންމެ ފަގީރު އެއްގައުމަށްވާއިރު އެމެރިކާގެ ފެޑްރަލް ރިޒާވް ބޭންކްގައި ހުރި އަފްޣާން ރައްޔިތުންގެ ހަތް ބިލިޔަން ޑޮލަރުގެ ތެރެއިން ބޮޑުބައެއް ސެޕްޓެމްބަރު 11 ގެ ހަމަލާތަކުގައި މަރުވި އެމެރިކާ މީހުންގެ އާއިލާތަކަށާއި ގެއްލުން ލިބުނު މީހުންނަށް ދިނުމަށް ރައީސް ޖޯ ބައިޑެން އިއްޔެ ނިންމެވުމުން އިންސާނީ ހައްގުތަކަށް މަސައްކަތްކުރާ ޖަމާއަތްތަކުންވެސް ވަނީ އެކަމާމެދު ކަންބޮޑުވާކަން ހާމަކޮށްފައެވެ.
އެމެރިކާގެ ފެޑްރަލް ރިޒާވް ބޭންކްގައި ހުރި އަފްޣާނިސްތާނުގެ ފައިސާއަކީ އަފްޣާން ރައްޔިތުންނަށް ބޭނުންވާ އިންސާނީ އެހީ ފޯރުކޮށްދިނުމަށް ދުނިޔޭގެ ބައެއް ގައުމުތަކުންނާއި އިންސާނިއްޔަތަށް މަސައްކަތްކުރާ ޖަމްއިއްޔާ ޖަމާއަތްތަކުން އިންސާނީ އެހީގެ ގޮތުގައި އަފްޣާން ރައްޔިތުންނަށް ދީފައިހުރި ފައިސާއެވެ. އަފްޣާނިސްތާނުގެ ކުރީގެ ރައީސް އަޝްރަފް އަބްދުލްޣަނީގެ ސަރުކާރުން މިފައިސާ ބޭނުންކުރަމުން ގެންދިޔައީ އެމެރިކާގެ މަރުކަޒީ ބޭންކް ކަމަށްވާ ފެޑްރަލް ރިޒާވް ބޭންކްގައި ބަހައްޓައިގެންނެވެ.
ހާލުގައި ޖެހިފައިވާ އަފްޣާން ރައްޔިތުން
މިދިޔަ އަހަރުގެ އޮގަސްޓްމަހު ތާލިބާނުން އަފްޣާނިސްތާނުގެ ވެރިކަމަށް އައުމާއެކު އެމެރިކާވަނީ އަފްޣާން ރައްޔިތުންގެ އެއްވެސް ކަމަކަށް ޚަރަދު ނުކުރެވޭގޮތަށް އެފައިސާ ހިފަހައްޓާފައެވެ. ތާލިބާނުން ވެރިކަމަށް އައުމާއެކު ބައިނަލްއަގްވާމީ ގިނަ އެހީތަކުންވެސް އަފްޣާނިސްތާން މަހްރޫމްވުމުން އަފްޣާން ރައްޔިތުންގެ ގާތްގަނޑަކަށް ދެބައިކުޅަ އެއްބައިމީހުން ވަނީ ބަލިމަޑުކަމާއި ހައިހޫނުކަމުގެ ޝިކާރައަކަށް ވެ ވަރަށް ބޮޑަށް ހާލުގައި ޖެހިފައެވެ.
މިހާލަތުގައި އަފްޣާން ރައްޔިތުންނަށް ބޭނުންވާ ކާބޯތަކެއްޗާއި ބޭސް ގަތުމަށް މި ހަތް ބިލިޔަން ޑޮލަރު ދޫކޮށްދިނުމަށް އަފްޣާން ސަރުކާރުގެ އިތުރުން އދ. އާއި ދުނިޔޭގެ ގައުމުތަކުންވެސް އެމެރިކާއަށްވަނީ ތަކުރާރުކޮށް ގޮވާލައި އިލްތިމާސްކޮށްފައެވެ. ނަމަވެސް އެމެރިކާ ވަނީ މިފައިސާ ދޫކުރުމަށް ތަކުރާރުކޮށް ދެކޮޅު ހަދާފައެވެ.
އަދި އެންމެފަހުން އަފްޣާން ރައްޔިތުން އެހާލުގައި ތިއްބައި އެމެރިކާގެ ރައީސް ޖޯ ބައިޑެން އިއްޔެ ނިންމަވާފައިވަނީ އެމެރިކާގެ ފެޑްރަލް ރިޒާވް ބޭންކްގައި ހުރި އަފްޣާން ރައްޔިތުންގެ ހަތް ބިލިޔަން ޑޮލަރުގެ ތެރެއިން ބޮޑުބައެއް ސެޕްޓެމްބަރު 11 ގެ ހަމަލާތަކުގެ ޝިކާރައަކަށްވި އެމެރިކާ ގެ ރައްޔިތުންނަށް ބަދަލުގެ ގޮތުގައި ދިނުމަށެވެ.
އަފްޣާން ރައްޔިތުން ދިރިއުޅެން ޖެހިފައިވާ ނިކަމެތި ހާލު
ސެޕްޓެމްބަރު 11 ގެ ހަމަލާތަކަކީ އެމެރިކާ ބުނާގޮތުން އަލްގާއިދާއިން ދިން ހަމަލާތަކެކެވެ. އަލްގާއިދާގެ ނަމުގައި އެހަމަލާތައް ދިންކަމަށް އެމެރިކާ ބުނެފައިވާ މީހުންގެ ލިސްޓުގައި އަފްޣާން ރައްޔިތަކުނެތެވެ. ތިބީ ސައޫދީ ރައްޔިތުންނެވެ. އެދުވަސްވަރު އަފްޣާނިސްތާނުގެ ވެރިކަމުގައި އޮތީ ތާލިބާން ޖަމާއަތެވެ.
އެމެރިކާވަނީ ތާލިބާނުން އަލްގާއިދާއަށް އެހީތެރިވި ކަމަށް ތުހުމަތުކޮށް 2001 ވަނައަހަރު އަފްޣާނިސްތާނަށް އުދުވާނީ ހަމަލާތަކެއްދީ އެގައުމަށް އަސްކަރީގޮތުން އަރައިގަނެ ތާލިބާން ސަރުކާރު ވައްޓާލައި އެމެރިކާގެ ގޮނޑިކޮއްކޮ ސަރުކާރެއް އަފްޣާނިސްތާނުގައި ގާއިމްކޮށްފައެވެ. 20 އަހަރުވަންދެން އެމެރިކާ އަފްޣާނިސްތާނުގައި ހިންގި އަނިޔާވެރި ހަނގުރާމައިގާ އެމެރިކާވަނީ އަފްޣާނިސްތާނުގެ ސްކޫލްތަކާއި އާންމުންގެ ގެދޮރަށާއި ހޮސްޕިޓަލްތަކަށްވެސް ހަމަލާދީ އެތަންތަން ބިމާހަމަކޮށް ހަނގުރާމައިގެ ބޮޑެތި ޖަރީމާތަކެއް ހިންގާފައެވެ.
އެމެރިކާ 20 އަހަރު އަފްޣާނިސްތާނުގައި ކުރި ހަނގުރާމައިގާ ތާލިބާން ހަނގުރާމަވެރިންނާއި އަފްޣާން ރައްޔިތުން ހިމެނޭގޮތަށް މިލިޔަނެއްހާ މީހުން މަރައި ފަސްވަރަކަށް މިލިޔަން މީހުން ޒަޚަމްކޮށްލައި 7 ވަރަކަށް މިލިޔަން މީހުން ރެފިއުޖީންނަށް ހަދާފައިވާ ކަމަށް ރިޕޯޓްތައް ބުނެއެވެ.