10 Feb 2022, 14:40
މާލޭގެ ފަސް ސަރަހައްދެއްގައި ޕާކިން އިމާރާތްތައް އަޅަން މާލެ ސިޓީ ކައުންސިލުން ނިންމައިފިއެވެ.
މާލެ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި މާލޭ މޭޔަރު ޑރ. މުހައްމަދު މުއިއްޒު ވިދާޅުވީ، މާލެ ސިޓީގެ ސްޓްރެޓަޖިކް އެކްޝަން ޕްލޭންގައި ކަނޑައަޅާފައި އޮތް ގޮތުގައި، އެންމެ ސަމާލުކަނެއް ދޭ އެއްކަމަކީ މަގުމަތީގައި ހުންނަ ޕާކިންއާއި ވެހިކަލްތަކާއި ޓްރެފިކާ ގުޅޭ ކަންކަން ހައްލުކުރުމަށް މަސައްކަތް ކުރުން ކަމަށެވެ.
އެހެންކަމުން މާލޭގައި ޕާކިން އިމާރާތްތަކެއް އަޅަން މަސައްކަތް ކުރަން މާލެ ސިޓީ ކައުންސިލްގެ ޕްލޭންގައި ފާހަގަ ކޮށްފައި ވާނެ ކަމަށެވެ.
މުއިއްޒު ވިދާޅުވީ އެއީ ވަރަށް ބޮޑު ހަރަދެއް ހިނގާ، ވަރަށް ގިނަ މަސައްކަތްތަކެއް ކުރަން ޖެހޭ ކަމެއް ކަމަށެވެ.
ވޭތުވެދިޔަ އަށް މަސް ތެރޭގައި މިކަމަށް ވަރަށް ގިނަ މަސައްކަތްތަކެއް ކޮށް، އިއްޔެ ބޭއްވި މާލެ ސިޓީ ކައުންސިލްގެ ބައްދަލުވުމުގައި ފާސްކުރީ، މާލޭގެ އެކި ސަރަހައްދުތަކުގެ ބިންތަކުގައި ޕާކިން އިމާރާތްތައް އަޅަން ޑިވޮލޮޕަރުން ހޯދުމަށް އިއުލާނު ކުރުމަށް ކަމަށް މުއިއްޒު ވިދާޅުވިއެވެ.
ކައުންސިލްގެ ބަޖެޓަކުން މިކަމެއް ނުކުރެވޭނެތީ، އެކަން ކުރުމަށް ޑިވޮލޮޕަރުން ނުވަތަ އިސްވެސްޓަރުން ހޯދައިގެން ޕަބްލިކް/ޕްރައިވެޓް ޕާޓްނާޝިޕް މޮޑެލްގެ ދަށުން އެކަން ކުރުމަށް ހުޅުވާލަން ނިންމާފައި ވާކަމަށް މުއިއްޒު ވިދާޅުވިއެވެ.
އެއީ މުއްދަތެއް ނަގާނެ ކަމެއް ކަމަށާއި އިމާރާތެއް އަޅައި ބޭނުން ކުރަން ފެށޭނީ ވަގުތުތަކެއް ހޭދަވެގެންކަމަށް މުއިއްޒު ވިދާޅުވިއެވެ.
އެހެންކަމުން، އެކަން ވުމުގެ ކުރިން މާކޭގައި އޮތް ޕާކިން މައްސަލަ ދޫކޮށްލާފައި ބޭއްވުމަކީ ޒިންމާދާރު ގޮތެއް ކަމުގައި ނުދެކޭ ކަމަށާއި މިހާތަނަށް ވެސް ވަގުތީ ހައްލުތައް ހޯދައިދެމުން އަންނަ ކަމަށް މުއިއްޒު ފާހަގަ ކުރެއްވިއެވެ.
މާލޭގެ ޕާކިން މައްސަލަ ހައްލު ކުރުމަށް ކައުންސިލުން ވަނީ މާލޭގެ މަގުތަކުން ސްލޮޓްތައް ކުއްޔަށް ދިނުމަށާއި ވިއްކުމަށް ނިންމައިފައެވެ. އޭގެ ތެރޭގައި ޕާކިން ސްލޮޓް ވިއްކުމަށް ނިންމާފައިވާ ނިންމުން ބާތިލް ކުރަން އެޗްޖީއޭއާއި ޓްރާންސްޕޯޓް މިނިސްޓްރީން ވަނީ އަންގައިފައެވެ.