10 Feb 2022, 08:49
މިހާރު ކުޅެމުންދާ ބައިނަލްއަގުވާމީ އެކުވެރި ކަމުގެ ވޮލީ މެޗުތަކުގެ ދެ ވަނަ މެޗުގައި ރޭ ބަންގްލަދޭޝްއިން ރާއްޖެ ބަލިކޮށްފިއެވެ.
ޒުވާނުންގެ މަރުކަޒުގެ އެތެރޭގެ ހޯލުގައި ރޭ ކުޅުނު މެޗުން ބަންގްލަދޭޝް މޮޅުވީ ތިން ސެޓު އެއް ސެޓުންނެވެ.
ފުރަތަމަ މެޗާ ހިލާފަށް މިރޭގެ މެޗުގައި ބަންގްލަދޭޝްގެ ފަރާތުން ފެނުނީ މޮޅު ކުޅުމެކެވެ. ފުރަތަމަ ސެޓު ބަންގްލަދޭޝްއިން ކާމިޔާބުކުރީ 25-19 އިންނެވެ.
މިރޭ ރާއްޖެ އަދި ބަންގްލަދޭޝް ބައްދަލުކުރި މެޗުގެ ތެރެއިން -- ފޮޓޯ / ރައީސް އޮފީސް
ދެވަނަ ސެޓުގައި ރާއްޖެއިން ކުޅުން ރަނގަޅުކޮށް ސެޓު ކާމިޔާބުކުރިއެވެ. މި ސެޓު ރާއްޖެއިން ކާމިޔާބުކުރީ ރަނގަޅު ލީޑެއްގައި އޮވެ 25-16 އިންނެވެ. މި ސެޓުގައު ރާއްޖޭގެ ސްޕައިކަރުންގެ ބާރު ހަމަލާތަކެއް ފެނުނެެވެ.
ތިންވަނަ ސެޓު ބަންގްލަދޭޝްއިން ކާމިޔާބުކުރީ 25-15 އިންނެވެ. ބަންގްލަދޭޝްގެ ސްޕައިކަރުންގެ ބާރު ހަމަލާތައް ރާއްޖޭގެ ކޯޓަށް އަމާޒުވިއެވެ. މި ސެޓުގައު ރާއްޖޭގެ ބްލޮކަރުންގެ ރަނގަޅު ބްލޮކްތަކެއް ފެނުނެވެ.
ހަތަރު ވަނަ ސެޓުވެސް ބަންގްލަދޭޝް އިން ކާމިޔާބުކުރިއެވެ. މި ސެޓުގައު ރާއްޖެއިން ކޮންމެވެސް ވަރެއްގެ ލީޑެއް ނެގިނަމަވެސް، ބަންގްލަދޭޝްއިން ފަހަތުން އަރައި ލީޑު އަތުލިއެވެ. މި ސެޓު ބަންގްލަދޭޝްއިން ކާމިޔާބުކުރީ 25-21 އިންނެވެ. ބަންގްލަދޭޝްއިން މި ސެޓު ކާމިޔާބުކުރި ނަމަވެސް، ރާއްޖޭ ޓީމުން ވަނީ ވަރަށް ހިތްވަރުކޮށްފައެވެ.
ރޭ ރާއްޖެ އަދި ބަންގްލަދޭޝް ބައްދަލުކުރި މެޗުގެ ތެރެއިން -- ފޮޓޯ / ރައީސް އޮފީސް
ރޭގެ މެޗު ބައްލަވާލެއްވުމަށް ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި، ނައިބު ރައީސް ފައިސަލް ނަސީމް އަދި ޔޫތު މިނިސްޓަރު އަހުމަދު މަހްލޫފުވެސް ވަޑައިގެންނެވިއެވެ.
ޔޫތު މިނިސްޓަރު އަހުމަދު މަހުލޫފްގެ ދައުވަތަކަށް ބަންގްލަދޭޝް ޓީމާ ރާއްޖެއާ ދެކޮޅަށް ތިން މެޗެއް ކުޅޭނެއެވެ. ފުރަތަމަ މެޗުން މިރޭ މޮޅުވިއިރު، ދެ ވަނަ މެޗުން ރޭ ބަލިވީއެވެ. އަދި ފަހު މެޗު އޮތީ ހުކުރު ދުވަހުގެ ރޭއެވެ.