07 Feb 2022, 00:29
ހއ. އިހަވަންދޫން ގެއްލުނު މީހަކު ހޯދުމުގެ މަސައްކަތް އެރަށު ކައުންސިލާއި ފުލުހުން ގުޅިގެން ފަށައިފިއެވެ.
ގެއްލިގެން ހޯދަނީ އެރަށު މަފުރުވިލާ، 31 އަހަރުގެ ހަސަން ފަހުދެވެ.
އިހަވަންދޫ ކައުންސިލްގެ ރައީސް އަހުމަދު ޞަބާހު "ސަން"އަށް ވިދާޅުވީ ފަހުދު އެންމެ ފަހުން ފެނުނީ މިއަދު ހަވީރު އޭނާގެ މަންމައަށް ކަމަށެވެ. އަދި އޭނާ ގެއިން ނުކުތީ މޫދަށް ދާންކަމަށްބުނެ ކަމަށް ވެސް ޞަބާހު ވިދާޅުވިއެވެ.
"ފަހުދު މޫދަށް އެރުންތަން ރަށުގެ އެއްވެސް މީހަކަށް ފެނިފައެއްނުވޭ،" ޞަބާހު ވިދާޅުވިއެވެ.
ފަހުދު ގެއްލިގެން ފުލުހުންނަށް ރިޕޯޓުކުރީ މިރޭ 09:45 ހާއިރުއެވެ. އެރަށު ކައުންސިލާއި ފުލުހުންނާއި ރަށުގެ ރައްޔިތުން ގުޅިގެން ފަހުދު ހޯދުމުގެ މަސައްކަތް ދަނީ ކުރަމުންނެވެ.
"މިހާރު ފުލުހުންނާއި ކައުންސިލުން އަދި ރައްޔިތުން ގުޅިގެން ރަށުގެ ހުރިހާ ސަރަހައްދުތަކެއް މި ބަލަނީ. ފަޅު ގެތަކާ ހަރުގެތަކާ ބެލުމުގެ މަސައްކަތްމި ކުރަނީ. މިހާރު ރަށުގެ ވަށައިގެންވާ މާހައުލު އެއްފަހަރު ބެލިއްޖެ. މިހާރު ދެވަނަ ފަހަރަށް ބެލުމުގެ މަސައްކަތް ކުރިއަށް މިދަނީ. އިރުކޮޅަކުން މޫދު ސަރަހައްދު ބެލުމުގެ މަސައްކަތް ފަށާނެ އެމްއެންޑީއެފްއިން،" ސޮބާހު ވިދާޅުވިއެވެ.
ކައުންސިލްގެ ރައީސް ވިދާޅުވީ ފަހުދު ހޯދުމަށް އެރަށުގެ ހުރިހާ ސަރަހައްދެއް ބަލައި ނިމުނުއިރުވެސް އޭނާ ފެނިފައިނުވާތީ ދެވަނަ ފަހަރަށް މުޅިރަށުތެރެ ބެލުމުގެ މަސައްކަތް ފަށާފައިވާ ކަމަށެވެ.
"ދެވަނަ ފަހަރަށް އޭނާ ހޯދުމަށް މުޅި ރަށުތެރެ ބަލައި ނިމޭއިރު ނުފެނިއްޖެނަމަ އޭނާ ހޯދުމަށްޓަކައި ކޯސްޓްގާޑުގެ އެހީތެރިކަމަށް އަޅުގަނޑުމެން އެދޭނަން،" ޞަބާހު ވިދާޅުވިއެވެ.
ފަހުދަކީ ފެނަކަ ކޯޕަރޭޝަންގެ އިހަވަންދޫ ބްރާންޗުގައި މަސައްކަތްކުރާ މުވައްޒަފެކެވެ.